អ៊ីស្រាអែលបានពង្រីកប្រតិបត្តិការរបស់កងទ័ពថ្មើរជើងខ្លួនក្នុងតំបន់ Gaza Strip នៅព្រឹកថ្ងៃអាទិត្យ ដោយកំពុងបន្ថែមកងកម្លាំងលើកងកម្លាំងដែលកំពុងប្រយុទ្ធនៅទីនោះរួចហើយស្រាប់។ នេះបើយោងតាមនាយឧត្តមសេនីយ៍នាវីឯក Daniel Hagariអ្នកនាំពាក្យយោធាដែលបាននិយាយនៅក្នុងការផ្សាយតាមទូរទស្សន៍កាលពីព្រឹកថ្ងៃអាទិត្យ ហើយត្រូវបានរាយការណ៍ដោយកាសែត The New York Times។
ដោយពណ៌នាកិច្ចប្រតិបត្តិការថ្មើរជើងថាជា «ការស្មុគ្រស្មាញ» លោកHagari បានថ្លែងថា៖ «យើងកំពុងធ្វើប្រតិបត្តិការតាមដំណាក់ការនៃសង្គ្រាមស្របទៅតាមផែនការ។ យើងកំពុងពង្រីកជាបណ្តើរៗនូវសកម្មភាពថ្មើរជើងនិងទំហំនៃកងកម្លាំងរបស់យើងនៅក្នុងតំបន់ Gaza Strip»។
នៅពេលដែលទុក្ខលំបាកកាន់តែធ្ងន់ធ្ងរឡើងនៅក្នុងតំបន់ហ្កាហ្សា ទីភ្នាក់ងារអង្គការសហប្រជាជាតិដែលផ្តល់ជំនួយដល់ជនជាតិប៉ាឡេស្ទីន ដែលហៅកាត់ថា UNRWA បានឱ្យដឹងកាលពីថ្ងៃអាទិត្យថា មនុស្សរាប់ពាន់នាក់បានទម្លុះចូលឃ្លាំងរបស់ទីភ្នាក់ងារដើម្បីយកម្សៅមី និង«របស់របរផ្សេងទៀតដើម្បីចិញ្ចឹមជីវិត»។ នេះបើតាមកាសែត The New York Times។
ទីភ្នាក់ងារអង្គការសហប្រជាជាតិ UNRWA ក៏បានបញ្ជាក់ដែរថា ការបាត់បង់សេវាទូរសព្ទនិងអ៊ីនធឺណិត បានធ្វើឱ្យពលរដ្ឋនៅហ្កាហ្សានៅឯកោពីពិភពលោកខាងក្រៅ ដោយបានបង្កើនជាភាពតានតឹងនិងការភ័យខ្លាច។ ទីភ្នាក់ងារអង្គការសហប្រជាជាតិថា សេវាទូរសព្ទនិងអ៊ីនធឺណិតនៅក្នុងផ្នែកខ្លះនៃតំបន់ហ្កាហ្សាត្រូវបានស្តាឡើងវិញកាលពីថ្ងៃអាទិត្យ។
យោធាអ៊ីស្រាអែលបាននិយាយកាលពីថ្ងៃអាទិត្យថា ទាហានពីរនាក់របស់ខ្លួនបានរងរបួសកាលពីពេលយប់ នៅភាគខាងជើងនៃតំបន់ហ្កាហ្សា។ នេះគឺជាករណីរងរបួសដែលត្រូវបានរាយការណ៍លើកដំបូងរបស់ខ្លួនក្នុងដំណើរការពង្រីកប្រតិបត្តិការថ្មើរជើងចូលក្នុងតំបន់ហ្កាហ្សានេះ។
កាសែត The New York Timesបានរាយការណ៍ថា យោធាអ៊ីស្រាអែលបាននិយាយថា មន្ត្រីម្នាក់បានរងរបួសជាទម្ងន់ បន្ទាប់ពីត្រូវគ្រាប់កាំភ្លើងត្បាល់ ហើយទាហានម្នាក់ទៀតបានរងរបួសមធ្យម។ ទាហានទាំងពីរនាក់នេះត្រូវបានជម្លៀសចេញ។ យោធាអ៊ីស្រាអែលត្រូវគេរំពឹងថានឹងប្រឈមការតស៊ូយ៉ាងស្វិតស្វាញពីក្រុមហាម៉ាស់នៅពេលដែលខ្លួនរុលចូលកាន់តែជ្រៅទៅក្នុងតំបន់ហ្កាហ្សា។
យោធាអ៊ីស្រាអែលបាននិយាយកាលពីថ្ងៃអាទិត្យថា៖ «កងទ័ពរបស់ខ្លួនបន្តពង្រីកសកម្មភាព» នៅក្នុងតំបន់ហ្កាហ្សា ហើយបានវាយប្រហារលើគោលដៅយោធារបស់ក្រុមហាម៉ាស់ចំនួន ៤៥០ កន្លែង ក្នុងរយៈពេលជាងមួយថ្ងៃកន្លងមកនេះ»។
ការភ្ជាប់បណ្តាញអ៊ីនធឺណិតត្រូវបានស្តាមកវិញនៅក្នុងតំបន់ Gaza Strip កាលពីថ្ងៃអាទិត្យ។ នេះបើតាមNetblocks ដែលជាអ្នកឃ្លាំមើលបណ្តាញអ៊ីនធឺណិតឯករាជ្យ ហើយត្រូវបានរាយការណ៍ដោយកាសែត The New York Times៕
ប្រែសម្រួលដោយលោក ជឹង ប៉ូជីន
