អ៊ីស្រាអែលរាយការណ៍ពីការវាយប្រហារតាមអាកាសជាច្រើននៅភាគខាងជើងនិងខាងត្បូងនៃតំបន់ហ្កាហ្សានៅថ្ងៃអង្គារនេះ មួយថ្ងៃក្រោយរដ្ឋមន្ត្រីការពារជាតិរបស់ខ្លួននិយាយថា តំណាក់កាលនៃសង្គ្រាមដ៏ខ្លាំងក្លាមួយប្រឆាំងនឹងក្រុមហាម៉ាស់ នឹងត្រូវបញ្ចប់ក្នុងពេលឆាប់ៗខាងមុខនេះ។
កងកម្លាំងអ៊ីស្រាអែលនិយាយថា ការវាយប្រហារតាមអាកាសរបស់ខ្លួន គឺសំដៅលើទីតាំងក្រុមយុទ្ធជនហាម៉ាស់នៅក្នុងតំបន់ Shati ភាគខាងជើង និងទីក្រុង Khan Younis។
កងទ័ពអ៊ីស្រាអែលបានសម្លាប់ក្រុមសកម្មប្រយុទ្ធហាម៉ាស់រាប់សិបនាក់ និងបានរកឃើញទីតាំងបាញ់គ្រាប់រ៉ុក្កែតរបស់ក្រុមនេះប្រមាណ ១០០ កន្លែងផងដែរ។
ការវាយប្រហារតាមអាកាសកាលពីយប់មិញក៏បានកម្ទេចជើងទម្របាញ់រ៉ុក្កែតប្រឆាំងរថគ្រោះ នៅភាគខាងត្បូងប្រទេសលីបង់ផងដែរ ដែលនេះជាការវាយប្រហារឆ្លងព្រំដែនក្នុងពេលថ្មីៗចុងក្រោយ ដែលធ្វើឱ្យមានការបារម្ភពីជម្លោះមួយដែលអាចរាលដាលក្នុងតំបន់។
រដ្ឋមន្ត្រីការពារជាតិអ៊ីស្រាអែលលោក Yoav Gallant បានបដិសេធបទឈប់បាញ់គ្នាមួយ ក្នុងពេលលោកប្រាប់ក្រុមអ្នកសារព័ត៌មានកាលពីថ្ងៃចន្ទ ដោយនិយាយថា អ៊ីស្រាអែលមិនអាចបញ្ឈប់ប្រតិបត្តិការយោធាទាំងស្រុងរបស់ខ្លួនក្នុងតំបន់ហ្កាហ្សានោះឡើយ ព្រោះក្រុមហាម៉ាស់ មិនយល់ស្របដោះលែងក្រុមចំណាប់ខ្មាំងបន្ថែមទៀតទេ បើគ្មានសម្ពាធយោធានោះទេ។
នៅក្នុងហេតុការណ៍ដាច់ដោយឡែកមួយទៀត ក្រុមឧទ្ទាមហ៊ូធីក្នុងប្រទេសយេម៉ែន បានបាញ់មីស៊ីលមួយគ្រាប់ សំដៅលើនាវាដឹកទំនិញរបស់សហរដ្ឋអាមេរិក នៅក្នុងឈូងសមុទ្រ Aden ក្បែរឆ្នេរសមុទ្រយេម៉ែន។ ការវាយប្រហារទៅលើនាវាអាមេរិក Gibraltar Eagle កើតមានឡើងតិចជាងមួយថ្ងៃប៉ុណ្ណោះ ក្រោយពីពួកឧទ្ទាមហ៊ូធីនៅក្នុងប្រទេសយេម៉ែន បានបាញ់មីស៊ីលស្វ័យនាំផ្លូវប្រឆាំងនាវា មួយគ្រាប់សំដៅលើនាវាពិឃាដអាមេរិក នៅក្នុងសមុទ្រក្រហមមក៕
ផ្នែកខ្លះនៃព័ត៌មាននេះត្រូវបានផ្តល់ឱ្យដោយទីភ្នាក់ងារសារព័ត៌មាន The Associated Press, Agence France-Presse និង Reuters ។
វេទិកាបញ្ចេញមតិ