យោធាអ៊ីស្រាអែលបាននិយាយកាលពីថ្ងៃព្រហស្បតិ៍ថាកងទ័ពរបស់ខ្លួនបានវាយប្រហារតាមអាកាសប្រឆាំងនឹងទីដៅនានារបស់ក្រុម Hezbollah នៅក្នុងតំបន់ជាច្រើននៅភាគខាងត្បូងប្រទេសលីបង់។
ទីភ្នាក់ងារសារព័ត៌មានជាតិរបស់លីបង់បានបញ្ជាក់ថាការវាយប្រហារមួយនៃការវាយប្រហារមួយចំនួននៅក្នុងទីក្រុង Doueir បានកម្ទេចផ្ទះមួយខ្នង ក៏ប៉ុន្តែមិនមានសេចក្តីរាយការណ៍ពីការខូចខាតទេ។
យោធាអ៊ីស្រាអែលក៏បាននិយាយកាលពីថ្ងៃព្រហស្បតិ៍ដែរថាខ្លួនបានធ្វើការវាយឆ្មក់នៅក្នុងតំបន់ Rafahនៅភាគខាងត្បូងតំបន់ហ្កាហ្សាជាទីកន្លែងដែលពួកគេបានប្រយុទ្ធជាមួយពួកជនសកម្មប្រយុទ្ធហាម៉ាស់អស់ជាច្រើនខែ។ យន្តហោះចម្បាំងអ៊ីស្រាអែលក៏បានបំផ្លាញទីតាំងបាញ់កាំភ្លើងរបស់ជនសកម្មប្រយុទ្ធមួយកន្លែងនៅក្នុងតំបន់ហ្កាហ្សាភាគខាងជើង។
ក្រុមផ្តល់ជំនួយ World Central Kitchen បាននិយាយកាលពីថ្ងៃព្រហស្បតិ៍ថាសមាជិកម្នាក់នៃក្រុមមើលឃ្លាំងដែលជាជនជាតិប៉ាឡេស្ទីនបានត្រូវសម្លាប់នៅកណ្តាលតំបន់ហ្កាហ្សា។ ក្រុមនោះបាននិយាយទៀតថាខ្លួនកំពុងស្វះស្វែងរកសេចក្តីលម្អិតអំពីការស្លាប់របស់លោក Nadi Salloutហើយថាខ្លួនជឿជាក់ថាលោកបានចេញពីធ្វើការនៅពេលនោះ។
យោធាអ៊ីស្រាអែលបាននិយាយថាខ្លួន«មិនបានដឹងពីឧបទ្ធវហេតុណាមួយដែលក្នុងនោះបុគ្គលិករបស់អង្គការនោះបានជួបគ្រោះថ្នាក់ក្នុងអំឡុងនៃការបំពេញការងាររបស់លោកក្នុងប៉ុន្មានថ្ងៃនេះទេ»។
ក្រុម Hezbollah បានប្តេជ្ញាឆ្លើយតបវិញ ខណៈដែលអ៊ីស្រាអែលបានសន្យាកម្ចាត់លោក Yahya Sinwar មេដឹកនាំដែលទើបតាំងថ្មីរបស់ក្រុមហាម៉ាស់៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFP និង Reuters
វេទិកាបញ្ចេញមតិ