ភ្ជាប់​ទៅ​គេហទំព័រ​ទាក់ទង

កងទ័ពអ៊ីនធឺណិតអ៊ីរ៉ង់អះអាងថាបានវាយប្រហារលើ​គេហទំព័រសំឡេងស.រ.អ.


វីអួអេ​​សម្លេង​ស.រ.អ.​​ត្រូវ​បាន​អង្គ​ការ​ដែល​មាន​បង្ហាញ​រូប​ភាព​​នេះ​​​រាំង​ខ្ទប់​និង​​លួច​ចូល​ក្នុង​ប្រព័ន្ធ​កុំ​ព្យូទ័រ​។ ​រូប​ភាព​​នេះ​មាន​ដាក់​បង្ហាញ​នៅ​លើ​គេហទំព័រ voanews.com ​ក្រោយ​ពី​ពួក​លួច​ចូល​នោះ​បង្វែរ​ចរាចរណ៍​បន្ដ​របស់​គេហទំព័រ​សម្លេង​ស.រ.អ.

វ៉ាស៊ីនតោន៖ ​ក្រុម​អ្នក​លួច​ចូល​ក្នុង​ប្រព័ន្ធ​កុំព្យូទ័រ​មួយ​ក្រុម​ នៅ​សប្តាហ៍​នេះ​ បាន​លួច​ចូល​កាន់កាប់​គេហទំព័រ​ដែល​វីអូអេ​ ឬ​សម្លេង​សហរដ្ឋ​អាមេរិក​គ្រប់គ្រង​ ដោយ​បាន​បញ្ជូន​ចរាចរណ៍​តាម​ប្រព័ន្ធ​អ៊ិនធឺណិត​ទៅ​ឲ្យគេហទំព័រមួយ​ទៀត​ដែល​គេ​បាន​អះអាង​ថា​ ត្រូវ​គ្រប់គ្រង​ដោយ​ក្រុម​«កងទ័ព​អ៊ិនធឺណិត​អ៊ីរ៉ង់​»​ (Iranian Cyber Army)។​ ការ​វាយ​ប្រហារ​នេះ​ធ្វើ​ឡើង​នៅ​ពេល​ដែល​រដ្ឋាភិបាល​ស.រ.អ.កំពុង​តែ​ជំរុញ​ជា​ថ្មី​ម្ដង​ទៀត​នូវ​ការ​ផ្លាស់​ប្ដូរ​លើក​ស្ទួយ​សេរីភាព​ក្នុងប្រព័ន្ធ​អ៊ិនធឺណិត​ ហើយ​និង​នៅ​ពេល​ដែល​ការ​តវ៉ា​រីករាល​ដាល​នៅ​ទូទាំង​មជ្ឈិម​បូព៌ា។ ការតវ៉ាខ្លះៗ​កើត​មាន​ឡើង​ដោយ​មាន​ជំនួយ​ពី​ប្រព័ន្ធ​អ៊ិនធឺណិត។ នៅ​ក្នុង​សេចក្ដី​ថ្លែង​ការណ៍​មួយ​នៅ​ថ្ងៃ​អង្គារ​ វីអូអេ​ឲ្យ​ដឹង​ថា​ ការ​វាយ​ប្រហារ​នេះ​បាន​បង្វែរ​ចរាចរណ៍​បន្ដ​ពី​គេហទំព័រ​មួយ​ចំនួន​មាន​រួម​ទាំងគេហទំព័រ​សំខាន់​មួយ​របស់​បណ្ដាញ​ផ្សាយ​ព័ត៌មាន​អន្ដរជាតិមួយ​នេះ​ គឺ voanews.com។ ផ្ទុយ​ពី​ការណ៍​ដែល​អ្នក​ប្រើប្រព័ន្ធ​អ៊ិនធឺណិត​គួរ​បាន​ឃើញ​ជា​ធម្មតា​ក្នុង​គេហទំព័ររបស់​សំឡេង​ស.រ.អ.​ ពួក​គេ​បាន​ឃើញ​ទំព័រ​មួយ​មាន​ផ្ទុក​សារ​មួយ​ប្រឆាំងស.រ.អ.​ជូន​ចំពោះ​លោក​ស្រី​រដ្ឋមន្ដ្រី​ក្រសួង​ការ​បរទេស​ស.រ.អ.​ ហ៊ីល្លារី គ្លីនតុន (Hillary Clinton) ហើយ​និង​ទង់​ជាតិអ៊ីរ៉ង់​មួយ​ ព្រម​ទាំង​កាំភ្លើង​ស្វ័យប្រវត្ដិ​ធុន​ AK-៤៧​មួយ​ទៅ​វិញ។

អក្សរ​ធំៗ​ក្រាស់ៗ​សរសេរ​ថា៖ «យើង​បាន​បង្ហាញ​ឲ្យ​ឃើញ​ថា​ យើង​មាន​សមត្ថភាពធ្វើ​បាន»។

មាន​សេចក្ដី​រាយការណ៍​មក​ថា​ ក្រុមមនុស្ស​ដែល​អះអាង​ទទួល​ខុស​ត្រូវ​ក្នុង​ការ​វាយ​ប្រហារ​នេះ​ គឺ​កងទ័ព​អ៊ិនធឺណិត​អ៊ីរ៉ង់​ ជាប់​ពាក់ព័ន្ធ​ទៅ​នឹង​រដ្ឋាភិបាល​អ៊ីរ៉ង់។ ​លោក​ Jeffrey Carr អ្នក​ជំនាញ​ខាង​សន្ដិសុខ​ប្រព័ន្ធ​អ៊ិនធឺណិត ​និយាយ​ថា​ គេ​ត្រូវការ​ចាំបាច់​យក​ចិត្ដ​ទុក​ដាក់យ៉ាង​ខ្លាំង​ជា​ទីបំផុត​ទៅ​លើ​ក្រុម​កងទ័ព​ អ៊ិនធឺណិត​អ៊ីរ៉ង់​នេះ។

«មាន​ក្រុម​មនុស្ស​មួយ​ចំនួន​ ដែល​លួច​ចូលប្រព័ន្ធ​កុំព្យូទ័រ​ ហើយ​ដែលធ្វើប្រតិបត្ដិការ​ចេញ​ពី​ប្រទេសអ៊ីរ៉ង់​ ហើយ​ដែល​មាន​សេចក្ដី​ស្មោះត្រង់​ ឬ​ការ​ពាក់ព័ន្ធ​ជាមួយ​រដ្ឋាភិបាល​អ៊ីរ៉ង់។​ កងទ័ព​អ៊ិនធឺណិតអ៊ីរ៉ង់​ជា​ក្រុម​មនុស្ស​ក្នុង​ចំណោម​ក្រុម​អ្នក​លួច​ចូល​ប្រព័ន្ធ​កុំព្យូទ័រ​នោះ។ ពួក​នោះ​មាន​ជំនាញការល្អ​ក្នុង​រឿង​នេះ។​ ពួក​នេះ​មិនមែន​ជា​ក្រុម​អ្នក​លួច​ចូល​ប្រព័ន្ធ​កុំព្យូទ័រ​ដែល​គ្មាន​បទ​ពិសោធន៍​នោះ​ទេ»​។

ទី​ភ្នាក់ងារព័ត៌មាន​ Fars News Agency ​ដែល​មាន​ការ​ទាក់ទង​គ្នា​យ៉ាង​ជិត​ស្និទ្ធជាមួយ​រដ្ឋាភិបាល​អ៊ីរ៉ង់​ បាន​កោត​សរសើរ​ចំពោះ​ការ​វាយ​ប្រហារ​នោះ​ ហើយ​ឲ្យ​ដឹង​ថា​ ការ​វាយ​ប្រហារ​នោះ​ធ្វើ​ឡើង​ដើម្បី​សង​សឹក​ចំពោះ​អ្វី​ដែល​ខ្លួន​ហៅ​ថា​ ជា​សេចក្ដី​រាយការណ៍​ខុស​អំពី​ប្រទេស​អ៊ីរ៉ង់។

កាល​ពី​ពេល​ថ្មីៗ​នេះ​ ក្រសួង​ការ​បរទេស​ស.រ.អ.​ បាន​បង្កើត​គេហទំព័រ​ដែល​បញ្ចេញសារ​តាម​ Twitter ​ជា​ភាសា​ Farsi។​ ប្រទេស​អ៊ីរ៉ង់បាន​រិះគន់​ចំពោះ​ការ​ផ្ដើម​គំនិត​នេះ​ ហើយ​ចោទ​ស.រ.អ.​ថា​បាន​ប្រើ​ប្រព័ន្ធ​អ៊ិនធឺណិត​ដើម្បី​រៀបចំ​កង​កម្លាំង​ជំទាស់​ខ្លួន។

គេ​មិន​ដឹង​ច្បាស់​ទេ​ថា​ តើ​ការ​វាយ​ប្រហារ​មក​លើ​សំឡេង​ស.រ.អ.​ប្រព្រឹត្ដ​ធ្វើ​ទៅ​តាម​របៀប​ណា​ទេ។

នៅ​ចុង​ឆ្នាំ​២០០៩ ​ក្រុម​កងទ័ព​អ៊ិនធឺណិត​អ៊ី​រ៉ង់​អះអាង​ទទួល​ខុស​ត្រូវ​ចំពោះ​ការ​វាយ​ប្រហារ​ទៅ​លើ​គេហទំព័រ​បណ្ដាញ​ទាក់ទង​សង្គម​ Twitter ​ដែល​ក្រុម​ប្រឆាំង​រដ្ឋាភិបាល​អ៊ីរ៉ង់​ ​បាន​ប្រើ​ជា​ទូទៅ​ នៅ​ក្នុង​ការ​តវ៉ា​របស់​គេ​ ក្រោយ​ការ​បោះ​ឆ្នោត​នៅ​ឆ្នាំ​នោះ។​ កាល​ពី​ឆ្នាំ​ទៅ​ កងទ័ព​អ៊ិនធឺណិតអ៊ីរ៉ង់​ ធ្វើ​ការ​វាយ​ប្រហារ​មួយ​ទៅ​លើ​ប្រព័ន្ធ​ស្វែង​រក​ព័ត៌មាន ​Baidu​ របស់ចិន។

ការ​វាយ​ប្រហារ​ទាំង​ពីរ​នេះ​ ជា​ការ​វាយ​ប្រហារ​លើ​ប្រព័ន្ធ​ឈ្មោះ​អាស័យដ្ឋាន​អ៊ីនធឺណិត​ (domain name system​ ឬ DNS) ​ដូច​ជា​ការ​វាយ​ប្រហារ​មក​លើ​ សំឡេង​ស.រ.អ. ​នៅ​ពេល​នេះ​ដែរ។​ សំឡេង​ស.រ.អ.​ឲ្យ​ដឹង​ថា​គ្មាន​ការ​បាត់បង់​ទិន្នន័យ​ឬ​ក៏​ទិន្នន័យ​ត្រូវ​បាន​ខូចខាត​ទេ​ ហើយ​ថា​គេហទំព័រ​ភាគ​ច្រើន​ដែល​ត្រូវ​ទទួល​រង​ការ​វាយ​ប្រហារ​កំពុង​តែ​ប្រតិបត្ដិការ​ធម្មតា​វិញ​ហើយ៕

ប្រែ​សម្រួល​ដោយ​ ​កង ​ស៊ីវន

XS
SM
MD
LG