ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​មហាផ្ទៃ​នឹង​ស៊ើបអង្កេត​ការ​ដោះលែង​អ្នកទោស​ខុស​ច្បាប់


ក្រសួង​មហាផ្ទៃ​ក្នុង​ទី​ក្រុង​ភ្នំពេញ។
ក្រសួង​មហាផ្ទៃ​ក្នុង​ទី​ក្រុង​ភ្នំពេញ។

ភ្នំពេញ៖ នាយកដ្ឋាន​ពន្ធនាគារ​របស់​ក្រសួង​មហាផ្ទៃ ​នៅក្នុង​សប្ដាហ៍​នេះ​ ​នឹង​ចាប់ផ្កើម​ធ្វើការ​ស៊ើបអង្កេត​ទៅលើ​អ្នកទោស​មួយរូប​ជា​អតីត​ស្នងការប៉ូលិស​ខេត្ត​រតនគីរី​ ​ដែល​ត្រូវបាន​អនុញ្ញាត​ឲ្យ​ចេញ​ក្រៅ​មន្ទីរ​ឃុំឃាំង​កាលពី​ថ្ងៃសៅរ៍​សប្ដាហ៍​មុន។ ​អតីត​ស្នងការ​រូបនេះ​ ​បន្ទាប់ពី​បាន​ចេញពី​ពន្ធនាគារ​ ​បាន​បើក​រថយន្តខ្លួន​ឯង​រហូត​បង្ក​គ្រោះថ្នាក់​ចរាចរណ៍​មួយ​ដែល​បាន​បណ្ដាល​ឲ្យ​មនុស្ស​បីនាក់​រងរបួស។

លោក​ហេង ហាក់​ ​ប្រធាន​នាយកដ្ឋាន​ពន្ធនាគារ​របស់​ក្រសួង​មហាផ្ទៃ​ ​បាន​មាន​ប្រសាសន៍​ប្រាប់ VOA​ ​សំឡេង​សហ​រដ្ឋ​អាមេរិក​នៅ​ថ្ងៃពុធ​នេះ​ថា​ ​នៅ​សប្តាហ៍​ក្រោយ​នេះ​ ​លោក​នឹង​ចាត់​ឲ្យ​មន្រ្តី​របស់ លោក​ទៅ​ធ្វើការ​ស៊ើបអង្កេត​ទៅលើ​ភាព​មិនប្រក្រតី​មួយ​ក្នុង​ការ​ដោះលែង​អ្នកទោស​ឲ្យ​នៅ​ក្រៅ​ឃុំ​ខុស​ច្បាប់​ដោយ​អនុរក្ស​ពន្ធនាគារ​ខេត្ត​រតនគីរី។

«រឿង​នេះ​ ​យើង​ខ្ញុំ​អត់ទាន់​ច្បាស់​ទេ​ ​ហើយ​អាជ្ញាធរ​នៅខេត្ត ​គឺ​ខាង​ស្ថានប័ន​តុលាការ​ ​គេ​កំពុងតែ​ពិនិត្យ​បញ្ហា​ហ្នឹង​ដែរ។​ អញ្ចឹង​ ​គឺយើង​ខ្ញុំ​នឹង​ចាត់​មន្រ្តី​ចុះ​ទៅ​សហការ​ដើម្បី​បំភ្លឺ​រឿងនេះ​ច្បាស់លាស់»។

កាល​ពី​សប្តាហ៍​មុន​នេះ​ ​ពិរុទ្ធជន​យឿង បាលួង​ ​អតីត​ស្នងការ​ប៉ូលិស​ខេត្ត​រតនគីរី​ ​ត្រូវបាន​អនុរក្ស​ ពន្ធនាគារ​សម្រេច​ដោះលែង​ឲ្យ​នៅ​ក្រៅឃុំ​ ​ដោយ​គ្មាន​ច្បាប់​អនុញ្ញាត​ ​ក្នុង​ខណៈ​ពេល​ដែល​ទោស​កំហុស​របស់​លោក​មិនទាន់​បាន​ផុត​អាជ្ញាយុកាល​នៅឡើយ​ ​នេះ​បើ​តាម​ការ​អះអាង​របស់​មន្រ្តី​សិទ្ធិ​មនុស្ស។

លោក​ប៉ែន ប៊ុនណា​ ​មន្រ្តី​ផ្នែក​ស៊ើប​អង្កេត​របស់​សមាគម​សិទ្ធិមនុស្ស​ADHOC​ ​ប្រចាំ​ខេត្ត​រតនគីរី​ ​បាន​មាន​ប្រសាសន៍​ថា​ ​លោក​យឿង​ បាលូង​ត្រូវ​បាន​តុលាការ​កាត់ទោស​ឲ្យ​ជាប់ពន្ធនាគារ​ជាមួយ​ និង​លោក​ខំា ខឿន​ ​អតីត​អភិបាល​ខេត្ត​រតនគីរី​ ​ឲ្យ​ជាប់​ពន្ធនាគារ​រហូត​ដល់​១៣ឆ្នាំ​ ​កាល​ពី​ឆ្នាំ​២០០៦​ ​ពី​បទ​ជាប់ពាក់ព័ន្ធ​នឹង​អំពើ​ពុករលួយ ​និង​ការកាប់បំផ្លាញ​ព្រៃឈើ​យ៉ាង​ធ្ងន់ធ្ងរ​ ​នៅ​តំបន់​កន្ទុយ​នាគ។​លោក​បាន​មាន​ប្រសាសន៍​ទៀត​ថា​ ​រហូត​មកដល់​ពេលនេះ​ ​លោក​យឿង​ ​បាលួង​ទើបតែ​ជាប់​ពន្ធនាគារ​រយៈ​ពេល​តែ​៥​ឆ្នាំ​ប៉ុណ្ណោះ​ ​នៅ​ក្នុង​ទោស​កំហុស​សរុប​ចំនួន​១៣​ឆ្នាំ​ ​ហើយ​ត្រូវបាន​អនុរក្ស​ ពន្ធនាគារ​អនុញ្ញាត​ឲ្យ​នៅ​ក្រៅ​ឃុំ​ ​ដោយ​មិនមាន​ការ​ពិភាក្សា​ជាមួយនិង​ខាង​មន្រ្តី​តុលាការ។

«អ្វី​ដែល​ច្បាស់ការ​សម្រាប់​សមាគម​ADHCO​ស៊ើបអង្កេតគឺ​ពិត​ជា​លោក​យឿង បាលួង​ហ្នឹងបាន​ចេញ​ក្រៅ​កាល​ពី​ថ្ងៃ​ទី១៥​មែន។ ​អារឿង​ហ្នឹង​ត្រូវ​មាន​ការ​ទទួលខុស​ត្រូវ​ពី​ប្រធាន​ពន្ធនាគារ​ ​ពីព្រោះ​តាម​ព័ត៌មាន​បន្ថែម​ទៀត​ យើងដឹង​ថា​ ​ការ​ដែល​ពន្ធនាគារ​ឲ្យ​លោក​យឿង បាលួង​ចេញ​ទៅ​ក្រៅ​ឃុំ​នេះ​អត់មាន​ការសុំ​អនុញ្ញាត​ពី​ព្រះរាជ​អាជ្ញា​អម​តុលាការ​សាលា​ដំបូង​ខេត្ត​រតនគីរី​ទេ»។

លោក​រស់ សារាំ​ ​ព្រះ​រាជអាជ្ញា​រង​ខេត្ត​រតនគីរី​ ​នៅ​ថ្ងៃ​ពុធ​នេះ​ ​ពុំ​អាច​ស្នើ​សុំ​ទំនាក់ទំនង​បាន​ទេ​ ​ដោយ​ទូរស័ព្ទ​របស់​លោក​ត្រូវ​បាន​បិទ។

ចំណែក​លោក​រ៉ាយ រ៉ៃ ​ស្នងការ​ប៉ូលិស​ខេត្ត​រតនគីរី​ ​បាន​មាន​ប្រសាសន៍​យ៉ាង​ខ្លី​ថា​ ​«រវល់​ណាស់»។

លោក​ប៉ែន ប៊ុនណា​បាន​មាន​ប្រសាសន៍​ទៀត​ថា​ ​បន្ទាប់ពី​ការដោះលែង​ចេញ​ពី​ពន្ធនាគារ​ ​លោក យឿង បាលួង​បាន​ទៅ​ចូលរួម​ពិធី​បុណ្យ​ប្រពៃណី​មួយ​របស់​ជនជាតិ​ទំពូន​ ​ហើយ​នៅ​ពេល​ត្រឡប់​មក​ វិញ​ ​លោក​បាន​បើកបរ​រថយន្ត​ដោយ​ខ្លួនឯង​នៅ​ក្នុង​ភាពស្រវឹង​ ​រហូត​បង្ក​គ្រោះថ្នាក់​ចរាចរណ៍​មួយ​ដែល​បាន​បណ្តាល​ឲ្យ​មនុស្ស​ចំនួន​បីរូប​បាន​ទទួល​រងរបួស​យ៉ាង​ធ្ងន់ធ្ងរ។

ជន​រងគ្រោះ​ឈ្មោះ​សំ កែវ​ ​អាយុ​១៩​ឆ្នាំ ​និង​លោក​ថាំង ពេជ្រ​ ​អាយុ​២១​ឆ្នាំ​ ​បាន​រងរបួស​ ​បាក់ជើង​ និង​បាក់ដៃ​ ​ហើយ​លោក​ឆេង ងួន​ ដែល​ជា​អ្នក​បើក​ម៉ូតូ​ ​បាន​ទទួល​រងរបួស​ត្រង់​ជើង។​ អ្នក​ទាំងបី​ត្រូវបាន​បញ្ជូន​ទៅ​ព្យាបាល​នៅ​មន្ទីរពេទ្យ​មួយ​ក្នុង​ប្រទេស​វៀតណាម។

លោក​សុខ វុទ្ធី​ អាយុ​៣៦ឆ្នាំ​ ​ជា​ឪពុកមារ​ជន​រងគ្រោះ​សំ កែវ​និង​ថាំង​ ​ពេជ្រ​ ​បាន​និយាយ​ថា​ ​លោក​ ចង់​ឲ្យ​ក្រុមគ្រួសារ​របស់​លោក​យឿង បាលួង​ចេញ​ថ្លៃព្យាបាល​ដល់​ជន​រងគ្រោះ​រហូតដល់​បាន​ជា​សះ ស្បើយ។

លោក​សុខ វុទ្ធី​បាន​ស្តីបន្តោស​ដល់​មន្រ្តី​អនុរក្ស​ពន្ធនាគារ​ដែល​បាន​អនុញ្ញាត​ឲ្យ​អ្នកទោស​ចេញក្រៅ​ឃុំដោយ​ខុសច្បាប់​នោះ​ថា​ ​គួរតែ​ប្រឈម​ចំពោះ​មុខច្បាប់។

«អ្នក​គ្រប់គ្រង​នៅកន្លែង​គុកហ្នឹង​ ​គាត់​ធ្វើ​អញ្ចឹង​អត់មាន​យុត្តិធម៌​ទេ។ ​ក្នុង​ចិត្ត​របស់​ខ្ញុំ​ ​អ្នកហ្នឹង​មិនគួរ​នៅ​កាន់​តំណែង​តទៅ​ទៀត​ ​ពីព្រោះ​ ​បើសិន​ជាទុក​ត​ទៅ​ទៀត​ ​ថ្ងៃហ្នឹង​ប៉ុណ្ណឹង​ ​ចុះ​បើ​ថ្ងៃ​ក្រោយ​ទៀត​ទៅ​ជា​យ៉ាងម៉េច? ​វា​មាន​បន្ត​ទៅទៀត​ ​ពីព្រោះ​លើក​ទីមួយ​ហ៊ាន​ប៉ុណ្ណឹង​ទៅ​ហើយ»។

លោក​ងិន នែល​ ប្រធាន​ពន្ធនាគារ​ខេត្ត​រតនគីរី​ ពុំអាច​ស្នើសុំ​ដើម្បី​ទំនាក់​ទំនង​បាន​ទេ។ ​ក៏​ប៉ុន្តែ​ ទោះ​ជា​យ៉ាងណា​ក៏ដោយ​ ​ក៏លោក​ហេង ហាក់​ ​ប្រធាន​នាយកដ្ឋាន​ពន្ធនាគារ​របស់​ក្រសួង​មហាផ្ទៃ​ ​បាន​ និយាយ​ថា​ ​លោក​បាន​ទទួល​សេចក្តី​រាយការណ៍​ជំហ៊ាន​ដំបូង​ថា​ ​លោក​យឿង​ បាលួង​បាន​សុំច្បាប់​អនុញ្ញាត​ទៅ​ព្យាបាល​ជំងឺ​នៅ​ខាងក្រៅ​ពន្ធនាគារ។

លោក​ហេង ហាក់​បាន​មាន​ប្រសាសន៍​ទៀត​ថា​ ​លោក​នឹង​ធ្វើការ​ស៊ើប​អង្កេត​បន្ថែម​ទៀត​ចំពោះ​ករណី​នេះ៕

XS
SM
MD
LG