ភ្ជាប់​ទៅ​គេហទំព័រ​ទាក់ទង

សកម្មជន​សិទ្ធិ​មនុស្ស​និង​សេរីភាព​បញេ្ចញ​មតិ​កាន់​តែ​ប្រឈម​នឹង​ការ​រិត​ត្បិត


ភ្នំពេញ៖ ការិយាល័យ​អង្កេត​ឃ្លាំមើល​ ដើម្បី​ការពារសិទ្ឋិ​មនុស្ស​បាន​និយាយ​ថា ​អ្នក​ការពារ​សិទ្ឋិ​មនុស្ស​នៅ កម្ពុជា​ប្រឈម​មុខ​និង​ភាព​តូច​ចង្អៀត​នៃទំហំ​លិទ្ឋិ​ប្រជាធិបតេយ្យ​។ ការ​អះអាង​នេះ ​បាន​ធ្វើឡើងនៅក្នុង​លទ្ឋផល​នៃបេសកម្ម​ស្វែង​រក​ការពិត​មួយ​ដែលបាន​ធ្វើ​ឡើង​នៅ​ក្នុង​ទីក្រុង​ភ្នំពេញ​ ខេត្តសៀមរាប និង​ខេត្តរតនគីរី​ ពីថ្ងៃ​១៤​ដល់ថ្ងៃ​ ២៤​ ខែកុម្ភះ​ ឆ្នាំ ២០១០។

ការិយាល័យ​ឃ្លាំ​មើល​ដើម្បី​ការពារ​សិទ្ឋិមនុស្ស​ ដែល​មាន​ការ​ចូលរួម​ពី​សហជីព​មក​ពី​ប្រទេស​ហូឡង់​ អ្នក​ស្រាវជ្រាវ​មកពី​ប្រទេស​អូស្រ្តាលី​ សហព័ន្ឋ​សហជីព​អន្តរជាតិ​ អង្គការ​សិទ្ឋិ​មនុស្ស ​LICADHO ​និង​សមាគម​សិទ្ឋិ​មនុស្ស ​ADHOC ​នៅ​ថ្ងៃព្រហស្បត៍​នេះ​ បាន​ចេញ​សេចក្តី​ថ្លែង​ការណ៍​រួមគ្នា​មួយ ដោយ​បាន​ចាត់​ទុក​ថា ​ការ​បញ្ចេញ​មតិ​ដែល​រួមមាន ​ការ​ប្រមូលផ្តុំ​ នៅ​មាន​សភាព​តូច​ចង្អៀត​នៅ​ឡើយ​នៃ​ទំហំ​លទ្ឋិ​ប្រជាធិបតេយ្យ​នៅ​កម្ពុជា។

ការ​អះអាង​របស់​ការិយាល័យ​ឃ្លាំមើល​នេះ បាន​ផ្អែក​ទៅ​លើ​លទ្ឋផល​នៃ​បេសកកម្ម​ស្វែងរក​ការ​ពិត​ជា​អន្តរជាតិ​មួយ​ដែល​បាន​ធ្វើ​ឡើង​នៅ​ក្នុង​ទី​ក្រុង​ភ្នំពេញ ​ខេត្ត​សៀមរាប​ និង​ខេត្ត​រតនៈគីរី ​នៅក្នុង​រយៈពេល​ ចំនួន​១០ថ្ងៃ ​ចាប់ពី​ថ្ងៃទី១៤ ​ដល់​ថ្ងៃទី២៤ ​ខែ​កុម្ភៈ​ ដើម​ឆ្នាំ២០១០​នេះ។

ការិយាល័យ​នេះ ​បាន​រក​ឃើញ​ថា មេដឹកនាំ​សហជីព ​សកម្មជន​ការពារ​សិទ្ឋិមនុស្ស ​សកម្មជន​ការពារ​ សិទ្ឋិ​ដី​ធ្លី និង​អ្នក​សារព័ត៌មាន​ជា​ច្រើន បាន​ប្រឈម​មុខ​នឹង​ការ​រំលោភ​សិទ្ឋិ​មនុស្ស​យ៉ាង​ធ្ងន់​ធ្ងរ។

យ៉ាង​តិច​មាន​មេដឹកនាំ​សហជីព​សេរី​កម្មករ​របស់​ប្រទេស​កម្ពុជា​ចំនួន​បី​រូប​ ដែល​រួម​មាន​ លោក​ជា វិជ្ជា​ លោក​រស់ សុវណ្ណារ៉េត ​និង​លោក​ហ៊ី វុទ្ឋី ​ត្រូវ​បាន​ឃាតករ​បាញ់​សម្លាប់​ ហើយ​ឃាតករ​ពិត​ប្រាកដ​មិន​ទាន់​ត្រូវ​បាន​ចាប់​ខ្លួន​នៅ​ឡើយ​ទេ។

លោក​ Jens Tinga ​អ្នក​តំណាង​សហជីព​មក​ពី​ប្រទេស​ហូឡង់​ បាន​ថ្លែង​ប្រាប់​នៅ​ក្នុង​អង្គ​សន្និសីទ​ការ សែត​ នៅ​ថ្ងៃព្រហស្បត៍​នេះ​ថា​ ការ​រំលោភ​សិទ្ឋិ​ប្រជាពលរដ្ឋ​រឿង​វិវាទ​ដីធ្លី​ ការ​បណ្តេញ​ចេញ​ដោយ​បង្ខំ ​និង សិទ្ឋិ​បញ្ចេញ​មតិ​ផ្សេងៗ ​ត្រូវបាន​គាប​សង្កត់​ នៅ​ពេល​ដែល​ពួក​គេ​ទាមទារ​សិទ្ឋិ​អ្វី​មួយ​នោះ។

«អ្នកណា​ដែល​ហ៊ាន​និយាយ​ចេញ ​ហើយ​រិះគន់​ គឺ​ត្រូវ​បាន​ការ​ចោទ​ ពី​ការ​បរិហារ​កេរ្ត៍ ​ផ្សាយ​ព័ត៌មាន​ មិន​ពិត ​ញ៉ុះញ៉ុង ​ហើយ​ទាំងបី​ហ្នឹង គឺ​ជា​បទ​ព្រហ្មទណ្ឌ​ទៅ​ទៀត ​ហើយ​អា​នេះ ​អត់​មាន​ទេ​នៅ​អ៊ឺរ៉ុប​ គេ​អត់​ធ្វើ​ អញ្ចឹង​ទេ​ ចា! »។

លោក​ហង្ស ចក្រា ​ចាងហ្វាង​កាសែត​ខ្មែរ​ម្ចាស់​ស្រុក​ ដែល​ធ្លាប់​ជាប់​ពន្ឋនាគារ​ចំនួន​២៨៧ថ្ងៃ​ក្រោម​បទ​ចោទ ប្រកាន់​ពីបទ​បរិហាកេរ្ត៍​និង​ផ្សព្វផ្សាយ​ព័ត៌មាន​មិន​ពិត​ បាន​បញ្ជាក់​ថា​ ក្រោយ​ពី​លោក​ជាប់​ពន្ឋនាគារ​រួច​មក​ លោក​គិត​ថា សេរីភាព​នៅ​កម្ពុជា​កំពុង​ធ្លាក់​ចុះ។

លោក​បាន​និយាយ​ទៀត​ថា​ រដ្ឋាភិបាល ​គួរតែ​បើក​បេះដូង​ឲ្យ​ទូលំ​ទូលាយ ​ដើម្បី​ទទួល​យក​នូវ​ការ​រិះគន់​ និង​ទទួល​យក​នូវ​ការ​ពិចារណា ​ជា​ជាងការ​ប្រើប្រាស់​នូវ​ភាព​ផ្តាច់ការ​របស់​ខ្លួន​ប្រឆាំង​ទៅនឹង​អ្នក​រិះគន់។

សេចក្តី​ថ្លែង​ការណ៍​របស់​ការិយាល័យ​ឃ្លាំ​មើល​ដែល​បាន​ចេញ​ផ្សាយ​នៅ​ឆ្នាំ២០១០​នេះ​ ក៏​បាន​លើក​យក​ស្ថានភាព​ទំនាស់​ដីធ្លី​នៅ​ស្រុក​ជីក្រែង​ខេត្ត​សៀមរាប​ ដែល​ក្នុង​ទំនាស់​នេះ​ មាន​ការ​ចាប់​ប្រជាពលរដ្ឋ​ចំនួន ១២នាក់​ យ៉ាងតិច​ដាក់​ពន្ឋនាគារ​។

ព្រះភិក្ខុ​លួន សុវ៉ាត​ គង់​នៅ​វត្ត​ស្លែង​ ស្រុក​ជីក្រែង​ ខេត្ត​សៀមរាប​ ដែល​មាន​សាច់ញាតិ​របស់​ព្រះអង្គ​ ត្រូវ​បាន​ចាប់​ខ្លួន​ដាក់​ពន្ឋនាគារ ​ដោយ​សារ​រឿង​ទំនាស់​ដីធ្លី​ដែរ​នោះ បាន​មាន​សង្ឃដីកា​ប្រាប់ ​VOA​ សំឡេង ​សហរដ្ឋអាមេរិក​ថា៖

«យើង​អត់​ឃើញ​ថា​ យុត្តិធម៌​ត្រូវ​បាន​ដោះ​ តែ​ទី​បំផុត​ វា​ត្រូវ​បាន​ដាក់​អយុត្តិធម៌​ជំនួស​ទៅវិញ​ ដូច្នេះបញ្ហា​មិន​ស្រាយ​បែរ​ជា​រឹត​ចង​នូវ​បញ្ហា​ រឹត​តែ​បន្ថែម​នូវ​បញ្ហា​ធ្វើ​ឲ្យ​ពី​មួយ​ថ្ងៃ​ ពី​មួយ​ខែ​ ពី​មួយ​ឆ្នាំ​ទៅ​មួយ​ឆ្នាំ»។

លោក​ជាម យៀប ​សមាជិក​រដ្ឋសភា​ ខាង​គណបក្ស​ប្រជាជន​កម្ពុជា ​បាន​ជំទាស់​ទៅ​នឹង​ការ​ចោទ​ ប្រកាន់​នេះ។ លោក​បាន​មាន​ប្រសាសន៍​ថា​ រដ្ឋាភិបាល​កំពុង​កែ​ទម្រង់​ទៅ​លើ​បញ្ហា​សិទ្ឋិ​មនុស្ស​ ។

«យើង​កំពុង​តែ​ធ្វើ​យ៉ាង​ម៉េច​ពង្រឹង​ជា​បណ្តើរៗ​ ហើយ​ទទួល​បាន​ជោគជ័យ​ជា​បន្តបន្ទាប់​ មិន​មែន​យើង​ ទាញ​ថយ​ក្រោយ​ ដូច​អ្នក​ខ្លះ​បាន​ទិតៀន​ រយៈកាល​កន្លង​មកថា​ នៅ​កម្ពុជា ​លិទ្ឋិ​ប្រជាបធិបតេយ្យ​ដើរ​ថយ​ក្រោយ​ ឬ​ក៏​ការ​គោរព​សិទ្ឋិ​មនុស្ស​ដើរ​ថយ​ក្រោយ​ មិន​មែន​អញ្ចឹង​ទេ»។

គិត​រហូត​មក​ដល់​ថ្ងៃ​ទី​៨​ខែធ្នូឆ្នាំ២០០៩នេះ​ យ៉ាង​តិច​មាន​សកម្មជន​ការពារ​សិទ្ឋិ​ដី​ធ្លី​ចំនួន​៥២​នាក់ ហើយ​ ត្រូវ​បាន​ចាប់​ដាក់​ពន្ឋនាគារ​ក្នុង​ប្រទេស​កម្ពុជា។ នេះ ​បើ​តាម​ការ​បញ្ជាក់​នៅ​ក្នុង​សេចក្តី​ថ្លែង​ការណ៍​របស់​ការិយាល័យ​អង្កេត​និង​ឃ្លាំ​មើល។

XS
SM
MD
LG