ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួងព័ត៌មាន​លុប​ចោល​អាជ្ញាបណ្ណ​សារព័ត៌មាន​មួយ​ទៀត​នៅ​ខេត្ត​កំពង់​ឆ្នាំង


ទំព័រហ្វេសប៊ុករបស់ «រិទ្ធិសែនព័ត៌មាន» និយាយពី «ចៅក្រមសាលាដំបូងខេត្តកំពង់ឆ្នាំងស្រាវជ្រាវឲ្យដល់ ឬសគល់ក្នុងសំណុំរឿងព្រហ្មទណ្ឌលេខ ៤៩៤ ចុះថ្ងៃទី១៣ ខែកក្កដា ឆ្នាំ ២០១៩ តើភាគីខាងណាជាអ្នកល្មើសឲ្យប្រាកដ» ត្រូវបានផ្សាយផ្ទាល់ នៅថ្ងៃទី១៣ ខែឧសភា ឆ្នាំ២០២០។ (រូបភាពដកស្រង់ពីហ្វេសប៊ុក)

ក្រសួងព័ត៌មាន​បាន​សម្រេចលុបចោល​អាជ្ញាបណ្ណ​របស់វិទ្យុ​ល្បីឈ្មោះមួយ ​នៅខេត្ត​កំពង់ឆ្នាំង ឈ្មោះ «រិទ្ធិសែន» និង​អាជ្ញាបណ្ណ​គេហទំព័រ​របស់វិទ្យុនេះ​ផងដែរ។ នេះបើ​យោងតាម​ប្រកាស​មួយច្បាប់ ចុះ​ថ្ងៃ​ទី​១២ ខែ​ឧសភា ​ឆ្នាំ​២០២០​ ដោយរដ្ឋមន្ត្រី​ក្រសួង​ព័ត៌មាន។

បើ​តាម​ប្រកាស​នោះ ក្រសួង​លុប​ចោល​ប្រកាស​ដែល​អនុញ្ញាត​ឲ្យ​លោក សុខ ឧត្តម បើក​ស្ថានីយវិទ្យុ​FM99.75MHz នៅ​ខេត្តកំពង់ឆ្នាំង ​និង​គេហ​ទំព័រ​ឈ្មោះ​ «រិទ្ធិសែន» ដោយ​អះអាង​ថា​ ម្ចាស់​អាជ្ញាបណ្ណ​សារព័ត៌មាន​មួយ​នេះ​ «បានផ្សព្វផ្សាយ​ព័ត៌មាន​បំផ្លើស​ការពិត ញុះញង់​ឲ្យកើត​មាន​អំពើ​ហិង្សា បង្ក​ការរើសអើង​ពូជសាសន៍ បង្ក​អសន្តិសុខ និង​ចលាចល​សង្គម ដែល​ជា​ការរលោភ​បំពាន​លើ​វិជ្ជាជីវៈ និង​កិច្ច​សន្យា​ដែល​សាមីខ្លួន​បាន​តម្កល់​ទុក​នៅ​ក្រសួងព័ត៌មាន»។

លោក មាស សុភ័ណ្ឌ អ្នក​នាំពាក្យ​ក្រសួង​ព័ត៌មាន​ បាន​ប្រាប់​វីអូអេ​នៅ​ថ្ងៃ​ពុធ​នេះ​ថា ​អាជ្ញាធរ​បាន​ណែនាំ​សារព័ត៌មាន​មួយ​នេះ​ជាច្រើន​ដង​ហើយ ​មុន​នឹង​ចាត់វិធានការ​ចុង​ក្រោយ​នេះ។

«យើង​បាន​ពិនិត្យ​មើល​ការ​ផ្សព្វផ្សាយ​របស់​គាត់​ រហូត​ដល់​យើង​មាន​ការ​អប់រំ​គាត់​នៅ​ថ្នាក់​ខេត្ត​តាម​មន្ទីរ​ព័ត៌មាន​ហ្នឹង​ បាន​អញ្ជើញ​គាត់​មក​ធ្វើ​ការ​អប់រំ​ជាច្រើន​លើក​ច្រើន​សារ​ហើយ​ដែរ ​មុន​នឹង​យើង​សម្រេច​ចិត្ត​ដក​អាជ្ញាបណ្ណ​ហ្នឹង»។

ប៉ុន្តែ អ្នក​នាំពាក្យ​រូប​នេះ មិន​បាន​បញ្ជាក់​ថា តើ​សកម្មភាព​ឬ​ព័ត៌មាន​ជាក់លាក់​ណា​មួយ​ដែល​សារព័ត៌មាន​នេះ​បាន​ផ្សព្វផ្សាយ ដែល​ជា​បុព្វហេតុ​នៃ​ការ​ដក​អាជ្ញាបណ្ណ​នេះ​ទេ។

VOA មិនអាចសុំការអត្ថាធិប្បាយពីលោក សុខ ឧត្តម ម្ចាស់អាជ្ញាបណ្ណបាននៅឡើយទេ នៅថ្ងៃពុធនេះ។

ទំព័រហ្វេសប៊ុករបស់សារព័ត៌មាន រិទ្ធិសែន ដែលផ្សាយផ្ទាល់នៅថ្ងៃទី១៣ ខែឧសភា បង្ហាញពីការពិភាក្សាមួយនិយាយអំពី «ចៅក្រមសាលាដំបូងខេត្តកំពង់ឆ្នាំងស្រាវជ្រាវឲ្យដល់ឬសគល់ក្នុងសំណុំរឿងព្រហ្មទណ្ឌលេខ៤៩៤ ចុះថ្ងៃទី១៣ ខែកក្កដា ឆ្នាំ ២០១៩ តើភាគីខាងណាជាអ្នកល្មើសឲ្យប្រាកដ»។

ចំណែក​ព័ត៌មាន​ផ្សេងៗ​ដែល​ពួកគេ​បាន​ផ្សាយ​កន្លង​ទៅ ដូច​ជា«សំណង់​ខុស​ច្បាប់​របស់​ជនជាតិ​វៀតណាម​សង់​រួច ៧០% ចំ​កណ្ដាល​ក្រុង​កំពង់ឆ្នាំង ស​ង់ចំ​ពី​លើ​ស្ពានថ្ម​ពីផ្សារលើទៅផ្សារក្រោម​ស្ថិត​នៅ​ភូមិ​ផ្សារ​លើ​ឃុំ​ផ្សារ​ឆ្នាំង​ក្រុង​កំពង់​ឆ្នាំង។ អាជ្ញាធរ​ខេត្ត​និង​ប្រធាន​មន្ទីរ​ដែនដី​ខេត្ត​កំពង់ឆ្នាំង​ធ្វើ​មិន​ដឹង»។

លោក ម៉ម ឈឿម ប្រធាន​មន្ទីរព័ត៌មាន​ខេត្ត​កំពង់ឆ្នាំង បាន​ថ្លែង​ប្រាប់​ VOA នៅ​ថ្ងៃ​ពុធ​ថា កន្លង​ទៅ មន្រ្តី​ខាង​មន្ទីរ​ធ្លាប់​ហៅ​ម្ចាស់​វិទ្យុ​នោះ​មក​ណែនាំ​អំពី «​ការ​ប្រើប្រាស់​ពាក្យ​ពេចន៍» ដែល​លោកថា «អសីលធម៌​» ដែល​ភាគ​ច្រើន​ជា​ការ​ផ្សព្វផ្សាយ​នៅ​លើ​បណ្តាញ​សង្គម​ហ្វេសប៊ុក​របស់​វិទ្យុ​រិទ្ធិសែន។ ប៉ុន្តែ​លោក​ថា ​លោក​មិន​បាន​ស្នើ​ឲ្យ​បិទ​វិទ្យុ​នេះ​ទៅ​ក្រសួង​ព័ត៌មាន​នោះ​ទេ។

លោក​បញ្ជាក់​ថា៖ «កន្លង​មក​យើង​ធ្លាប់​បាន​ហៅ​ណែនាំ​ដែរ​តើ​អំពី​គាត់​ប្រើ​ពាក្យ​អសុរោះ ខ្ញុំ​បាន​ហៅ​មក​ដែរ ណែនាំ​គាត់​ដែរ នៅ​ក្នុង​គេហ​ទំព័រ ក៏​ដូ​ច​ជា​ព័ត៌មាន យើង​បាន​ប្រាប់​គាត់​ដែរ។ ហើយ​ក៏​បាន​ឲ្យ​ជំនាញ ហៅ​គាត់​មក​ណែនាំ​ដែរ មិន​មែន​អត់​ទេ។ លោក​មិន​អាច​បញ្ជាក់​ប្រាប់​ថា ​ពាក្យ​អសីលធម៌នោះ​មាន​អ្វី​ខ្លះ​នោះ​ទេ ដោយ​លោកឲ្យមើលការ​ផ្សព្វផ្សាយ​តាមហ្វេសប៊ុក​របស់​គេហទំព័រនោះ។

កាលពី​ខែ​មេសា រដ្ឋមន្ត្រី​ក្រសួង​ព័ត៌មាន​លោក ខៀវ កាញារីទ្ធ បានសម្រេចលុប​ចោល​អាជ្ញាបណ្ណ​ដែល​ផ្តល់​ឲ្យ​លោក សុវណ្ណ សុខា បើកដំណើរ​ការផ្សាយ​គេហ ទំព័រ www.tvfb.com.kh និង​គេហទំព័រ www.tvfb.news ក្រោម​ហេតុផល​ថា «ម្ចាស់អាជ្ញាបណ្ណ​បានផ្សព្វផ្សាយ​ព័ត៌មាន​ដែលមាន​ចរិត​ញុះញង់​បង្កឲ្យប៉ះពាល់​ដល់សន្តិសុខ​សណ្តាប់ធ្នាប់​ និង​សុវត្ថិភាព​សង្គម»។

ការ​ដក​អាជ្ញាបណ្ណ​ពេល​នោះ ធ្វើ​ឡើង​ក្រោយ​ពី​លោក សុវណ្ណ រិទ្ធី ជា​និពន្ធ​នាយក ត្រូវបាន​ចាប់ខ្លួន ពាក់ព័ន្ធ​នឹង​ការ​បង្ហោះ​ព័ត៌មាន ​ដោយ​ដក​ស្រង់​សារ​របស់​លោក​នាយក​រដ្ឋមន្ត្រី ហ៊ុន សែន៕​

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG