មន្ត្រីកំពូលពីរនាក់នៅប៉ែកខាងត្បូងប្រទេស អាហ្វហ្គានីស្ថាន ដោយរួមទាំងមេបញ្ជាការប៉ូលិសដ៏មានអំណាចម្នាក់ផងគឺលោកឧត្តមសេនីយ៍ Abdul Raziq ត្រូវបានសម្លាប់នៅក្នុងហេតុការណ៍បាញ់ប្រហារមួយ ក្នុងអំឡុងពេលនៃទស្សនកិច្ចរបស់មេបញ្ជាការអាមេរិកកំពូលម្នាក់នៅក្នុងប្រទេសអាហ្វហ្គានីស្ថាន។
ឧត្តមសេនីយ៍អាមេរិក លោក Scott Miller មិនបានរងរបួសអ្វីនោះទេ។ លោកកំពុងតែធ្វើទស្សនកិច្ចទៅជួបលោកអភិបាលក្រុង Kandahar និងមន្ត្រីថ្នាក់ខេត្តដទៃទៀត។ បណ្តាញព័ត៌មានក្នុងស្រុកបានឲ្យដឹងថា អ្នកចូលរួមក្នុងកិច្ចប្រជុំនោះនាំគ្នាធ្វើដំណើរទៅកន្លែងចតឧទ្ធម្ភាគចក្រមួយ បន្ទាប់ពីកិច្ចប្រជុំនោះបានបញ្ចប់ ហើយភ្លាមៗនោះការវាយប្រហារក៏បានកើតឡើង។
ក្រៅពីលោក Raziq ដែលបានរស់រានមានជីវិតពីការវាយប្រហាររបស់ក្រុមតាលីបង់ប៉ុន្មានលើកមកហើយ ការវាយប្រហារកាលពីថ្ងៃព្រហស្បតិ៍នេះ ក៏បានសម្លាប់នាយកទីភ្នាក់ងារស៊ើបការសម្ងាត់ថ្នាក់ខេត្តម្នាក់និងធ្វើឲ្យអភិបាលក្រុង Kandahar របួសធ្ងន់ផងដែរ។ ជនជាតិអាមេរិកាំងពីរនាក់បានរងរបួស។
ក្រុមតាលីបង់បានអះអាងទទួលខុសត្រូវលើការវាយប្រហារនេះ ដោយនិយាយថា ជនបង្កប់បានធ្វើការវាយប្រហារសំដៅទៅលើលោក Raziq និងឧត្តមសេនីយ៍អាមេរិករូបនេះ។
លោក Dave Butler អ្នកនាំពាក្យយោធាអាមេរិកបាននិយាយថា ជនជាតិអាមេរិកាំងដែលរងរបួស«ត្រូវបានបញ្ជូនទៅព្យាបាលនិងមានស្ថានភាពសុខភាពនឹងនរទេ»។ លោកបានបន្ថែមទៀតថា ជនដៃដល់បានស្លាប់ ហើយកន្លែងកើតហេតុមានសុវត្ថិភាពវិញហើយ៕
