ភ្ជាប់​ទៅ​គេហទំព័រ​ទាក់ទង

ប្រជា​ពល​រដ្ឋ​ឥណ្ឌូនេស៊ី​ត្រូវ​បាន​ជម្លៀស​ចេញ​ពី​ទី​ក្រុង​ឡឺគែរ

  • Brian Padden
  • VOA

ពលរដ្ឋ​ឥណ្ឌូនេស៊ី​ ដែល​ត្រូវ​បាន​ជម្លៀស​ចេញ​ពី​ប្រទេស​អេហ្ស៊ីប បាន​មក​ដល់​អាកាសយានដ្ឋាន​ Sukarno-Hatta នៅ​ទី​ក្រុង​ហ្សាការតា កាល​ពី​ថ្ងៃ​ទី​២​ខែ​កុម្ភៈ​ឆ្នាំ​២០១១។

ប្រជាពល​រដ្ឋ​ឥណ្ឌូនេស៊ី​បាន​ចាក​ចេញ​ជា​បណ្តើរ​ប្រទេស​អេហ្ស៊ីប ដោយសារ​ភាព​វឹកវរ​នៅ​ក្នុង​ទីក្រុង​គែរ។ មជ្ឈមណ្ឌល​សម្រង់​បញ្ជី​ក្រុង​ហ្សាការតា​ សម្រាប់​អ្នក​ធម្មយាត្រា​ ដែល​ធ្វើ​ដំណើរ​ទៅ​ទី​ក្រុង​ម៉េក្កា​ បាន​ក្លាយ​ជា​កន្លែង​ជួបជុំ​សម្រាប់​ជនជាតិ​ឥណ្ឌូនេស៊ី​ដែល​គេ​ជម្លៀស​ចេញ​ពីទី​ក្រុង​ឡឺគែរ។​ ជនជាតិ​ឥណ្ឌូនេស៊ី​ជាង​៦​ពាន់​នាក់​ រស់នៅ​ នៅ​ក្នុង​ប្រទេស​ អេហ្ស៊ីប។

លោក​ តូហ៊ីរូដឌីន​ លូប៊ីស​ ដែល​បាន​រស់​នៅ​ក្នុង​ប្រទេស​ អេហ្ស៊ីប​ជា​មួយ​ភរិយា​និង​កូន​បី​នាក់​អស់​រយៈ​១៥​ឆ្នាំ​កន្លង​មក​នេះ​ ជា​អ្នក​នៅ​ក្នុង​ចំណោម​ក្រុម​ទីមួយ​នៃ​ជន​ជម្លៀស ជាតិ​ឥណ្ឌូនេស៊ី​៤០០​នាក់​ដែល​បាន​មក​ដល់​ទី​ក្រុង​ហ្សាកាតា។​ លោក​និយាយ​ថា ​រឿង​សុវត្ថិភាព​ឬ​សន្តិសុខ​មិន​មែន​ជា​មូល​ហេតុ​ដែល​បណ្តោយ​ឲ្យ​លោក​ចាក​ចេញ​ទេ។ លោក តូហ៊ីរូដឌីន​ លូប៊ីស​និយាយ​ថា៖

«បញ្ហា​ គឺ​ម្ហូប​អាហារ​ដែល​បាន​ឡើង​ថ្លៃ​ខ្លាំង​ ជា​ហេតុ​ឲ្យ​នាំ​គាត់​ចាក​ចេញ។​ ទោះ​បី​មនុស្ស​មាន​ប្រាក់​ ក៏​គ្មាន​អ្នកណា​ម្នាក់​លក់​ម្ហូប​ដែរ»។

រដ្ឋាភិបាល​ឥណ្ឌូនេស៊ី​ដាក់​កង​សមត្ថកិច្ច​មួយ​ ដើម្បី​ជួយ​ដល់​ពលរដ្ឋ​របស់​ខ្លួន​ដែល​កំពុង​រស់​នៅ​ក្នុង​ប្រទេស​អេហ្ស៊ីប​ ណា​ដែល​ចង់​វិល​ត្រឡប់​ទៅ​ប្រទេស​កំណើត​វិញ​ ដោយសារ​ភាព​វឹកវរ​នយោបាយ និង​បាតុកម្ម​ដែល​មាន​បន្ត។​ យន្តហោះ​ពីរ​គ្រឿង​ត្រូវ​បាន​បញ្ជូន​ទៅ​ទីក្រុង​ឡឺគែរ​ជាស្រេច។

លោក​ តឹគូ​ ហ្វេហ្សាយ៉ាហ៍​ អ្នក​ជំនួយការ​ពិសេស​នៃ​លោក​ប្រធានាធិបតី​ស៊ូស៊ីឡូ​បាមបាំង​យូដូយ៉ូណូ​ និយាយ​ថា​ អ្វី​ដែល​ត្រូវ​ធ្វើ​មុន​គេ​បង្អស់​ គឺ​ជួយ​អ្នក​ដែល​ងាយ​រងគ្រោះ។

«អ្វី​ដែល​យើង​ព្យាយាម​ធ្វើ​គឺ​នាំ​ត្រឡប់​មក​ប្រទេស​វិញ​នូវ​មនុស្ស​ដែល​ងាយ​រងគ្រោះ​ ជា​ពិសេសស្ត្រី និង​កុមារ​ និង​អ្នក​ដែល​នៅ​ក្នុង​កាលៈទេសៈ​ពិសេស​ និង​មាន​អារម្មណ៍​មិន​កក់​ក្តៅ​ក្នុង​ការរស់នៅ​ក្នុង​ទី​ក្រុង​ឡឺគែរ​ តទៅ​ទៀត​ និង​អ្នក​នៅ​ក្នុង​តំបន់​ឡោមព័ទ្ធ»។

លោក​ហ្វេហ្សាយ៉ាហ៍​ និយាយ​ថា ការ​ស្ទះ​ចរាចរ​ ការ​រាំង​ផ្លូវ និង​សូម្បី​តែ​ការ​ស្វែង​រក​យាន​ជំនិះ​ដើម្បី​ដឹក​ជញ្ជូន​មនុស្ស​ទៅ​ចំណត​យន្តហោះ​ នៅ​ក្នុង​ទី​ក្រុង​ឡឺគែរ​ ក៏​ជា​ការ​លំបាក​ខ្លះ​ដែរសម្រាប់​កិច្ចការ​ជម្លៀស​ចេញ។

រដ្ឋាភិបាល​នានា​នៅ​ពាសពេញ​ពិភព​លោក​កំពុង​ខ្នះខ្នែង​ជម្លៀស​ពលរដ្ឋ​ខ្លួន​ចេញ​ពី​ទី​ក្រុង​ ឡឺគែរ​ រួម​មាន​ទាំង​ប្រទេស​ចិន និង​ប្រទេស​ថៃ។​ បុគ្គលិក​ការបរទេស​ និង​ទេសចរណ៍​រាប់​ពាន់​នាក់​ បាន​ភៀស​ខ្លួន​ចេញ​ពី​ប្រទេស​នៅ​ក្នុង​ប៉ុន្មាន​ថ្ងៃ​ថ្មីៗ​នេះ៕

ប្រែ​សម្រួល​ដោយ​ នុច សារីតា

XS
SM
MD
LG