ឥណ្ឌូណេស៊ី៖ ភូមិមួយចំនួននៅប្រទេសឥណ្ឌូណេស៊ីចង់បដិសេធជំនួយអន្តរជាតិរាប់លានដុល្លារ ដើម្បីចាត់ចែងគម្រោងអភិរក្សព្រៃឈើនៅក្បែរផ្ទះរបស់ពួកគេ។ ពួកគេបារម្ភថា កិច្ចខិតខំប្រឹងប្រែងបញ្ចប់ការកាប់ឈើនឹងទប់ស្កាត់សហគមន៍របស់គេពីការប្រើប្រាស់ដីសម្រាប់ការចិញ្ចឹមជីវិត ដែលពួកគេមានរាប់ជំនាន់មកហើយ។ Angela Dewan ធ្វើដំណើរទៅខេត្តJambi នៅលើកោះស៊ូម៉ាត្រា ជាទីដែលរដ្ឋាភិបាលអូស្រ្តាលីប្តេជ្ញាផ្តល់ប្រាក់ចំនួន២៦លានដុល្លារ ដើម្បីបង្កើតគម្រោងអភិរក្សនេះ។
ស្ត្រី១០នាក់អង្គុយជារង្វង់នៅលើដីក្បែរខ្ទមជញ្ជាំងឈើមួយ កំពុងប្រើត្បាល់ និងអង្រែបុកខ្ញី និងខ្ទឹមស។ គេកំពុងជួយអ្នកភូមិផងរបងជាមួយម្នាក់រៀបចំពិធីរៀបអាពាហ៍ពិពាហ៍កូនរបស់គាត់នៅក្នុងភូមិ។
ណ័រឌា (Nordia) អាយុ៣៣ឆ្នាំ និយាយថា គាត់អាចជួយអ្នកជិតខាងគាត់ ពីព្រោះគាត់មិនធ្វើការទេថ្ងៃនេះ។ កាលពីម្សិលមិញ គាត់ប្រមូលជ័រពីដើមកៅស៊ូនៅក្នុងព្រៃបានគ្រប់គ្រាន់សម្រាប់លក់នៅផ្សារហើយ។ លុយនោះអាចគ្រប់គ្រាន់សម្រាប់គ្រួសារគាត់មួយសប្តាហ៍។
គាត់និយាយថា សហគមន៍ត្រូវការព្រៃឈើដើម្បីរស់ និងសម្រាប់ស្ថាបនាលំនៅដ្ឋាន។ គាត់បន្តទៀតថា គេត្រូវការស្លឹកឈើ និងធនធានផ្សេងៗទៀតពីឈើ ព្រមទាំងដីសម្រាប់ប្រកបរបរកសិកម្ម។
នេះគឺលូប៊ូក ប៊័រីងីន (Lubuk Beringin) ជាភូមិទន្លេមួយ ដែលមានមនុស្សចំនួន៦០០នាក់នៅក្នុងខេត្តចាមប៊ី (Jambi) នៅកោះស៊ូម៉ាត្រា (Sumatra) នៃប្រទេសឥណ្ឌូណេស៊ី។ ខ្ទមតូចៗទាំងអស់នៅទីនេះសុទ្ធតែធ្វើពីឈើដែលកាប់ពីព្រៃ ហើយភូមិនេះត្រូវបានទទួលថាមពលពីទន្លេ និងប្រើរហាត់ទឹកតូចមួយ។
ប៉ុន្តែរបៀបរស់នៅជាប្រពៃណីរបស់សហគមន៍នេះ ត្រូវបានគម្រាមកំហែងដោយការកាប់បំផ្លាញព្រៃឈើ និងការអភិវឌ្ឍ។ ខេត្តចាមប៊ី បានបាត់បង់ព្រៃបឋមរបស់ខ្លួនចំនួន២ភាគ៣ ភាគច្រើនដោយសារការកាប់ឈើខុសច្បាប់ និងការរានយកដីសម្រាប់ចម្ការដូងប្រេង។
អ្វីដែលកំពុងកើតឡើងនៅខេត្តចាមប៊ី ជាផ្នែកមួយនៃការព្រួយបារម្ភផ្នែកបរិស្ថានជាតិ និងអន្តរជាតិដែលកំពុងកើនឡើង។ យោងតាមអង្គការបរិស្ថានអន្តរជាតិហ្គ្រីនភីស (Greenpeace) ប្រទេសឥណ្ឌូណេស៊ីមានអត្រានៃការកាប់បំផ្លាញព្រៃឈើរហ័សជាងគេនៅក្នុងពិភពលោក ដោយបាត់បង់៥១គីឡូម៉ែត្រការ៉េជារៀងរាល់ថ្ងៃ។ ការដុតព្រៃក៏មានចំណែកក្នុងការធ្វើឲ្យប្រទេសឥណ្ឌូណេស៊ីក្លាយជាប្រទេស ដែលបញ្ចេញឧស្ម័នផ្ទះកញ្ចក់ធំជាងគេទីបីនៅក្នុងពិភពលោក។
គម្រោងមួយដែលត្រូវបានចាត់ចែងដោយប្រទេសអូស្រា្តលីក្រោមកម្មវិធីគាំទ្រដោយអង្គការសហប្រជាជាតិហៅថា ការកាត់បន្ថយការបញ្ចេញឧស្ម័នពីការកាប់បំផ្លាញ និងការរិចរិលព្រៃឈើ ឬហៅកាត់ថា REDD ដែលក្នុងគម្រោងនោះប្រទេសជឿនលឿន អាចនឹងធ្វើសមតុល្យាភាពការបញ្ចេញជាតិកាបោនរបស់គេ ដោយចំណាយលុយទៅឲ្យប្រទេសក្រីក្រដើម្បីការពារព្រៃឈើរបស់គេ។ ស្រុកមើរ៉ាងីន (Meragnin) គឺជាការដ្ឋានមួយក្នុងចំណោមការដ្ឋានចំនួនប្រាំ ដែលរដ្ឋាភិបាលអូស្រ្តាលី កំពុងធ្វើការស្ទង់មតិសម្រាប់គម្រោងREDD។
នេះគឺភូមិ លូប៊ូកប៊ើរីងីន ភាគច្រើននៃប្រជាពលរដ្ឋនៅទីនេះមិនដឹងថា ព្រៃរបស់គេនឹងក្លាយជាការដ្ឋានគម្រោងប្រកបដោយសក្តានុពលមួយនោះទេ។
ណេល ស្កត់លែនដ៍ (Neil Scotland) ដែលជានាយកគម្រោងមកពីអង្គការភាពជាដៃគូកាបោនព្រៃឈើឥណ្ឌូណេស៊ី អូស្រាលី មានប្រសាសន៍ថា កម្មវិធីស្ថិតក្នុងជំហានដំបូងរបស់ខ្លួននៅឡើយ។ គាត់ធានាថា សហគមន៍នឹងត្រូវបានសុំប្រឹក្សាយោបល់។
«អ្វីដែលយើងស្នើសុំធ្វើនៅចាមប៊ី គឺចាប់ផ្តើមដំណើរការសុំប្រឹក្សាទូលំទូលាយមួយ ដោយពិនិត្យមើលថា តើយើងអាចផ្តល់ការគាំទ្រដល់តម្រូវការដែលមានស្រាប់ដោយវិធីណា។ សេចក្តីប្រាថ្នា និងតម្រូវការប្រជាពលរដ្ឋមូលដ្ឋាន អំពីមធ្យោបាយក្នុងការគ្រប់គ្រងព្រៃឈើ និងធនធានព្រៃឈើ ហើយធានាថា REDD អនុវត្តទៅតាមសេចក្តីត្រូវការរបស់ពួកគេ»។
ប៉ុន្តែ ណ័រឌា ដូចមនុស្សជាច្រើននៅក្នុងភូមិរបស់គាត់ដែរ មិនត្រូវការលុយ ឬការជ្រៀតជ្រែកពីរដ្ឋាភិបាលទេ។
គាត់និយាយថា ភូមិរបស់គាត់មិនចង់ឲ្យអូស្រ្តាលីការពារព្រៃឈើទេ ពីព្រោះសហគមន៍មានសិទ្ធិប្រើប្រាស់វា។ គាត់និយាយថា ព្រៃឈើនេះគឺសម្រាប់ភូមិលូប៊ូក ប៊ើរីងីន។
ដើម្បីមានលទ្ធភាពទទួលសិទ្ធិកាន់កាប់ដី ភូមិលូប៊ូក ប៊ើរីងីន និងភូមិជិតខាងពីរទៀតបានចរចារបញ្ចុះបញ្ចូលក្រសួងរុក្ខាកម្មផ្តល់សញ្ញាកម្មថា តំបន់នេះគឺជាព្រៃភូមិមួយ។ វិធានការនេះនឹងធ្វើឲ្យក្រុមហ៊ុនមិនអាចប៉ះពាល់ដីនោះរយៈពេល៣៥ឆ្នាំ។
កាលពីឆ្នាំកន្លងទៅ ក្រោយពីសម្បទានក្រុមហ៊ុនរយៈពេលដ៏វែងចំនួន២០ឆ្នាំ ក្នុងការកាន់កាប់ដី ត្រូវផុតកំណត់ ភូមិលូប៊ូ ប៊ើរីងីន និងភូមិជិតខាងពីរផ្សេងទៀតអនុម័តច្បាប់ក្នុងស្រុក ចែកលក្ខខណ្ឌអំពីថាតើអ្វី និងចំនួនប៉ុន្មានដែលនឹងត្រូវទាញយកពីព្រៃឈើ។ អ្នកដឹកនាំមូលដ្ឋានបានផ្តល់ជាសញ្ញាដល់ដើមឈើ ដើម្បីរំឭកប្រជាពលរដ្ឋអំពីរបៀបធ្វើឲ្យព្រៃឈើមាននិរន្តរភាព។
អ្នកដឹកនាំផ្សេងទៀតបើកចំហដល់ជំនួយអន្តរជាតិ។ អៃឌីល ភុត្រា (Aidil Putra) ដែលជាប្រធានសហជីពកសិករចាមប៊ី និយាយថា សហគមន៍របស់លោកនឹងទទួលស្វាគមន៍អន្តរាគមន៍អន្តរជាតិ ប្រសិនបើវាជួយទប់ស្កាត់ អភិរក្សព្រៃឈើពីការប្រើប្រាស់ពាណិជ្ជកម្មខា្នតធំ។
លោកមានប្រសាសន៍ថា ប្រសិនបើប្រជាពលរដ្ឋនៃខេត្តចាមប៊ី យល់ព្រមនឹងគម្រោងកម្មវិធីជាមួយប្រទេសអូស្ត្រាលីនោះអូស្រា្តលីអាចជួយគេការពារដីរបស់គេប្រឆាំងនឹងក្រុមហ៊ុន។
ខណៈដែលអនាគតនៃព្រៃមើរ៉ាងីន ស្ថិតនៅក្នុងតំបន់រហោឋាន ការផ្អាកបណ្តោះអាសន្ននៃសម្បទានព្រៃឈើថ្មីនៅក្នុងប្រទេសឥណ្ឌូណេស៊ីរយៈពេលពីរឆ្នាំ ផ្តល់ពេលតិចតួចដល់សហគមន៍មួយនេះ។
ការផ្អាកនេះត្រូវបានប្រកាសនៅខែឧសភា ដោយប្រធានាធិបតីស៊ុស៊ីឡូ បាមបាង យូដូយ៉ូណូ (Susilo Bambang Yudhoyono) នៅក្នុងកិច្ចព្រមព្រៀងកម្មវិធីរបស់ REDD ដែលមានតម្លៃ១ពាន់លានដុល្លារ ជាមួយប្រទេសណ័រវ៉េ ដែលបានសន្យាផ្តល់ប្រាក់ដើម្បីចេញថ្លៃការបញ្ចេញឱស្ម័នកាបោនរបស់ខ្លួន។ ការផ្អាកបណ្តោះអាសន្ននេះត្រូវបានរំពឹងថា ចាប់ផ្តើមនៅឆ្នាំក្រោយ ប៉ុន្តែក្រុមហ៊ុនដែលមានការអនុញ្ញាតស្រាប់អាចបន្តកាប់ឈើ ដូចធម្មតាបាន៕
ប្រែសម្រួលដោយ អ៊ឹម សុធារិទ្ធ។
