ភ្ជាប់​ទៅ​គេហទំព័រ​ទាក់ទង

នាយក​រដ្ឋមន្ត្រី​ឥណ្ឌា​បដិសេធ​ការចោទប្រកាន់​លើ​ការទិញ​សន្លឹកឆ្នោត


លោក​នាយក​រដ្ឋមន្ត្រី​ ម៉ាន់ម៉ូហាន់​ ស៊ីង​ នៃ​ប្រទេស​ឥណ្ឌា

នាយក​រដ្ឋមន្ត្រី​ប្រទេស​ឥណ្ឌា​ បាន​បដិសេធ​ការចោទ​ប្រកាន់​ទាំងឡាយ​ដែល​ថា​រដ្ឋាភិបាល​ដឹកនាំ​ដោយ​គណបក្ស​ Congress​ Party​ របស់​លោក​ បាន​សូកប៉ាន់​ក្រុម​អ្នក​តាក់តែង​ច្បាប់​ ដើម្បីធ្វើ​ឲ្យឈ្នះក្នុង​ការ​បោះឆ្នោត​លើ​សេចក្តី​ទុកចិត្ត​មួយ​ នៅ​ក្នុង​ឆ្នាំ​២០០៨។​ ការចោទ​ប្រកាន់​នេះ​ដែល​យោង​តាម​សារ​ទូរលេខ​ Wikileaks​ មួយ​ បាន​បង្កើន​ការប្រឆាំង​ជំទាស់​យ៉ាង​ខ្លាំង​ពី​ក្រុម​គណបក្ស​ប្រឆាំង​ និង​ការទាមទារ​ឲ្យ​មាន​ការចុះចេញ​ពី​តំណែង​របស់​រដ្ឋាភិបាល។

លោក​នាយក​រដ្ឋមន្ត្រី​ ម៉ាន់ម៉ូហាន់​ ស៊ីង​ បាន​ប្រាប់​សភា​កាលពី​ថ្ងៃ​សុក្រ​ថា​ រដ្ឋាភិបាល​របស់​លោក​មិន​បាន​ជាប់​ទាក់ទង​នៅ​ក្នុង​ការសូកប៉ាន់​ដល់​ក្រុម​អ្នក​តាក់តែងច្បាប់​ដើម្បី​ធានា​ការ​គាំទ្រ​របស់​ពួកគេ​សម្រាប់​ការ​បោះឆ្នោត​លើ​សេចក្តីទុកចិត្ត​មួយ​ ដែល​រដ្ឋាភិបាល​លោក​ ស៊ីង​ បាន​ឈ្នះ​យ៉ាង​ប្រកិតៗ​ នៅ​កំឡុង​នៃ​អាណត្តិ​ពីមុន​របស់​ខ្លួន​ ក្នុង​ឆ្នាំ​២០០៨។

«ខ្ញុំ​ចង់​បញ្ជាក់​ឲ្យ​ច្បាស់​ ថា​គ្មាន​អ្នក​ណា​ម្នាក់​ពី​ខាង​គណបក្ស​ Congress Party​ ឬពី​ខាង​រដ្ឋាភិបាល​ បាន​ប្រព្រឹត្ត​នូវ​អំពើ​មិន​ស្រប​ច្បាប់​ណា​មួយ​ នៅ​ក្នុងអំឡុង​ការបោះឆ្នោត​លើ​សេចក្តី​ទុកចិត្ត​ ក្នុង​ខែ​កក្កដា​ឆ្នាំ​២០០៨​នោះ​ទេ»។

ការបោះឆ្នោត​លើ​សេចក្តី​ទុកចិត្ត​នោះ​ ត្រូវ​បាន​ស្នើ​ឡើង​បន្ទាប់​ពី​គណបក្ស​នយោបាយ​ឆ្វេង​និយម​ដែល​ជា​សម្ព័ន្ធមិត្ត​របស់​រដ្ឋាភិបាល​ បាន​ដក​ការគាំទ្រ​ចំពោះ​កិច្ច​ព្រមព្រៀង​នុយក្លេអ៊ែ​ស៊ីវិល​មួយ​ ជាមួយ​នឹង​សហរដ្ឋ​អាមេរិក។

ការចោទ​ប្រកាន់​ថា​រដ្ឋាភិបាល​បាន​ឈ្នះ​ដោយសារ​ទិញ​សន្លឹកឆ្នោត​នោះ​ បាន​បែក​ចេញ ដោយ​សារ​ សារ​ទូរលេខ​ Wikileaks​ មួយ​ ដែល​បាន​និយាយ​ថា​ អ្នក​ការទូត​អាមេរិកាំង​ម្នាក់​បាន​ត្រូវ​គេ​បង្ហាញ​នូវហិប​ប្រាក់ពីរ​ ដោយ​អ្នក​ជំនួយការ​ម្នាក់​នៃ​មន្ត្រី​ជាន់ខ្ពស់​របស់​គណបក្ស​ Congress Party។​ ប្រាក់នោះ​ទំនង​ត្រូវ​កំណត់​ទុក​សម្រាប់​ជូន​ដល់​ អ្នក​តាក់តែង​ច្បាប់​បួនរូប​ ដែល​ត្រូវ​បាន​ទទួល​ជាងពីរលាន​ដុល្លារ​ក្នុង​ម្នាក់ៗ​ សម្រាប់​ការ​គាំទ្រ​របស់​ពួកគេ​នៅ​ក្នុង​ការ​បោះឆ្នោតសេចក្តី​ទុកចិត្ត។

មន្ត្រី​នៃ​គណបក្ស​ Congress Party​ អ្នក​ជំនួយការ​របស់​លោក​ និង​ក្រុម​អ្នកតាក់តែង​ច្បាប់​បាន​បដិសេធ​ការចោទ​ប្រកាន់​នោះ។

លោក​នាយក​រដ្ឋមន្ត្រី​ ស៊ីង​ បាន​បញ្ជាក់​ថា​គណៈកម្មាធិការ​មួយ​ដែល​បាន​ស៊ើបអង្កេត​ការចោទ​ប្រកាន់​ទាំងឡាយ​អំពី​ការសូកប៉ាន់​ក្រោយ​ពេល​បោះឆ្នោត​ បាន​រកឃើញ​ភស្តុតាង​មិន​គ្រប់គ្រាន់​ដើម្បី​អាច​សន្និដ្ឋាន​ថា​មាន​ ការសូកប៉ាន់​នោះ។

លោក​ ស៊ីង​បាន​សម្តែង​ការខកចិត្ត​ថា​ គេ​បាន​ជឿ​លើ​សារទូរលេខ​ Wikileaks មួយ​នោះ។

ប្រែសម្រួល​ដោយ​ នុច សារីតា

XS
SM
MD
LG