នៅក្នុងប្រទេសឥណ្ឌា រដ្ឋាភិបាលបានទទួលរងភាពអាមាសដ៏ធំមួយទៀត ដោយតុលាការកំពូលលុបចោលការតែងតាំងដ៏ចម្រូងចម្រាសនូវនាយកប្រឆាំងអំពើពុករលួយក្នុងរដ្ឋាភិបាលកណ្តាល។
ការច្រានចោលការតែងតាំងលោក ភី. ជេ. ថូម៉ាស (P.J. Thomas) ចេញពីតំណែងជាស្នងការតាមដានអំពើពុករលួយកាលពីថ្ងៃព្រហស្បតិ៍នោះ តុលាការកំពូលបានឲ្យដឹងថា ការតែងតាំងនោះបានធ្វើឡើងដោយគ្មានចាប់អារម្មណ៍ថាលោក Thomas ខ្លួនឯងប្រឈមនឹងការចោទប្រកាន់ពីបទប្រព្រឹត្តអំពើពុករលួយទេ។
លោក Thomasបានលាលែងពីតំណែងបន្ទាប់ពីតុលាការកំពូលបានប្រកាសនូវសេចក្តីសម្រេចចិត្តរបស់ខ្ឡួន។
តុលាការកំពូលបានឲ្យដឹងថា វាជាការណ៍សំខាន់ដែលអង្គការចាំឃ្លាំមើលការប្រឆាំងអំពើពុករលួយគួរតែបានដឹកនាំដោយមនុស្សម្នាក់សុចរិតគ្មានកំហុសដែលអាចបំពេញការងារជា «ស្ថាប័នចម្បងសម្រាប់ប្រឆាំងអំពើពុករលួយនៅក្នុងប្រទេស» មួយ។
លោក Prashant Bhushan ជាមេធាវីម្នាក់ដែលបានដាក់ពាក្យបណ្តឹងទៅតុលាការកំពូលប្រឆាំងនឹងការតែងតាំងលោកថូម៉ាស។
«តុលាការបានបញ្ជាក់ពីចំណុចសំខាន់នៃការមានស្ថាប័នឯករាជ្យ ខ្លាំង និងមានសមត្ថភាព ដើម្បីប្រយុទ្ធប្រឆាំងនឹងអំពើពុករលួយ។ តុលាការបាននិយាយថា នេះជាការណ៍សំខាន់ និងចាំបាច់ខ្លាំងណាស់ នៅក្នុងស្ថានការណ៍បច្ចុប្បន្នក្នុងប្រទេសនេះ»។
មានការខឹងសម្បារដ៏ខ្លាំងមួយលើការតែងតាំង លោក Thomas កាលពីឆ្នាំមុន ជានាយកអង្គការឃ្លាំមើលការប្រឆាំងអំពើពុករលួយដ៏សំខាន់បំផុតរបស់ប្រទេស។
លោក Thomas ត្រូវបានចោទប្រកាន់ពីមុខនាទីរបស់លោកនៅក្នុងការនាំចូលប្រេងឆាក្នុងឆ្នាំ១៩៩២ នៅក្នុងរដ្ឋ Kerala នៅពេលនោះលោកជាមន្ត្រីរបស់រដ្ឋ។ តាមការចោទប្រកាន់ ប្រេងឆានោះត្រូវបានទិញពីប្រទេសម៉ាឡេស៊ីក្នុងតម្លៃខ្ពស់។ លោក Thomas ប្រកែកថាមិនបានធ្វើខុសទេ។
ប៉ុន្តែក្រុមគណបក្សប្រឆាំងនិយាយថា មនុស្សម្នាក់ប្រឈមនឹងការចោទប្រកាន់អំពើពុករលួយមិនសមរម្យនឹងឲ្យធ្វើការស៊ើបអង្កេតរឿងអាស្រូវអំពើពុករលួយធំៗខ្លះដែលប្រទេសនេះបានជួបប្រទះនោះទេ។ ទាំងអស់នេះរួមមានការប្រគល់កិច្ចសន្យារៀបចំការប្រកួតកីឡា Commonwealth កាលពីឆ្នាំមុន ការលក់វិសាលគមនៃទូរគមនាគមន៍ ទៅឲ្យក្រុមហ៊ុននានាក្នុងតម្លៃថោក និងគ្រោងការទុច្ចរិតមួយដែលពាក់ព័ន្ធនឹងគម្រោងសង់ទីលំនៅសម្រាប់ស្ត្រីមេម៉ាយដោយសារស្វាមីពលីជីវិតក្នុងសង្គ្រាម។
រដ្ឋាភិបាលបានការពារការសម្រេចចិត្តរបស់ខ្លួនក្នុងការតែងតាំងលោក Thomas ដោយនិយាយថា រដ្ឋាភិបាលមិនបានដឹងពីការចោទប្រកាន់ប្រឆាំង លោក Thomasទេ។
មេដឹកនាំគណបក្សប្រឆាំង Bharatiya Janata Party លោក Arun Jaitley បានប្រាប់ សភាថា រដ្ឋាភិបាលត្រូវតែពន្យល់ដល់ប្រទេសជាតិ ថាតើរដ្ឋាភិបាលបានជ្រើសរើសលោក Thomas ដោយរបៀបណា។
«នៅក្នុងន័យមួយវាបញ្ជាក់ពីសេចក្តីប្រាថ្នាធំក្រៃលែងនៃជាតិយើង។ វាជាការស្តីបន្ទោសយ៉ាងខ្លាំងមួយប្រឆាំងនឹងរដ្ឋាភិបាល ហើយដូច្នេះ តើរដ្ឋាភិបាលនឹងកែតម្រូវការទទួលខុសត្រូវចំពោះថាតើនិងហេតុដូចម្តេចបានជាមានរឿងនេះ?»
លោក Thomas ត្រូវបានតែងតាំងដោយគណៈកម្មការជាន់ខ្ពស់មួយ ដែលរួមមាន លោកនាយករដ្ឋមន្ត្រីម៉ាន់ ម៉ូហាន់ស៊ីង (Manmohan Singh)។
ការដកលោក Thomas ចេញពីតំណែងជាឧបសគ្គមួយទៀតសម្រាប់លោក Singh។ លោកត្រូវបានគេគិតថា ជាអ្នកនយោបាយម្នាក់នៃក្រុមអ្នកនយោបាយដ៏ស្មោះត្រង់បំផុតរបស់ប្រទេសឥណ្ឌា។ ប៉ុន្តែលោកប្រឈមនឹងការរិះគន់ដែលកើនឡើង ថាលោកជាមេដឹកនាំទន់ខ្សោយម្នាក់ និងមិនបានធ្វើកិច្ចការឲ្យគ្រប់គ្រាន់ ដើម្បីធានាឲ្យមានរដ្ឋបាលដ៏ស្អាតស្អំមួយ៕
ប្រែសម្រួលដោយ នុច សារីតា