ភ្ជាប់​ទៅ​គេហទំព័រ​ទាក់ទង

ពួក​​កុម្មុយ​និស្ដឥណ្ឌាប្រឈម​មុខ​នឹង​បញ្ហា​លំបាក​នៅ​ក្នុង​មូលដ្ឋាន​ West Bengal


បុរស​ម្នាក់​អង្គុយ​នៅ​ស៊ីក្លូ​តុបតែង​ដោយ​ក្រដាស​ប្រកាស​ Trinamool Congress (TMC) នៅ​រដ្ឋធានី​ Kolkata។​កាលពី​ថ្ងៃ​ច័ន្ទ​អ្នកបោះឆ្នោត​ទៅ​ស្ថានីយ​​បោះឆ្នោត​នៅ​រដ្ឋ​ West Bengal ក្នុង​ការ​​បោះឆ្នោត​ដែល​លោក​ស្រី​ Mamata Banerjee ​អ្នក​ប្រជានិយម​អាច​រំលំ​រដ្ឋា

នៅ​ក្នុង​ប្រទេស​ឥណ្ឌា​ រដ្ឋាភិបាល​ថ្នាក់​តំបន់​ដែល​ប្រកាន់​លទ្ធិ​កុម្មុយ​និស្ដ​នឹង​ជាប់​ឆ្នោត​តាម​លទ្ធិ​ប្រជាធិបតេយ្យ​ ហើយ​ដែល​គ្រប់គ្រងអំណាច​យូរ​ជាងគេ​នៅ​ក្នុង​ពិភព​លោក​ កំពុងតែ​ខំប្រឹង​ពុះពារ​ឲ្យ​មាន​ជីវិត​ នៅ​ក្នុង​រដ្ឋ​ West Bengal ​ដែល​គេ​ចាត់​ទុក​ជាយូរ​មក​ហើយ​ថា​ជា​កន្លែង​មូលដ្ឋាន​របស់​ក្រុម​ឆ្វេង​និយម។ អ្នក​ដឹក​នាំ​ក្នុង​តំបន់​ កំពុង​តែ​ចោទ​ជា​បញ្ហា​ដ៏​លំបាក​ចំពោះ​ពួក​កាន់​លទ្ធិ​កុម្មុយនិស្ដ​នៅ​ក្នុង​ការ​បោះ​ឆ្នោត​ក្នុង​តំបន់។​ ការបោះឆ្នោត​នៅ​ច័ន្ទ​នៅ​ក្នុង​រដ្ឋ​ West Bengal ​កត់​សម្គាល់​ការ​បោះឆ្នោត​ក្នុង​ដំណាក់កាលទី​មួយ​ ដែល​ប្រព្រឹត្ដធ្វើ​ឡើង​នៅ​ក្នុង​ដំណាក់​កាល៦​ ក្នុង​រយ:​ពេលបី​អាទិត្យ​ខាង​មុខ​នេះ។ អ្នកបោះឆ្នោត​កំពុង​តែ​ជ្រើស​រើស​រដ្ឋាភិបាលក្នុង​តំបន់។ ក៏​ប៉ុន្ដែ​ការ​បោះឆ្នោតនៅ​ក្នុង​រដ្ឋ​ West Bengal ត្រូវ​បាន​គេ​តាម​មើល​នៅ​ទូទាំង​ប្រទេស​ ដោយ​មាន​ការ​ទស្សទាយ​ទុក​ជា​មុន​ថា​គណបក្ស​កុម្មុយនិស្ដ​ នៃ​ប្រទេស​ឥណ្ឌាគឺ​ពួកម៉ាស៊ីស​និយម​ដែល​មិន​ធ្លាប់​ចាញ់​ឆ្នោតនៅ​ក្នុង​រដ្ឋ​ West Bengal តាំង​ពី​ឆ្នាំ​ ១៩៧៧​មក ទំនង​ដូច​ជា​នឹង​ត្រូវ​ទម្លាក់​ចេញ​ពី​អំណាច។

ក្រុម​អ្នកធ្វើ​វិភាគនយោបាយនិយាយ​ថាលោកស្រី Mamata Banerjee ដែល​ជា​មេដឹកនាំ​ដ៏​ខ្លាំង​ក្លានៃ​គណបក្សជំទាស់​ក្នុង​តំបន់​ ឈ្មោះ​ Trinamool Congress អាច​ទទួល​យក​បាន​សន្លឹក​ឆ្នោត​យ៉ាង​ច្រើន​ ហើយ​នឹង​បញ្ចប់​ការ​គ្រប់គ្រង​របស់​ពួក​ម៉ាស៊ីសនិយម​រយ:​ពេល​៣៤​ឆ្នាំ​ដែលគ្មាន​ការ​រអាក់រអួល។

លោកស្រី​ Banerjee ​ដែល​ចាត់​ទុក​ខ្លួនឯង​ថា​ជាអ្នក​ជើង​ឯក​ថ្មី​នៃ​អ្នក​ក្រ​ខ្សត់​ ជា​រដ្ឋមន្ដ្រី​ទទួល​បន្ទុក​ខាង​ផ្លូវ​អយស្ម័យយាន​នៃ​ប្រទេស​ឥណ្ឌា​ ជា​សម្ព័ន្ធ​មិត្រ​ជា​មួយគណបក្ស Congress គ្រប់គ្រង​អំណាច​នៅ​ទី​ក្រុង New Delhi។​ បើ​លោក​ស្រី​ឈ្នះ​ឆ្នោត​ លោក​ស្រី​បាន​សន្យា​ថា​ នឹង​ធ្វើ​ឲ្យ​ឧស្សាហកម្ម​ ហើយ​នឹង​កសិកម្ម​មាន​ដូច​ដើម​វិញ​ នៅ​ក្នុង​រដ្ឋ​ដែល​មាន​សេដ្ឋកិច្ច​ធ្លាក់​ចុះ​នៅ​ក្នុង​ទសវត្សរ៍​កន្លង​ទៅថ្មីៗ​នេះ​។

លោក​ Manesh Rangarajan ​អ្នក​វិភាគ​នយោបាយ​ និង​សាស្ដ្រចារ្យ​ប្រវត្ដិសាស្ដ្រ​ នៅ​សាកលវិទ្យាល័យ Delhi ​និយាយ​ថា​មាន​អ្វី​ដែល​លោក​ហៅ​ថា​ជា​ចរន្ដ​អវិជ្ជមាន​ ប្រឆាំង​នឹង​រដ្ឋាភិបាល​កុម្មុយនិស្ដ​ នៃ​រដ្ឋ​ West Bangal ។

«រដ្ឋាភិបាល​នេះ​គ្រប់​គ្រង​អំណាច​ជាង​មួយ​ជំនាន់​មនុស្ស​មក​ហើយ​។​ មាន​ការ​រំពឹង​ទុក​ដែល​កំពុង​តែ​ផ្លាស់​ប្ដូរ។​ ពួក​នោះ​សម្រេច​បាន​សមិទ្ធិ​ផលល្អ​ជា​បង្គួរ។ ក៏​ប៉ុន្ដែ​៣៥​ឆ្នាំ​ជា​ពេល​វេលា​យូរ​ណាស់។​ មាន​មនុស្ស​ជំនាន់​ថ្មី​ដែលមិន​ធ្លាប់​បាន​ស្គាល់​រដ្ឋាភិបាល​ផ្សេងទៀត​ទេ​ ហើយ​មើល​ទៅ​ពួក​គេ​ហើយ​នឹង​ក្រុម​មនុស្ស​ចាស់ៗ​ចង់​បាន​ការ​ផ្លាស់​ប្ដូរ»។

ប្រជាប្រិយភាព​របស់​ពួក​កុម្មុយនិស្ដ​ ចាក់​គ្រិះ​ដោយសារ​ការ​ចែក​ចាយ​ដី​ធ្លីទៅ​ឲ្យអ្នក​ក្រីក្រ​រាប់​លាន​នាក់។​ ក៏​ប៉ុន្ដែ​រដ្ឋ​នេះ​អន់​ថយនៅ​ក្នុង​ការ​អភិវឌ្ឍន៍ឧស្សាហកម្ម​ ហើយ​មាន​វិបុលភាព​តិច​ជាង​តំបន់​ខ្លះ​ទៀតនៃ​ប្រទេស​នេះ​ជា​ច្រើន។ នៅ​ពេល​មួយ​ដែល​គេ​ចាត់​ទុក​ថា​ជា​ទីក្រុង​មួយ​ពី​ក្នុង​បណ្ដ​ទីក្រុង​សំខាន់​បំផុតនៃ​ប្រទេស​ឥណ្ឌា​ រដ្ឋធានី​ Kolkata នៃ​រដ្ឋ West Bengal ​ឥឡូវនេះ​ជា​ស្រុក​មួយ​ដែល​ទ្រុធ​ទ្រោម​ជាង​គេ​នៃ​រដ្ឋ​នេះ។

ទោះ​ជា​យ៉ាង​ណា​ក៏​ដោយ​ ការ​ព្យាយាម​ធ្វើ​ឧស្សាភាវូបនីយកម្មរដ្ឋ​នេះ​ ហើយ​ធ្វើ​ឲ្យ​ទៅ​ជា​រដ្ឋ​មាន​វិស័យ​សេដ្ឋកិច្ច​ដ៏​រស់​រវើក​ ទៅ​ជា​ឡក​មក​លើ​ពួក​កម្មុយនិស្ដ​វិញ​នៅ​ក្នុង​ពេល​ប៉ុន្មាន​ឆ្នាំ​កន្លង​ទៅ​នេះ​ ដោយ​ក្រុម​កសិករ​មិន​ព្រម​លក់​ដូរដី​របស់​ពួក​គេជា​ដាច់​ខាតដើម្បី​សាង​សង់​រោងចក្រផលិត​រថយន្ដយ៉ាង​ធំ​សម្បើម​មួយ។​ ការ​ប្រឆាំង​តវ៉ា​យ៉ាង​ហិង្សាត្រូវ​បាន​ដឹក​នាំ​ដោយ​លោកស្រី​ Mamata​Banerjee។​ ក្រុម​អ្នកធ្វើ​វិភាគនយោបាយនិយាយ​ថាទោះបី​ពួក​កុម្មុយនិស្ដ​ទទួល​រង​ការ​ចាញ់​ឆ្នោត​ក៏ដោយ​ ពួក​គេ​នឹង​បន្ដធ្វើ​ជា​កម្លាំង​ដ៏​ខ្លាំង​មួយ​នៅ​ក្នុង​រដ្ឋ​នេះ។

សន្លឹក​ឆ្នោត​នៅ​ក្នុង​ការ​បោះឆ្នោត​យ៉ាង​ទន់​ខ្សោយនេះនៅ​ក្នុង​ប្រទេស​ឥណ្ឌា​នឹង​ត្រូវ​គេ​រាប់នៅ​ថ្ងៃ​ទី​១៣​ខែ​ឧសភា​សម្រាប់រដ្ឋ​ទាំង​អស់។​ បន្ថែម​ទៅ​លើ​ការ​សម្រេច​ជោគជត្ដារបស់​ពួក​កុម្មុយនិស្ដ​ នៅក្នុង​រដ្ឋ West Bengal ​លទ្ធផល​ក៏​នឹង​ឲ្យ​សូចនា​ផង​ដែរ​ថា​ ចំពោះ​ក្រុម​អ្នក​បោះឆ្នោត​នៅ​ក្នុង​តំបន់​ដទៃៗ​ទៀត​នៃ​ប្រទេស​នេះ​តើ​បញ្ហា​អំពើ​ពុក​រលួយ​ ហើយនឹង​អតិផរណា​យ៉ាង​ខ្ពស់​ នឹង​មាន​ផល​ប៉ះ​ពាល់​ដែរ​ឬ​ទេ​ ទៅ​លើ​ប្រជាប្រិយភាពរបស់​រដ្ឋាភិបាល​របស់​លោក​នាយក​រដ្ឋមន្ដ្រី​ Manmohan Singh​ ដែល​ដឹក​នាំ​ដោយ​គណបក្ស Congress។​ នៅ​ក្នុង​តំបន់​ទាំង​នោះ​ ការ​បោះឆ្នោត​ក្នុង​តំបន់​បាន​ប្រព្រឹត្ដធ្វើ​នៅ​ដើម​ខែ​នេះ៕

ប្រែ​សម្រួល​ដោយ​ កងស៊ីវន

XS
SM
MD
LG