ភ្ជាប់​ទៅ​គេហទំព័រ​ទាក់ទង

ឥណ្ឌា​ចាប់​ផ្តើម​រាប់​ប្រជា​ពលរដ្ឋ​រាប់​ពាន់​លាន​នាក់​របស់​ខ្លួន


មន្ត្រី​ជំរឿន​ប្រជាពលរដ្ឋ​កត់ត្រា​​ចំនួនប្រជាពលរដ្ឋ​​នៅភូមិ​ Hatkhuwapara ​នៃ​ទី​ក្រុង Guwahati​ ប្រទេសឥណ្ឌា។

ប្រទេស​ឥណ្ឌា​បាន​ចាប់ផ្តើម​កិច្ចការ​ដ៏​ធំ​មួយ​ដើម្បី​រាប់​ចំនួន​ប្រជាពលរដ្ឋ​ជាង​១.០០០​លាន​នាក់​របស់​ខ្លួន។ ជំរឿន​ប្រជាពលរដ្ឋ​នៅ​ពេល​ថ្មីៗ​បំផុត​នេះ​ ត្រូវ​ធ្វើឡើង​នៅ​ក្នុង​ប្រទេស​ជាតិ​ដែល​មាន​ប្រជាជន​ច្រើន​ជាងគេ​ទី២​របស់​ពិភពលោក។

បុគ្គលិក​ជំរឿន​ប្រជាពលរដ្ឋ​ជាង​២.៥០០.០០០​នាក់​ បាន​ចុះ​ធ្វើ​សកម្មភាព​នៅ​ពាស​ពេញ​ប្រទេស​ជាតិ​ដ៏​ធំល្វឹង​ល្វើយ​កាល​ពី​ថ្ងៃ​ពុធ​ដើម្បី​កត់ត្រា​សេចក្តី​លំអិតរ​បស់​ប្រជាពលរដ្ឋ​ឥណ្ឌា​ទាំងអស់។

ក្នុង​ដំណើរការ​ជំរឿន​នេះ​ ដំណាក់កាល​៣​សប្តាហ៍​ជា​ដំណាក់កាល​លំបាក​ជាង​គេ​ ព្រោះ​គេ​ត្រូវ​ចុះ​ទៅ​រាប់​ចំនួន​ប្រជាពលរដ្ឋ​ម្នាក់ៗ​ក្នុង​ប្រទេស​តែម្តង។​សកម្មភាពដ៏​ធំ​មួយ​នេះ​ នឹង​ត្រូវ​បញ្ចប់​នៅចុង​ខែ​នេះ។

ដើម្បី​ឲ្យ​ប្រាកដ​ថា​បុគ្គលិក​ជំរឿន​បាន​ទៅ​គ្រប់​ច្រកល្ហក​ទាំង​អស់ ​ពួកគេ​នឹង​ត្រូវ​បំពាក់​ទៅ​ដោយ​ផែនទី​ដែល​គេ​បាន​មក​ពី​ផ្កាយ​រណប​មាន​ចំនួន​ភូមិ​ជាង​៦សែន​នៅក្នុង​ប្រទេស។

លោកស្រី​ប្រធានាធិបតី​ Pratibha Patil ​ជា​មនុស្ស​ទីមួយ​ដែល​ពួក​មន្រ្តី​ស្រង់​ចំនួន​ប្រជា​ពលរដ្ឋ​បាន​ទៅជួប។ លោកស្រី​បាន​អំពាវនាវ​ដល់​ប្រជា​ពលរដ្ឋ​ឲ្យ​ជួយ​ការងារ​ដ៏​ធំ​ដែល​ពួកគេ​កំពុង​ធ្វើ​នេះ។

«សូម​ចូលរួម​ក្នុង​ជំរឿន​ប្រជា​ពលរដ្ឋ​ដែល​ត្រូវ​ធ្វើ​នៅ​ក្នុង​ប្រទេស​របស់​យើង ​ហើយដែល​ជា​កិច្ចការ​ដ៏​ធំធេង។ សូម​ចាត់ទុក​ការងារ​នេះ​ជា​កាតព្វកិច្ច​ជាតិ​របស់​អ្នក​ ពីព្រោះ​វា​ជា​ផល​ប្រយោជន៍​របស់​យើង​និង​ផល​ប្រយោជន៍​របស់​ជាតិ​យើង»។

ការ​ជំរឿន​ប្រជា​ពលរដ្ឋ​នៅ​ឆ្នាំ​នេះ​ដែល​រួមមាន​សេចក្តី​លម្អិត​នៃ​ប្រាក់​ចំណូល​ សាសនា​ និង​ការសិក្សា​អប់រំ​ ជា​ជំរឿន​ប្រជាពល​រដ្ឋ​ដ៏​លំបាក​និង​ដិតដល់​ជាង​ជំរឿន​ប្រជា​ពលរដ្ឋ​កាល​ពី​ពេលមុនៗ។ ឧទាហរណ៍​ ជំរឿន​ប្រជា​ពលរដ្ឋ​នោះ​ នឹង​រួមមាន​ការ​រកឃើញ​ឲ្យ​ដឹង​ថា ​តើប្រជា​ពលរដ្ឋ​រស់​នៅ​ក្នុង​ខ្ទម​ធ្វើ​ពី​ភក់​ឬ​ផ្ទះ​ថ្ម​មាន​ចំនួន​ប៉ុន្មាន​នាក់​ ហើយ​ថា​តើ​ពួកគេ​មាន​ទឹក​ម៉ាស៊ីន​ ភ្លើង​អគ្គិសនី​និង​បង្គន់​ប្រើប្រាស់​ដែរ​ឬទេ?

ពួក​អ្នក​ជំរឿន​ប្រជា​ពលរដ្ឋ ​នឹង​មិន​គ្រាន់​តែ​ទៅ​រាប់​តាម​ផ្ទះ​ប៉ុណ្ណោះ​ទេ។ ក្នុង​ប្រទេស​មួយ​ដែល​មាន​អ្នក​ក្រ​និង​អ្នក​មិន​មាន​ផ្ទះ​ស្នាក់​នៅ​ជា​ច្រើន​នៅ​ឡើយ​នោះ​នៅ​ពេល​ល្ងាច​ថ្ងៃ​ទី២៨​ ខែ​កុម្ភៈ ​ពួក​មន្រ្តី​នឹង​ធ្វើ​ការ​រាប់​មនុស្ស​ទាំងនោះ​ ដែល​ស្នាក់​នៅ​ពេល​យប់​នៅ​លើ​ចិញ្ចើម​ថ្នល់​ឬ​នៅ​ក្រោម​ស្ពាន​នោះ។ ហើយ​ជា​លើក​ទីមួយ​ដែល​ពួក​មន្រ្តី​ ក៏​នឹង​ប្រមូល​ស្នាម​ផ្តិត​ម្រាម​ដៃ​ហើយ​និង​ថតរូប​ប្រជា​ពល​រដ្ឋ​និមួយៗ​នៅ​ក្នុង​ប្រទេស។ គេ​បាន​ហៅ​គម្រោង​នេះ​ថា​ជា​ប្រភេទ​គម្រោង​ដ៏​ធំ​បង្អស់​មួយ​នៅ​ក្នុង​ប្រវត្តិសាស្រ្ត​ទំនើប​ ហើយ​ពួក​មន្រ្តី​និយាយ​ថា​ ​ទិន្នន័យ​នេះ​នឹង​ត្រូវ​គេ​ប្រើ​ប្រាស់​ ដើម្បី​ផ្តល់​អត្តសញ្ញាណ​ប័ណ្ណ​ជីវសាស្រ្ត​ (Biometric Identity Card) ​ដល់​ប្រជា​ពលរដ្ឋ ​ហើយ​និង​ចងក្រង​ជា​បញ្ជីជាតិ​ចំនួន​ប្រជាជន​ថ្មី។

ជំរឿន​ប្រជា​ពលរដ្ឋ​បាន​ធ្វើ​ឡើង​ជា​រៀង​រាល់​១០​ឆ្នាំ​ម្តង។ វា​ជា​កិច្ចការ​ដ៏​ស្មុគ្រ​ស្មាញ​នៅ​ក្នុង​ប្រទេស​ដ៏​ធំធេង​មួយ​ ហើយ​ដែល​មាន​ភូមិសាស្រ្ត​ វប្បធ៌ម​ និង​ភាសា​ផ្សេងៗ​គ្នា។ ពួក​មន្រ្តី​ជំរឿន​ប្រជា​ពលរដ្ឋ​បាន​ចុះ​បញ្ជី​រួច​ហើយ​នូវ​ចំនួន​ក្រុម​គ្រួសារ​ក្នុង​ប្រទេស​ឥណ្ឌា​ហើយ​បាន​ប៉ាន់​ស្មាន​ថា​ ចំនួន​ប្រជា​ពលរដ្ឋ​មាន​១.១៧០​លាន​នាក់។

ពួកមន្រ្តី​និយាយ​ថា​ជំរឿន​ប្រជា​ពលរដ្ឋ​ ជួយ​ពួកគេ​ក្នុង​ការ​ធ្វើ​គោល​នយោបាយ​ថ្មី​ ជួយ​ឲ្យ​ឃើញ​ថា​តើ​កម្មវិធី​រដ្ឋាភិបាល​មាន​ប្រសិទ្ធិភាព​ឬ​ទេ​ ហើយ​និង​កំណត់​ពី​តំបន់​និង​សហគមន៍​ដែល​អាច​ត្រូវការ​ជំនួយ។

ប្រទេស​ឥណ្ឌា​បាន​ធ្វើ​ជំរឿន​ប្រជា​ពលរដ្ឋ​ជា​រៀង​រាល់​១០ឆ្នាំ​ម្តង​ចាប់តាំង​ពី​ឆ្នាំ​១៨៧២​មក។ ពួក​មន្រ្តី​ជំរឿន​ប្រជា​ពលរដ្ឋ​និយាយ​ដោយ​មោទនភាព​ថា​ កិច្ចការ​នេះ​បាន​ត្រូវ​គេ​ធ្វើ​អស់​រយៈពេល​មួយ​សតវត្សរ៍​មក​ហើយ​ទោះបី​ត្រូវ​ជួប​ប្រទះ​បញ្ហា​ដូច​ជា​ការ​រាំង​ស្ងួត​ឬ​សង្គ្រាម​ក៏ដោយ៕

ប្រែ​សម្រួល​ដោយ ជឹង ប៉ូជីន

XS
SM
MD
LG