ប្រធានាធិបតីសហរដ្ឋអាមេរិកលោក Joe Biden នឹងប្រើសុន្ទរកថាប្រចាំឆ្នាំស្តីពីស្ថានភាពសហព័ន្ធរបស់លោកនៅមុនការបោះឆ្នោតប្រធានាធិបតី ដើម្បីបង្ហាញភាពខុសគ្នារវាងលោកនិងលោក Donald Trump ទាក់ទងនឹងសេដ្ឋកិច្ច ការទារពន្ធពីអ្នកមានទ្រព្យ និងដើម្បីសម្រួលក្តីបារម្ភរបស់អ្នកបោះឆ្នោតអំពីអាយុកាន់តែចាស់របស់លោក។ នេះបើយោងតាមសេចក្តីរាយការណ៍របស់ទីភ្នាក់ងារ Reuters។
ការថ្លែងប្រចាំឆ្នាំរបស់លោក Biden នឹងត្រូវធ្វើឡើងនៅវេលាម៉ោង ៩ យប់ ម៉ោងនៅរដ្ឋធានីវ៉ាស៊ីនតោន ទៅកាន់សម័យប្រជុំសភារួម ដែលនឹងត្រូវបានចាក់ផ្សាយតាមទូរទស្សន៍។ ការថ្លែងសុន្ទរកថាប្រចាំឆ្នាំនេះកើតចេញពីលក្ខខណ្ឌនៃរដ្ឋធម្មនុញ្ញអាមេរិកដែលតម្រូវឱ្យប្រធានាធិបតីកាន់តំណែងរាយការណ៍ទៅសភា«ជារឿយៗ»អំពីស្ថានភាពសហព័ន្ធ។
ការថ្លែងនេះអាចជាវេទិកាដ៏ធំបំផុតមួយរបស់ប្រធានាធិបតីមកពីគណបក្សប្រជាធិបតេយ្យរូបនេះ ដើម្បីនិយាយទៅកាន់អ្នកបោះឆ្នោតអាមេរិករាប់លាននាក់ដែលកំពុងសម្រេចថាត្រូវបោះឆ្នោតឱ្យរូបលោកឬយ៉ាងណា គួរជ្រើសយកគូប្រជែងរបស់លោកគឺលោក Trump ឬក៏មិនចេញទៅបោះឆ្នោតនៅថ្ងៃទី ៥ ខែវិច្ឆិកាខាងមុខនេះឬយ៉ាងណា។ កាលពីថ្ងៃពុធ គូប្រជែងចុងក្រោយរបស់លោក Trump នៃគណបក្សសាធារណរដ្ឋ គឺអ្នកស្រី Nikki Haley បានចាកចេញពីការប្រកួតយកតំណែងជាបេក្ខជនប្រធានាធិបតីរបស់បក្ស។
ការស្ទង់មតិជាច្រើនបង្ហាញថា លោក Biden អាយុ ៨១ឆ្នាំ និងលោក Trump អាយុ ៧៧ឆ្នាំ ដែលកំពុងមានសន្ទុះគាំទ្រប្រហាក់ប្រហែលគ្នានៅរដ្ឋប្រជែងគ្នាជាច្រើនដែលទំនោរនៃការបោះឆ្នោតអាចនឹងធ្វើឱ្យរដ្ឋនោះដូរពីទំនោរគាំទ្របក្សសាធារណរដ្ឋទៅបក្សប្រជាធិបតេយ្យ ឬពីបក្សប្រជាធិបតេយ្យទៅបក្សសាធារណរដ្ឋ។ ទោះជាយ៉ាងណាក្តី អ្នកបោះឆ្នោតអាមេរិកភាគច្រើនមិនសូវរីករាយនឹងជម្រើសរវាងបេក្ខជនទាំងពីរនេះនោះទេ។
នៅក្នុងសុន្ទរកថារបស់លោកនៅយប់នេះ លោក Biden នឹងថ្លែងនៅមុខសភាទាំងពីរថ្នាក់ ដើម្បីទាក់ទាញអ្នកបោះឆ្នោតឱ្យឃើញថា លោកកំពុងប្រយុទ្ធការពារលទ្ធិប្រជាធិបតេយ្យពីលោក Trump ដែលបន្តកុហកអំពីការចាញ់ការបោះឆ្នោតប្រធានាធិបតីឆ្នាំ ២០២០ និងការស្នើឱ្យចាប់ឃុំសត្រូវនយោបាយរបស់លោក Trump។ លោក Biden ក៏នឹងប្តេជ្ញាការពារសិទ្ធិសុំពន្លូតកូនពីសមាជិកបក្សសាធារណរដ្ឋ និងបន្ទាបការចំណាយរបស់ពលរដ្ឋអាមេរិកាំងដែលប្រឈមនឹងតម្លៃទំនិញឡើងថ្លៃ។
អ្នកនាំពាក្យសេតវិមានអ្នកស្រី Karine Jean-Pierre បានប្រាប់សារព័ត៌មាន MSNBC កាលពីថ្ងៃព្រហស្បតិ៍ថា៖ «អ្នកនឹងឮពីការថ្លែងសុន្ទរកថារបស់ប្រធានាធិបតីថា តើលទ្ធិប្រជាធិបតេយ្យនិងសេរីភាពកំពុងស្ថិតក្រោមការវាយប្រហារដូចម្តេច» ដែលរួមមានសិទ្ធិបន្តពូជរបស់ស្ត្រីនិងសិទ្ធិបោះឆ្នោត។
លោក Biden នឹងបន្តបេសកកម្មរបស់លោកក្នុងការធ្វើឲ្យពលរដ្ឋអាមេរិកាំងដែលមានទ្រព្យនិងសាជីវកម្មធំៗបង់ពន្ធបន្ថែម ដោយលោកនឹងបង្ហាញសំណើថ្មីៗរួមមានការទារពន្ធអប្បបរមាខ្ពស់ពីក្រុមហ៊ុន និងពីពលរដ្ឋអាមេរិកាំងដែលមានទ្រព្យច្រើនជាង ១០០លានដុល្លារ។
កំណែទម្រង់ពន្ធណាមួយទំនងមិនអាចកើតឡើងទេ ទាល់តែគណបក្សប្រជាធិតេយ្យទទួលបានសំឡេងឆ្នោតច្រើនក្នុងរដ្ឋសភាទាំងពីរ នៅក្នុងខែវិច្ឆិកា ដែលវាទំនងនឹងមិនអាចកើតឡើងឡើយ។
លោក Biden ក៏នឹងបង្ហាញការគាំទ្ររបស់លោកដល់សហជីព និងបង្ហាញភាពជោគជ័យក្នុងអង្គនីតិបញ្ញត្តិរបស់លោក ជាឧទាហរណ៍ក្នុងវិស័យហេដ្ឋារចនាសម្ព័ន្ធនិងផលិតកម្មបន្ទះឈីបកុំព្យូទ័រ ដើម្បីបង្ហាញថាតើអ្វីអាចនឹងកើតមានឡើង បើសិនជាលោកកាន់តំណែង ៤ ឆ្នាំទៀត។
លោកក៏នឹងសង្កត់ធ្ងន់ពីតួនាទីជាមេដឹកនាំរបស់សហរដ្ឋអាមេរិកក្នុងសកលលោក និងលើកឡើងពីការគាំទ្ររបស់សហរដ្ឋអាមេរិកដល់អ៊ុយក្រែននិងអ៊ីស្រាអែល នេះបើយោងតាមជំនួយការរបស់លោកប្រធានាធិបតី។ លោក Biden ត្រូវបានរំពឹងទុកថានឹងប្រើការថ្លែងសុន្ទរកថាដើម្បីជំរុញម្តងទៀតសម្រាប់កញ្ចប់ជំនួយអាវុធដែលមានទឹកប្រាក់ ៩៥ ពាន់លានដុល្លារ សម្រាប់អ៊ុយក្រែននិងជំនួយសម្រាប់អ៊ីស្រាអែល ដែលត្រូវបានរារាំងដោយប្រធានរដ្ឋសភាលោក Mike Johnson៕
វេទិកាបញ្ចេញមតិ