ភ្ជាប់​ទៅ​គេហទំព័រ​ទាក់ទង

ការកាប់​ឈើខុស​ច្បាប់ក្នុង​ពិភពលោក​ធ្លាក់​ចុះ​


ក្រុង​ឡុងដ៍៖ ផលិតកម្ម​នៃ​ឈើហ៊ុប​ខុស​ច្បាប់​ធ្លាក់​ចុះ​ជិត​១ភាគ៤ ចាប់​តាំង​ពី​ឆ្នាំ ២០០២មក។ នេះ​បើ​យោង​តាម​របាយការណ៍​ថ្មី​របស់​ខាថាម ហៅស៍(Chatham House)។

នៅ​ក្នុង​ប្រទេស​បី​នៃ​ប្រទេស​ដែល​មាន​ព្រៃឈើ​ច្រើន​ជាង​គេ​នៅ​ក្នុង​ពិភពលោក គឺ​ប្រទេស​កាម៉េរូន ប្រេស៊ីល និង​ឥណ្ឌូណេស៊ី មានការ​ធ្លាក់​ចុះ​ពី​៥០​ ទៅ​៧៥​ភាគរយ។

លោក​ស៊ែម ឡសាន់ (Sam Lawson) អ្នក​សរសេរ​របាយការណ៍​នេះ​មាន​ប្រសាសន៍​ថា ប្រការ​នេះ​ មួយ​ផ្នែក​ គឺជា​លទ្ធផល​មួយ​នៃ​សកម្មភាព​ដែល​ត្រូវ​បាន​ចាត់​ចែង​ឡើង​ដោយ​សាម៉ី​ប្រទេស។ ប៉ុន្តែ​លោក​មាន​ប្រសាសន៍​ថា កំណែ​ទម្រង់​កើត​ឡើង​ទូទាំង​សកល។ លោក​ថ្លែង​ដូច្នេះថា៖

«ការ​ឆ្លើយ​តប​របស់​គេ​ឈរ​លើ​មូល​ដ្ឋាន​ទូលំទូលាយ​ណាស់។ វា​មិន​គ្រាន់​តែ​សាម៉ី​ប្រទេស​អ្នក​ផលិត​នោះ​ទេ ដែល​ចាត់​វិធាន​ការ​នោះ ប៉ុន្តែ​ប្រទេស​ដែល​ប្រើ​ប្រាស់​ឈើ​ផង​ដែរ ដែល​ទទួល​ខុស​ត្រូវ​ចំពោះ​ការ​បង្កើត​តម្រូវ​ការ​ចំពោះ​ឈើហ៊ុប​ដែល​មាន​តម្លៃ​ថោក។ ប្រទេស​ទាំង​នោះ​កំពុង​ចាត់​វិធាន​ការ​ដោះស្រាយ​ជាមួយ​នឹង​ការ​ប្រើ​ប្រាស់ និង​ជួយ​ប្រទេសអ្នក​ផលិត​ក្នុង​ការ​ដោះ​ស្រាយបញ្ហា»។

ច្បាប់​ថ្មី​មួយ​ចំនួន​ត្រូវបាន​ត្រូវបាន​អនុ​ម័ត​នៅ​សហរដ្ឋ​អាមេរិក និង​ទ្វីប​អឺរ៉ុប ដែល​ហាម​ការ​នាំ​ចូល​ឈើ​ខុស​ច្បាប់។ របាយការណ៍​របស់​ខាថាម ហៅស៍​ឲ្យ​ដឹង​ថា វា​ជា​ការ​សំខាន់​សម្រាប់​ប្រទេស​ផ្សេងៗក្នុង​ការ​អនុវត្ត​ច្បាប់​ស្រដៀង​គ្នា​នេះ ដូចជា​ប្រទេស​ជប៉ុន ដែលជា​ប្រទេសនាំចូល​ឈើខុស​ច្បាប់​ដ៏​ធំ​មួយ។

លោក​ឡសាន់ មាន​ប្រសាសន៍​ថា ការ​រីក​ចម្រើន​ដ៏​សម្បើ​ម​នេះ ត្រូវ​បាន​ធ្វើ​ឲ្យ​កើត​មាន​ឡើង​កាល​ពីទសវត្សរ៍ចុង​ក្រោយ​នេះ ដែល​លោក​សំដៅ​ មួយ​ផ្នែក​ទៅ​លើ​កិច្ចការ​របស់​ក្រុម​ដាក់សម្ពាធ និង​ប្រព័ន្ធ​ផ្សព្វ​ផ្សាយ ដែល​បាន​ទាញ​ការ​យក​ចិត្ត​ទុក​ដាក់​របស់​ពិភព​លោក​ទៅ​លើ​បញ្ហា​នេះ។

ប៉ុន្តែ​លោក​មាន​ប្រសាសន៍​ថា នៅ​មាន​រឿង​ជា​ច្រើន​ទៀត​ដែល​ត្រូវធ្វើ។ ឧទាហរណ៍ នៅ​ក្នុង​ប្រទេស​ឥណ្ឌូណេស៊ី ៤០​ភាគរយ​នៃ​ការ​ទាញ​យក​ផល​ពី​ព្រៃ​ឈើ ត្រូវបាន​ធ្វើ​ឡើង​ដោយ​ខុស​ច្បាប់។ លោក​ឡសាន់​ថ្លែង​ថា ​បញ្ហា​ចំពោះ​មុខ​ប្រហែល​ជាលំបាក​បំផុត។ លោក​បន្ត​ថា៖

«ខ្ញុំគិត​ថា​ ផ្លែឈើនៅ​ជិតៗដៃ​ត្រូវ​បាន​បេះ​អស់​ហើយ [មានន័យ​ថា បញ្ហា​តូច​តាច​ត្រូវបាន​ដោះ​ស្រាយ​អស់​ហើយ] ហើយ​នៅ​ពេល​ដែល​យើង​ចូល​ទៅ​ក្នុង​បញ្ហា​កាន់​តែ​ជ្រៅ ការ​ប្រឈម​មុខ​ក៏​កាន់តែ​មាន​ច្រើន»។

លោក​មាន​ប្រសាសន៍​ថា ប៉ុន្តែ​ការ​បញ្ចប់​ការ​កាប់​ឈើ​ខុស​ច្បាប់​គឺ​សំខាន់​ចាំ​បាច់​ណាស់។ លោក​បន្ត​ថា ការ​បញ្ចប់​ការ​កាប់​ឈើ​ខុស​ច្បាប់ និង​កាត់​បន្ថយ​ការ​បញ្ចេញ​កាបោន​ដៃ​អុក្សៃ​នៅ​ជុំវិញ​ពិភព​លោក​ ហើយ​ជួយ​ការ​ពារ​ជីវភាព​របស់​ប្រជាពលរដ្ឋ​ដែល​រស់​នៅ​ដោយ​ពឹង​ផ្អែក​លើ​ព្រៃ​ឈើ។ លោក​ថ្លែង​ថា៖

«ពេល​នេះ មនុស្ស​ប្រហែល​១ពាន់​លាន​នាក់ នៅ​ជុំវិញ​ពិភព​លោក​រស់​នៅ​ ដោយ​ពឹង​ផ្អែក​ដោយ​ផ្ទាល់​លើ​ព្រៃ​ឈើ ក្នុង​ការ​រក​ម្ហូប​អាហារ សម្ភារៈ​សំណង់ និង​ជួនកាល​ឱសថ ហើយ​គេ​ក៏​ពឹង​ផ្អែក​លើ​ទឹក​ស្អាត​ចេញ​ពី​ព្រៃឈើ​ដែរ។ ជីវភាព​រស់​អ្នក​ទាំង​នោះ​ត្រូវ​បាន​បំផ្លាញ នៅ​ពេល​ព្រៃឈើ​ត្រូវ​បាន​បំផ្លាញ ហើយ​ការ​កាប់​ឈើ​ខុស​ច្បាប់​គឺ​ជា​ផ្នែក​មួយ​ដែល​ជំរុញ​ឲ្យ​មាន​ការ​បំផ្លាញ​នោះ»។ យោង​តាម​របាយការណ៍​របស់​ខាថាម ហៅស៍ ព្រៃ​ឈើ​ចំនួន​១៧​លាន​ហិកតា ត្រូវ​បាន​ការពារ​ពី​ការ​បាត់​បង់​ក្នុង​ទសវត្សរ៍​ចង់​ក្រោយ​នេះ៕

ប្រែសម្រួលដោយ អ៊ឹម សុធារិទ្ធ

XS
SM
MD
LG