លោកនាយករដ្ឋមន្រ្តី ហ៊ុន សែន បានប្រតិកម្មថា លោក ផៃ ស៊ីផាន និយាយខុស និងបានស្តីបន្ទោសថាលោកធ្វើជាអ្នកនាំពាក្យកុំចង់ល្បី ក្រោយពីលោក ផៃ ស៊ីផាន បានផ្តល់បទសម្ភាសន៍មួយទាក់ទងនឹងការផ្ទេរតំណែងធំៗរបស់លោក សុខ អាន។
លោកនាយករដ្ឋមន្រ្តី ហ៊ុន សែន នៅព្រឹកថ្ងៃពុធនេះ បានស្តីបន្ទោសលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីដែលបាននិយាយក្រោយមរណភាពរបស់លោក សុខ អាន ថា តំណែងប្រមាណជាង១០របស់លោក សុខ អាន ត្រូវបានផ្ទេរឲ្យលោក ប៊ិន ឈិន ដែលទើបត្រូវបានតែងតាំងជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រី។
លោក សុខ អាន ជាអតីតរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងមានតួនាទីធំៗជាច្រើនទៀតក្នុងជួររដ្ឋាភិបាល បានទទួលមរណភាពកាលពីពាក់កណ្តាលខែមីនានេះ។ ក្រោយមរណភាពរបស់លោក សុខ អាន បានប៉ុន្មានថ្ងៃ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីបានប្រាប់អ្នកសារព័ត៌មាន The Cambodia Daily ថា តំណែងធំៗទាំងអស់របស់លោក សុខ អាន នឹងត្រូវប្រគល់ឲ្យលោក ប៊ិន ឈិន តែម្នាក់ ដើម្បីបន្តការងារ។
ថ្លែងក្នុងពិធីប្រគល់សញ្ញាប័ត្រដល់គរុនិស្សិត និងសិស្សនៅវិទ្យាស្ថានជាតិអប់រំ នាព្រឹកថ្ងៃពុធនេះ លោកនាយករដ្ឋមន្រ្តី ហ៊ុន សែន បានប្រតិកម្មនឹងការចុះផ្សាយព័ត៌មានពាក់ព័ន្ធនឹងការកាន់តំណែងរដ្ឋបាលសំខាន់ៗរបស់លោក សុខ អាន។ លោក ហ៊ុន សែន អះអាងថា តំណែងរដ្ឋបាលដែលលោក សុខ អាន ទទួលបន្ទុកកន្លងមក មិនមែនធ្លាក់ទៅលើលោក ប៊ិន ឈិន ដែលជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីទាំងអស់ ដូចការបកស្រាយរបស់លោក ផៃ ស៊ីផាន នោះទេ។
លោក ហ៊ុន សែន បញ្ជាក់ថា លោក ផៃ ស៊ីផាន មានគុណសម្បត្តិច្រើន តែលោកថា លោកសោកស្តាយចំពោះការអត្ថាធិប្បាយដែលខុសពីការពិតនាំឲ្យមានការយល់ច្រឡំ ចំពោះតួនាទីរបស់លោក សុខ អាន។
លោកបញ្ជាក់ប្រាប់ VOA ថា៖
«ថ្ងៃនេះ ខេមបូឌាដេលី ចុះផ្សាយថា មិនមានអ្វីថ្មីឡើយ ខណៈការងារទាំងអស់របស់លោក សុខ អាន ត្រូវបានប្រគល់ឲ្យលោក ប៊ិន ឈិន ហើយត្រូវបានដកស្រង់សម្តីរបស់ឯកឧត្តម ផៃ ស៊ីផាន។ ខ្ញុំមិនដឹងថា ឯកឧត្តម ផៃ ស៊ីផាន បានពីត្រង់ណាមក? អ៊ីចឹងបានថា ធ្វើអ្នកនាំពាក្យកុំចង់ល្បី មេស៊ីសងនៅឯណេះ»។
លោក ហ៊ុន សែន ថ្លែងបន្តថា ស្ថាប័នមួយចំនួនដែលលោក សុខ អាន ធ្លាប់បានកាន់កាប់ ត្រូវបានរំសាយ ហើយថា ស្ថាប័នមួយចំនួនដែលនៅសល់ដូចជា អាជ្ញាធរជាតិអប្សរា និងអាជ្ញាធរព្រះវិហារ ត្រូវបានលោកប្រកាសដាក់ឲ្យនៅក្រោមក្រសួងវប្បធម៌ និងវិចិត្រសិល្បៈ ហើយគណៈកម្មការគ្រប់គ្រងផ្លូវដែក ត្រូវប្រគល់ជូនរដ្ឋមន្ត្រីក្រសួងសាធារណការ និងដឹកជញ្ជូន។
លោក ហ៊ុន សែន បន្ថែមថា ស្ថាប័នពាក់ព័ន្ធនឹងការកាត់ទោសខ្មែរក្រហម រួមទាំងសាលារាជបណ្ឌិត្យសភាកម្ពុជា និងអាកាសចរស៊ីវិល ត្រូវប្រគល់ឲ្យលោក ប៊ិន ឈិន រដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រី។ ចំណែកលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ត្រូវទៅធ្វើជាប្រធានកាយរឹទ្ធិជាតិកម្ពុជា។ ស្ថាប័នគណៈវិស្វកម្ម ត្រូវប្រគល់ជូនក្រសួងការងារ និងបណ្ដុះបណ្ដាលវិជ្ជាជីវៈ។ សាលាភូមិន្ទរដ្ឋបាល ត្រូវស្ថិតក្រោមការគ្រប់គ្រងរបស់ក្រសួងមុខងារសាធារណៈហើយសាលាវិជ្ជាជីវៈតុលាការ ត្រូវប្រគល់ឲ្យក្រសួងយុត្តិធម៌។
លោក ហ៊ុន សែន បញ្ជាក់ថា លោកបានពិភាក្សាចំពោះការផ្លាស់ប្តូរតួនាទីនេះជាមួយលោក សុខ អាន មុនពេលដែលលោកទទួលមរណភាព។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីប្រាប់ VOA នារសៀលថ្ងៃពុធនេះថា ការលើកឡើងរបស់លោក ហ៊ុន សែន គឺជាការផ្តល់ឱវាទធម្មតា ដើម្បីឲ្យអ្នកនាំពាក្យទាំងអស់ពង្រឹងគុណភាពក្នុងការផ្តល់ព័ត៌មាន។
លោកបញ្ជាក់ថា៖
«ខ្ញុំជឿជាក់ថា អ្នកផ្សាយយល់ច្រឡំ គេផ្សាយមិនអស់ពីអ្វីដែលខ្ញុំបានប្រាប់គេ។ ខ្ញុំមិននិយាយតតាំងអីទេ គឺគ្រាន់តែជាយើងទទួលឱវាទ ជាការណែនាំរបស់សម្តេចនាយករដ្ឋមន្រ្តី មិនត្រឹមតែខ្ញុំអ្នកនាំពាក្យ សូម្បីតែអ្នកសារព័ត៌មាន ឬអ្នកធ្វើព័ត៌មាន គឺមិនឲ្យក្លាយជាចៅក្រមដើរតួខុសតួនាទី»។
ឆ្លើយទៅនឹងសំណួររបស់ VOA ដែលបានសួរថា តើលោកបានពិតជាបានផ្តល់សម្ភាសន៍ទៅឲ្យសារព័ត៌មានពាក់ព័ន្ធនឹងការផ្ទេរតំណែងរបស់លោក សុខ អាន ខុសមែន ឬយ៉ាងណា លោក ផៃ ស៊ីផាន បានឆ្លើយថា លោកសុំមិនធ្វើអត្ថាធិប្បាយ។
លោក មាស នី អ្នកវិភាគពីការអភិវឌ្ឍសង្គម លើកឡើងថា អ្នកនាំពាក្យរបស់រដ្ឋាភិបាលត្រូវមានភាពប្រុងប្រយ័ត្នខ្ពស់ក្នុងការផ្តល់ព័ត៌មាន ដើម្បីជៀសវាងការបាត់បង់ទំនុកចិត្តពីប្រជាពលរដ្ឋ និងជៀសវាងផលប៉ះពាល់ដល់កិត្តិយសសង្គម។
អ្នកវិភាគរូបនេះមានប្រសាសន៍ប្រាប់ VOA ថា៖
«រឿងខ្លះបើគ្រាន់តែចេញសេចក្តីប្រកាសទៅវាមិនមានប៉ះពាល់ដល់បញ្ហាកិត្តិយស ឬក៏បញ្ហាសង្គមធំៗទេ អាហ្នឹងវាអត់អីទេ។ ប៉ុន្តែប្រសិនបើការចេញសេចក្តីថ្លែងការណ៍ទៅ នាំពាក្យ និយាយទៅខុស ហើយវាប៉ះពាល់ដល់កិត្តិនាមរបស់សង្គម ឬអ្នកនយោបាយណាមួយនោះ អាហ្នឹងវាជាបញ្ហាដែលយើងថា គួរឲ្យសោកស្តាយ បើសិនជាមានរឿងបែបហ្នឹងកើតឡើង»។
បើតាមលោក ហ៊ុន សែន រដ្ឋាភិបាលនឹងរៀបចំកែទម្រង់ព្រះរាជក្រឹត្យ និងអនុក្រឹត្យ ដើម្បីកែប្រែស្ថាប័នខាងលើឲ្យស្របតាមច្បាប់៕
