ស្របពេលដែលសកម្មជននយោបាយអតីតគណបក្សសង្គ្រោះជាតិចំនួនប្រាំនាក់ត្រូវកោះឲ្យចូលបំភ្លឺនៅសាលាដំបូងខេត្តបាត់ដំបងនៅថ្ងៃពុធនេះ អង្គការឃ្លាំមើលសិទ្ធិមនុស្ស Human Rights Watch អំពាវនាវឲ្យ «អាជ្ញាធរកម្ពុជាគួរតែបញ្ឈប់ការយាយីអតីតសមាជិកគណបក្សប្រឆាំងតាមផ្លូវតុលាការជាបន្ទាន់»។
រហូតមកទល់ពេលនេះមានអតីតមេឃុំ ចៅសង្កាត់ និងក្រុមប្រឹក្សារបស់អតីតគណបក្សសង្រ្គោះជាតិយ៉ាងតិច២៥នាក់ក្នុងខេត្តបាត់ដំបងត្រូវតុលាការខេត្តបាត់ដំបងកោះហៅឲ្យចូលបំភ្លឺតុលាការដោយសង្ស័យថា សកម្មជននយោបាយទាំងនេះពាក់ព័ន្ធនឹងការបំពានសាលដីការំលាយគណបក្សប្រឆាំងនេះរបស់តុលាការកំពូល។ ហើយពួកគេនឹងត្រូវចូលបំភ្លឺដល់តុលាការនៅថ្ងៃទី៨ ថ្ងៃទី៩ ទី១៦ ទី១៧ និងទី២១ ខែឧសភា។
នៅក្នុងសេចក្តីថ្លែងការណ៍របស់ខ្លួនកាលពីល្ងាចថ្ងៃអង្គារទី៧ ខែឧសភា អង្គការ Human Rights Watch ដែលមានមូលដ្ឋាននៅក្រុងញូវយ៉កសហរដ្ឋអាមេរិក លោក Brad Adams នាយកអង្គការឃ្លាំមើលសិទ្ធិមនុស្សប្រចាំតំបន់អាស៊ី ត្រូវបានគេស្រង់សម្តីជាភាសាអង់គ្លេស និងត្រូវបានប្រែសម្រួលជាភាសាខ្មែរក្នុងន័យដើមថា៖ «រដ្ឋាភិបាលកម្ពុជាបន្តយាយីមន្ត្រីគណបក្សប្រឆាំងជាច្រើនតាមផ្លូវតុលាការ និងបានគំរាមពួកគេជាមួយការជាប់ពន្ធនាគាររយៈពេលវែង បន្ទាប់ពីគណបក្សប្រឆាំងដ៏សំខាន់នេះត្រូវបានហាមឃាត់ដោយមិនត្រឹមត្រូវ»។
លោកអាដាម បន្តថា៖ «រដ្ឋាភិបាលគួរតែបញ្ចប់ជាបន្ទាន់យុទ្ធនាការធ្វើទុក្ខបុកម្នេញប្រឆាំងនឹង(អតីត)គណបក្សសង្គ្រោះជាតិ ហើយទម្លាក់ចោលបណ្តុំនៃសំណុំរឿងដែលគ្មានហេតុផលទាំងអស់នេះ»។
គណបក្សសង្រ្គោះជាតិ ដែលជាគណបក្សប្រឆាំងដ៏ធំនៅកម្ពុជា ត្រូវបានតុលាការកំពូលប្រកាសរំលាយចោលកាលពីថ្ងៃទី១៦ ខែវិច្ឆិកា ឆ្នាំ២០១៧ ក្រោមការចោទប្រកាន់ថា មានបំណងផ្តួលរំលំរដ្ឋាភិបាល ដោយមានសហរដ្ឋអាមេរិកនៅពីក្រោយ។ ប៉ុន្តែសហរដ្ឋអាមេរិកបានច្រានចោលការចោទប្រកាន់នេះ។
មន្ត្រីគណបក្សប្រឆាំងចំនួនបីនាក់បានចូលទៅបំភ្លឺនៅតុលាការខេត្តបាត់ដំបងនៅព្រឹកថ្ងៃពុធនេះ ក្នុងនោះមានលោក សម វង្សតារ៉ា អតីតចៅសង្កាត់រងទី២ សង្កាត់អូរម៉ាល់ ដែលមិនស្ថិតក្នុងបញ្ជីរបស់អង្គការឃ្លាំមើលសិទ្ធិមនុស្ស លោក រឿន កែប អតីតចៅសង្កាត់ក្តុលដូនទាវ ក្រុងបាត់ដំបង លោក តន់ សាម៉ន អតីតចៅសង្កាត់វត្តគរ ក្រុងបាត់ដំបង។ នេះបើយោងតាមការបញ្ជាក់របស់លោក អ៊ិន គង់ជិត មន្ត្រីឃ្លាំមើលសិទ្ធិមនុស្សអង្គការលីកាដូ (Licadho) ប្រចាំខេត្តបាត់ដំបងបន្ទាយមានជ័យ និងឧត្តរមានជ័យ។
ដោយឡែកមន្ត្រីពីរនាក់ទៀតរបស់អតីតគណបក្សសង្គ្រោះជាតិ គឺលោក សាំង ប៊ុនម៉ៅ អតីតចៅសង្កាត់ស្វាយប៉ោ ក្រុងបាត់ដំបង និងលោក ផាន់ រ៉េត អតីតចៅសង្កាត់រង ក្តុលដូនទាវ ក្រុងបាត់ដំបងត្រូវចូលបំភ្លឺតុលាការនៅពេលរសៀល។
លោក ហេង លុយ អ្នកនាំពាក្យសាលាដំបូងខេត្តបាត់ដំបងលើកឡើងថា សេចក្តីអំពាវនាវរបស់អង្គការឃ្លាំមើលសិទ្ធិមនុស្ស គឺគ្រាន់តែជាការយល់ឃើញមួយ ប៉ុន្តែតុលាការត្រូវចាត់ការនិតិវិធីតាមបណ្តឹងរបស់ក្រុមមន្ត្រីនគរបាល។
លោកថ្លែងថា៖ «បើការអំពាវនាវគាត់ថា ម៉េចរឿងរបស់គាត់ទេ ប៉ុន្តែគ្រាន់តែថា ផ្លូវច្បាប់គេឲ្យធ្វើអ៊ីចឹង បើមិនធ្វើអ៊ីចឹង បានន័យថា យើងធ្វើខុសហើយ ម៉េចដឹងខុសត្រូវ បើយើងមិនទាន់បានសួរនាំអីគាត់ផង»។
យ៉ាងណាក្តី លោក តន់ សាម៉ន អតីតចៅសង្កាត់វត្តគរ ក្រុងបាត់ដំបង ដែលបានចូលខ្លួនទៅបំភ្លឺនៅសាលាដំបូងខេត្តបាត់ដំបងនាព្រឹកថ្ងៃពុធនេះ បានប្រាប់ VOAថា តុលាការបានសាកសួររូបលោកអំពីការទទួលទាននំបញ្ចុកនៅផ្ទះលក់នំបញ្ចុករបស់កញ្ញា ស៊ិន ចាន់ពៅរ៉ូហ្សេត អតីតចៅសង្កាត់អូចារមកពីគណបក្សប្រឆាំង។
លោក តន់ សាម៉ន ចាត់ទុកថា ការកោះហៅរូបលោកឲ្យចូលបំភ្លឺតុលាការអំពីមូលហេតុនេះជាចេតនារឹតត្បិតលើសិទ្ធិសេរីភាពរបស់ពលរដ្ឋ និងជាការគំរាម៖
«ចេះតែហៅទៅ វាចង់បំបាក់ស្មារតីយើង ដើម្បីកុំឲ្យយើងធ្វើដំណើរ ក៏កុំឲ្យយើងដឹង កុំឲ្យឮអីពីអ្វីមួយតទៅទៀត វាចង់ធ្វើអ៊ីចឹងឯង គោលគំនិត គោលបំណងរបស់វា កុម្មុយនីស្តវាត្រូវធ្វើអ៊ីចឹងឯង»។
ក្នុងថ្ងៃចូលខ្លួនទៅតុលាការរបស់មន្ត្រីគណបក្សប្រឆាំងទាំងប្រាំនាក់នៅថ្ងៃពុធនេះ មានក្រុមអ្នកគាំទ្ររាប់សិបនាក់ បានចូលរួមឃ្លាំមើលពីក្រៅរបងតុលាការ ហើយក៏គ្មានការប្រឈមមុខដាក់គ្នាណាមួយបានកើតឡើងជាមួយអាជ្ញាធរមានសមត្ថកិច្ចទេ។ នេះបើតាមការបញ្ជាក់របស់មន្ត្រីឃ្លាំមើលសិទ្ធិមនុស្សលីកាដូប្រចាំខេត្តបាត់ដំបង៕
