ក្នុងរបាយការណ៍ប្រចាំឆ្នាំរបស់អង្គការសិទ្ធិមនុស្ស Human Rights Watch ដែលបានចេញផ្សាយកាលពីថ្ងៃព្រហស្បតិ៍ អង្គការនេះបាននិយាយសំដៅដល់ការជាប់ឆ្នោតរបស់លោកត្រាំជាប្រធានាធិបតីសហរដ្ឋអាមេរិក រួមជាមួយការងើបឡើងនូវពួកអ្នកនយោបាយគិតតែពីប្រជាប្រិយភាពនៅតំបន់អឺរ៉ុប ជាការគំរាមកំហែងដ៏ធ្ងន់ធ្ងរមួយដល់លទ្ធិប្រជាធិបតេយ្យបច្ចឹមប្រទេសហើយនិងតម្លៃនៃប្រព័ន្ធលទ្ធិប្រជាធិបតេយ្យ។
របាយការណ៍ដែលមានជាង៧រយទំព័រដែលនិយាយលម្អិតពីការអនុវត្តសិទ្ធិមនុស្សនៅក្នុងប្រទេសជាង៩០ បានអះអាងថា លោកប្រធានាធិបតីជាប់ឆ្នោត ដូណាល់ ត្រាំ បានឡើងកាន់អំណាចតាមរយៈការបង្កការស្អប់ខ្ពើម និងការមិនអត់ឱន ហើយរបាយការណ៍នោះបានប្រាប់ឲ្យដឹងទៀតថា ការជាប់ឆ្នោតរបស់លោកត្រាំឆ្លុះបញ្ចាំងការដឹកនាំបែបមនុស្សខ្លាំងដែលបានឃើញនៅក្នុងប្រទេសនានាដូចជាចិន និងរុស្ស៊ី។
លោក Kenneth Roth នាយកប្រតិបត្តិនៃអង្គការសិទ្ធិមនុស្ស Human Rights Watch បានសរសេរថា «ប្រធានាធិបតីជាប់ឆ្នោតសហរដ្ឋអាមេរិក ដូណាល់ ត្រាំ និងពួកអ្នកនយោបាយនៅអឺរ៉ុបស្វះស្វែងរកការកាន់អំណាចតាមរយៈការអំពាវនាវឲ្យមានការប្រកាន់ពូជសាសន៍ ការស្អប់ខ្ពើមជនបរទេស និងការស្អប់ខ្ពើមស្រីៗ។ពួកអ្នកនយោបាយទាំងអស់នោះអះអាងថា សាធារណជនសុខចិត្តទទួលយកការរំលោភសិទ្ធិមនុស្សជាការចាំបាច់ដើម្បីការពារការងារ បញ្ចៀសការផ្លាស់ប្តូរវប្បធម៌ ឬរារាំងការវាយប្រហារភេរវកម្ម។ តាមការពិត វាជាការបដិសេធមិនទទួលយកសិទ្ធិមនុស្សដែលទំនងឆ្ពោះទៅកាន់អំណាចផ្តាច់ការ។
បន្ថែមពីយុទ្ធនាការឃោសនាបោះឆ្នោតប្រធានាធិបតីរបស់លោកត្រាំ លោក Roth ក៏និយាយដែរថា ការសម្រេចចិត្តរបស់ចក្រភពអង់គ្លេសផ្តាច់ចេញពីសហភាពអឺរ៉ុបផ្អែកលើការប្រកាន់ពូជសាសន៍ និងភាពគ្មានការអត់ឱន៕
