មេធាវីខាងគណបក្សប្រជាធិបតេយ្យ និងខាងគណបក្សសាធារណរដ្ឋគ្រោងនឹងបង្ហាញភស្តុតាងនៅថ្ងៃចន្ទនេះដល់សមាជិកគណៈកម្មាធិការនីតិកម្មនៃរដ្ឋសភាសហរដ្ឋអាមេរិក ស្របពេលដែលគណៈកម្មាធិការនេះឈានឆ្ពោះទៅដល់ដំណាក់កាលដែលអាចធ្វើការបោះឆ្នោតនៅក្នុងសប្ដាហ៍នេះអំពីបទចោទដើម្បីចោទប្រកាន់ទម្លាក់លោកប្រធានាធិបតី Donald Trump ពីតំណែង។
សវនាការដែលគ្រោងនឹងធ្វើឡើងនេះនឹងរួមមានការថ្លែងរបស់មេធាវីមកពីគណៈកម្មាធិការនីតិកម្ម និងគណៈកម្មាធិការស៊ើបការណ៍សម្ងាត់នៃរដ្ឋសភាផងដែរ។
មិនមានមន្ត្រីណាម្នាក់មកពីសេតវិមានប្រធានាធិបតីនឹងចូលរួមនៅក្នុងសវនាការនេះទេ។ មេធាវីសេតវិមានលោក Pat Cipollone បានរិះគន់ការស៊ើបអង្កេតដើម្បីចោទប្រកាន់ទម្លាក់លោក Trump ពីតំណែងដែលកំពុងធ្វើឡើងនៅក្នុងរដ្ឋសភាដែលគ្រប់គ្រងដោយគណបក្សប្រជាធិបតេយ្យនេះថា «គ្មានមូលដ្ឋានទាំងស្រុង» និងបានហៅបទចោទដែលគ្រោងនឹងធ្វើឡើងនេះថាជា «ការរំលោភអំណាចដោយទទឹងទិស»។
លោក Trump បានសរសេរនៅលើ Twitter កាលពីថ្ងៃអាទិត្យម្សិលមិញ ដោយហៅដំណើរការនេះថាជា «ការតាមព្យាបាទ» និងជា «ការបោកប្រាស់» ហើយថែមទាំងខ្វះនីតិវិធីត្រឹមត្រូវទៀតផង។ ស្របពេលនោះដែរ លោកក៏បានផ្សព្វផ្សាយបន្តនូវសារមួយចំនួនរបស់អ្នកដទៃទៀតដែលនិយាយថា លោកត្រូវគេធ្វើទង្វើអយុត្តិធម៌មកលើ។
សមាជិកខាងគណបក្សប្រជាធិបតេយ្យបានបញ្ជាក់ថា ភស្តុតាងប្រឆាំងនឹងលោកប្រធានាធិបតី Trump គឺជាក់ច្បាស់។
ប្រធានគណៈកម្មាធិការនីតិកម្មលោក Jerrold Nadler បានប្រាប់បណ្ដាញព័ត៌មាន CNN ថា លោក Trump នឹងត្រូវគេរកឃើញថាមានកំហុសក្នុងរយៈពេលតែ «៣ នាទីគត់» ប្រសិនបើលោកប្រឈមនឹងការចោទប្រកាន់នៅពីមុខគណៈកម្មការវិនិច្ឆ័យនៃតុលាការព្រហ្មទណ្ឌ ដែលថា លោកបានរំលោភអំណាចដោយសារលោកបានស្នើប្រទេសអ៊ុយក្រែនឲ្យស៊ើបអង្កេតលើលោក Joe Biden ដែលអាចជាគូប្រជែងរបស់លោកនៅក្នុងការបោះឆ្នោតនៅឆ្នាំក្រោយ៕
