ក្រសួងសាធារណការនិងដឹកជញ្ជូន និងប្រៃសណីយ៍ ហើយនឹងភាគីពាក់ព័ន្ធបានពិភាក្សាអំពីគម្រោងសាងសង់ផ្លូវសម្រាប់ការបើកបរល្បឿនលឿនពីកណ្តាលក្រុងភ្នំពេញទៅកាន់អាកាសយានដ្ឋានអន្តរជាតិភ្នំពេញ។ ទោះបីជាក្រុមមន្ត្រីសង្ឃឹមថា ផ្លូវ Highway ដែលមានការបង់ថ្លៃនេះ អាចជួយសម្រួលដល់ការកកស្ទះចរាចរណ៍ក្នុងទីក្រុងភ្នំពេញក៏ដោយក៏ប្រជាពលរដ្ឋមួយចំនួននៅតែមន្ទិលសង្ស័យទាក់ទិននិងការសាងសង់គម្រោងថ្មីនេះ។
ទោះជាប្រជាពលរដ្ឋក្នុងរាជធានីភ្នំពេញមានការសារទរចំពោះគម្រោងសាងសង់ផ្លូវល្បឿនលឿន (express way)ដែលតភ្ជាប់ពីកណ្តាលក្រុងភ្នំពេញទៅកាន់អាកាសយានដ្ឋានអន្តរជាតិភ្នំពេញក៏ដោយ ក៏ប៉ុន្តែពួកគេយល់ថា ការគោរពច្បាប់ចរាចរណ៍នៅតែជាគន្លឹះចម្បងក្នុងកាត់បន្ថយការស្ទះចរាចរណ៍ក្នុងក្រុង។
កិច្ចប្រជុំពិភាក្សារបស់ក្រសួងសាធារណការហើយនឹងភាគីពាក់ព័ន្ធដែលមានគម្រោងសាងសង់ផ្លូវថ្មីនេះ ត្រូវបានធ្វើឡើងកាលពីថ្ងៃអង្គារសប្តាហ៍នេះ។ ក្នុងនោះ គម្រោង៣ត្រូវបានលើកឡើងចំពោះផ្លូវថ្មី ក្នុងចម្ងាយផ្លូវប្រមាណ១០គីឡូម៉ែត្រ ក្នុងគោលបំណងកាត់បន្ថយភាពកកស្ទះចរាចរណ៍និងការធ្វើដំណើរទៅមករវាងអាកាសយានដ្ឋានអន្តរជាតិភ្នំពេញនិងកណ្តាលទីក្រុង។ គម្រោងទាំងបីនោះរួមមាន ទី១ គឺការសាងសង់ផ្លូវល្បឿនលឿនត្រង់ពីសហព័ន្ធរុស្ស៊ីទៅព្រលានយន្តហោះ ដែលមានទឹកប្រាក់ប្រមាណជាង៣៦០លានដុល្លារអាមេរិក។ គម្រោងទី២គឺការសាងសង់ផ្លូវពីលើរថភ្លើងក្បែរសក្យមុនីចេតិយឆ្ពោះទៅកាន់ព្រលាន យន្តហោះ។ រីឯគម្រោងទី៣ គឺការសាងសង់កាត់លើផ្លូវក្បែរស្ថានទូតបារាំងទៅកាន់អង់តែនទួលគោក និងកាត់តាមផ្លូវឧកញ៉ាម៉ុងឫទ្ធី។
គម្រោងសាងសង់ផ្លូវល្បឿនលឿន ដែលមានរបាំងខណ្ឌនៅកណ្តាលទ្រូងផ្លូវ មានបង្កាន់ដៃសងខាង និងមានទទឹងផ្លូវប្រមាណជាងដប់ម៉ែត្រនេះ នឹងចាប់ផ្តើមធ្វើពីឆ្នាំ២០១៦ដល់ឆ្នាំ២០២១។
គេរំពឹងថា ផ្លូវថ្មីនេះអាចជួយសម្រួលដល់ការកកស្ទះចរាចរណ៍ក្នុងទីក្រុងភ្នំពេញ ជាពិសេសគឺបន្ថែមភាពងាយស្រួលដល់ការធ្វើដំណើរទៅកាន់ព្រលានយន្តហោះ។
យ៉ាងណាក៏ដោយ ក្រសួងសាធារណការ និងភាគីពាក់ព័ន្ធកំពុងតែធ្វើការសិក្សាឲ្យកាន់តែស៊ីជម្រៅបន្ថែមទៀត ដើម្បីសម្រេច ថាតើគម្រោងណាមួយដែលជាជម្រើសល្អជាងគេ ហើយអាចផ្តល់ចំណូលសេដ្ឋកិច្ចច្រើនជាង គេព្រមទាំងមានផលប៉ះពាល់តិចជាងគេ។
លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន ហាក់ដូចជាមានការថ្លឹងថ្លែងចំពោះគម្រោងទី១ជាជាងគម្រោងផ្សេងទៀត។
លោករដ្ឋមន្ត្រីថ្លែងនៅក្នុងកិច្ចប្រជុំពិសេសកាលពីថ្ងៃអង្គារយ៉ាងដូច្នេះថា៖
«គឺយើងមានជម្រើស៣ ហើយក្នុងជម្រើសហ្នឹងការសិក្សារបស់វិទ្យាស្ថានគឺសង្កត់ធ្ងន់ទៅលើគម្រោងទី១ ដោយសារផ្នែកហិរញ្ញវត្ថុវាថោកជាង តម្លៃវា៣៦២លានដុល្លារ។ ទី២ ផលប្រយោជន៍សេដ្ឋកិច្ចក៏វាបានច្រើនជាងគម្រោងផ្សេងដែរ។ ហើយវាមានភាពងាយស្រួលក្នុងការសាងសង់ ដឹកជញ្ជូនគ្រឿងសំណង់»។
អ្នកធ្វើដំណើរមួយចំនួនធំ ដែល VOA បានជួបសម្ភាស បានបង្ហាញការគាំទ្រចំពោះគម្រោងសាងសង់នេះ ដោយពួកគេយល់ថា វានឹងជួយកាត់បន្ថយការកកស្ទះចរាចរណ៍ក្នុងរាជធានីភ្នំពេញដែលជាបញ្ហាប្រឈមមួយ។ ក៏ប៉ុន្តែប្រពលរដ្ឋគ្រប់រូបគួរតែគោរពច្បាប់ចរាចរណ៍ និងបើកបរដោយការទទួលខុសត្រូវផងដែរ។
ទន្ទឹមនឹងគ្នានេះដែរ ប្រជាពលរដ្ឋមួយចំនួនដែលប្រើប្រាស់ផ្លូវសាធារណៈនាទីក្រុងភ្នំពេញក៏បានលើកឡើងពីក្តីកង្វល់ទាក់ទងនឹងការសាងសង់នេះផងដែរ។
លោកគឹម សក្កដា វ័យ៣៨ឆ្នាំ ជាមន្រ្តីរាជការក្នុងរាជធានីភ្នំពេញ បានឲ្យដឹងថា៖
«វាកាត់បន្ថយនោះ កាត់បន្ថយហើយ! ប៉ុន្តែមិនដឹងថា ប៉ះពាល់ដល់ប្រជាជនច្រើនឬអត់។ ហើយសំណងហ្នឹងវាយ៉ាងម៉េចដែរ។ បើសិនជាថា ធ្វើ គួរតែរកផ្លូវណាផ្សេងទៅ។ អាហ្នឹងកណ្តាលក្រុងហ្នឹង! ព្រោះអីក្រុងយើងតូចដែរ។ វាចាំបាច់ដែរ តែយើងគួរតែរុញទៅកៀនក្រុងដើម្បីឲ្យសេដ្ឋកិច្ច វារត់ទៅតាមហ្នឹងដែរ»។
ប៊ូណេត សុវណ្ណា វ័យ២២ឆ្នាំ ដែលជានិស្សិតឆ្នាំទី២នៃសាកលវិទ្យាល័យកម្ពុជា បានគាំទ្រគម្រោងនេះ។
«គិតថា ល្អ ព្រោះថា ទោះវាលំបាករយៈពេលខ្លី តែពេលវាសាងសង់ហើយ ធ្វើឲ្យយើងអាចធ្វើដំណើរទាន់ពេលវេលា អត់ស្ទះដូចមុន»។
សុផាត បញ្ញា អាយុ២២ឆ្នាំជានិស្សិតសាកលវិទ្យាល័យភ្នំពេញអន្តរជាតិ។ បញ្ញាឲ្យដឹងថា កំណើនប្រជាជន និងកំណើនយានយន្តជាកត្តាបង្កឲ្យមានការកកស្ទះ ដែលតម្រូវឲ្យមានផ្លូវថ្មីល្បឿនលឿននេះ។
«រាល់ថ្ងៃហ្នឹង វាស្ទះច្រើន! កំណើនប្រជាជន កំណើនឡានវាច្រើន! ហើយណាមួយមានអ្នកអត់គោរពច្បាប់ អត់គោរពភ្លើងចរាចរណ៍។ បើបានធ្វើផ្លូវហ្នឹងមួយ វាអាចជួយកាត់បន្ថយការកកស្ទះចរាចរណ៍នេះដែរ»។
គិតមកត្រឹមចុងឆ្នាំ២០១៤នេះ ចំនួនយានជំនិះនៅក្នុងប្រទេសកម្ពុជាមានចំនួនជិត៣លានគ្រឿង ដែលក្នុងនោះមានម៉ូតូជាង២លានគ្រឿង និងមានឡានជាង៤០ម៉ឺនគ្រឿង។ នេះបើយោងតាមទិន្នន័យរបស់ក្រសួងសាធារណការ និងដឹកជញ្ជូន ហើយតួលេខនេះមានការកើនឡើងប្រមាណជា១៥% បើធៀបទៅនឹងឆ្នាំ២០១៣។
ក្នុងសប្តាហ៍នេះ ក្រុមហ៊ុនចិនទួលបន្ទុកគម្រោងសាងសង់ផ្លូវល្បឿនលឿន បានធ្វើការស្ទាបស្ទង់មតិសាធារណជននៅតាមដងផ្លូវសំខាន់ៗក្នុងរាជធានីភ្នំពេញ ចំពោះការបង់ថ្លៃ២ដុល្លារសម្រាប់យានយន្តណាដែលចង់ធ្វើដំណើរលើផ្លូវល្បឿនលឿនគឺ៦០គីឡូម៉ែត្រក្នុងមួយម៉ោងនេះ។
លោក ចាន់ សុផល អ្នកវិភាគសេដ្ឋកិច្ច និងជាប្រធានមជ្ឈមណ្ឌលសិក្សាគោលនយោបាយ បានឲ្យដឹងថា ការបង្កើតឲ្យមានផ្លូវល្បឿនលឿននេះ បានផ្តល់ជាជម្រើសដល់អ្នកប្រើប្រាស់ ថាតើពួកគេចង់ធ្វើដំណើររហ័សដោយបង់ប្រាក់ក្នុងតម្លៃមួយ ឬធ្វើដំណើរតាមផ្លូវធម្មតាដោយឥតគិតថ្លៃ។
«Highway ខ្ញុំយល់ថា ជាការចាំបាច់ទៅទៀត ទៅថ្ងៃមុខទៀត។ បើយើងពឹងទៅលើផ្លូវតែមួយចេញចូលមកអាកាសយានដ្ឋាន វានឹងនាំបញ្ហាកាន់តែធំ។ ហើយវាប៉ះពាល់ដល់ប្រយោជន៍សេដ្ឋកិច្ច ប្រយោជន៍ពាណិជ្ជកម្ម ថែមទាំងប្រយោជន៍ទេសចរទៀត។ ពេលគេខកខានជើងយន្តហោះដោយសារការស្ទះចរាចរ វាបង្កឲ្យមានភាពអវិជ្ជមានដល់មុខមាត់ប្រទេសជាតិទៀត»។
លោកក៏លើកឡើងផងដែរថា៖
«ធម្មតាការធ្វើអ្វីមួយតែងតែមានផលប៉ះពាល់ហើយ ទៅដល់អ្នកដែលត្រូវបាត់បង់ដី ឬទីកន្លែង ដោយសារគម្រោង។ ជាគោលការណ៍ វាទាមទារឲ្យមានសំណង ធ្វើយ៉ាងណាមិនឲ្យអ្នកណាម្នាក់ក្រជាងមុនដោយសារការអភិវឌ្ឍ»។
ជាមួយគ្នានោះដែរ លោក អៀ ចរិយា អ្នកប្រឹក្សាឯករាជ្យផ្នែកសុវត្ថិភាពចរាចរ បានឲ្យដឹងថា ការបង្កើតឲ្យមានផ្លូវ Highway ល្បឿនលឿននេះ ជាជម្រើសត្រឹមត្រូវចំពោះស្ថានភាពចរាចរណ៍កម្ពុជា ដែលកាន់តែមានការកកស្ទះខ្លាំងឡើងៗនៅក្នុងរាជធានីភ្នំពេញនាពេលបច្ចុប្បន្ន។
«អញ្ចឹងគម្រោងដាក់ឲ្យមានផ្លូវ Highway វាជាជម្រើសត្រឹមត្រូវ។ គុណសម្បត្តិនៃផ្លូវ Highway គឺអាចចូលរួមកាត់បន្ថយការកកស្ទះ។ វាអាចជួយពន្លឿនល្បឿននៃការធ្វើដំណើរ ការដឹកជញ្ជូន កាត់បន្ថយពេលវេលាជាច្រើនដែរ។ ប៉ុន្តែមិនមានន័យថា វាអាចកាត់បន្ថយចំនួនគ្រោះថ្នាក់ចរាចរបានទេ»។
អ្នកប្រឹក្សាឯករាជ្យផ្នែកសុវត្ថិភាពចរាចររូបនេះបានលើកឡើងថា ទន្ទឹមនឹងការបង្កើតឲ្យមានផ្លូវ Highway ដើម្បីដោះស្រាយបញ្ហាកកស្ទះចរាចរ គេគួរតែលើកកម្ពស់សេវាដឹកជញ្ជូនសាធារណៈ ព្រមទាំងរៀបចំឲ្យមានផ្លូវសម្រាប់អ្នកថ្មើរជើង និងអ្នកជិះកង់ផងដែរ ដែលអាចរួមចំណែកយ៉ាងសំខាន់ក្នុងការកាត់បន្ថយចំនួនរថយន្តក្នុងរាជធានីភ្នំពេញ។ ជាងនេះទៅទៀត លោកអ៊ា ចរិយាបញ្ជាក់ថា ការចតយានយន្តនៅតាមដងផ្លូវសាធារណៈ និងឥរិយាបទក្នុងការបើកបររបស់ប្រជាពលរដ្ឋកម្ពុជា ដែលខ្វះចំណេះដឹងផ្នែកចរាចរណ៍ ក៏ជាមូលហេតុសំខាន់បង្កការកកស្ទះចរាចរណ៍ដែរ។
ស្របពេលដែលការអភិវឌ្ឍក្នុងក្រុងភ្នំពេញមានរីកដុះដាល ការធ្វើចរាចរក៏មានភាពកកស្ទះជាច្រើនក្នុងពេលប៉ុន្មានឆ្នាំចុងក្រោយនេះ ជាពិសេសពេលព្រឹក ពេលថ្ងៃត្រង់និងពេលល្ងាចគឺពេលដែលប្រជាពលកម្ពុជាភាគច្រើនចេញពីកន្លែងធ្វើការទៅគេហដ្ឋានរៀងៗខ្លួន៕
