ភ្ជាប់​ទៅ​គេហទំព័រ​ទាក់ទង

កត្ដា​មួយ​ចំនួន​ធ្វើ​ឲ្យ​ម្ហូប​ឡើង​ថ្លៃ​អាច​មាន​កុប្បកម្ម


តម្លៃ​ម្ហូប​អាហារឡើងថ្លៃ និង​អំពើ​ពុករលួយ​ បាន​នាំ​ឲ្យ​​ក្រុម​​ប្រឆាំង​​ធ្វើ​បាតុកម្ម​​ក្នុង​ទីក្រុងញូឌែលី​ ក្នុងខែធ្នូ ឆ្នាំ២០១០។

វ៉ាស៊ីនតោន៖ ឆ្នាំ២០១០បញ្ចប់​ដោយ​តម្លៃ​ម្ហូបអាហារ​បាន​ឡើង​ថ្លៃ​នៅ​ក្នុង​ផ្នែក​ជា​ច្រើន​របស់​ពិភពលោក ហើយ​នឹង​ឃ្លាំង​ស្តុក​ម្ហូប​អាហារ​មិន​គ្រប់គ្រាន់​។ ការណ៍​នេះ​ បាន​ធ្វើ​ឲ្យ​ពួក​អ្នក​ជំនាញការ​ខ្លះមាន​ការ​ព្រួយ​បារម្ភ​ថា​ ការ​ភ្ញាក់​ផ្អើល​មួយ​ទៀត ​អាច​ធ្វើ​ឲ្យ​តម្លៃ​ម្ហូប​អាហារ​វិល​ត្រឡប់​ទៅ​កាន់​កម្រិត​ដែល​បាន​ធ្វើ​ឲ្យ​មាន​អំពើ​ហិង្សាក្នុង​ឆ្នាំ​២០០៨​ ។

ឆ្នាំ២០០៨ កុប្បកម្ម​បាន​ផ្ទុះ​ឡើង​យ៉ាង​ហោចណាស់​ក៏​ក្នុង​ប្រទេស​ជាង​១០​នៅពេល​ដែល​តម្លៃ​ម្ហូប​អាហារ​ឡើង​ថ្លៃ​គួរ​ឲ្យ​កត់​សម្គាល់​។នៅឆ្នាំ​២០១០​ អាកាសធាតុ​ល្អ​ បាន​ធ្វើ​ឲ្យ​មាន​ការ​ប្រមូល​ផល​បាន​ច្រើន​ឡើង​ហើយ​តម្លៃ​ម្ហូប​អាហារ​បាន​ធ្លាក់​ចុះ​។

ក៏ប៉ុន្តែ​ នៅ​ក្នុងខែ​កុម្ភៈ​ លោក​ ហ្សាក់ឌីអូវ (Jacques Diouf) ប្រធាន​អង្គការ​ម្ហូបអាហារ​ និង​កសិកម្ម​របស់​អង្គការ​សហប្រជាជាតិ​ បាន​ប្រាប់​ វីអូអេ​ថា​ ភាព​គ្រោះថ្នាក់​មិន​ទាន់​ផុត​ទេ​។

«យើងឃើញ​មាន​កត្តា​ផ្សេង​ៗទៀត​ដែល​បាន​ធ្វើ​ឲ្យ​មាន​វិបត្តិ​តម្លៃ​។ កត្តា​ទាំង​អស់​នេះ​ មិន​បាន​ផ្លាស់​ប្តូរ​ទេ​»។

លោក​ Diouf​ ឌីអូវ​និយាយ​ថា​ ឥន្ធនៈជីវសាស្ត្រ​ នៅ​កំពុង​ប្រកួត​ប្រជែង​ជាមួយ​កសិផល​សម្រាប់​បរិភោគ​។ ១ភាគ៣​នៃ​គ្រាប់​ពោត​របស់​សហរដ្ឋ​អាមេរិក​ បាន​ធ្វើ​ជា​អេតាណុល​នៅ​ឆ្នាំ​នេះ​។

ថាមពលនៅ​តែ​មាន​តម្លៃ​ខ្ពស់​ ហើយ​វា​បាន​ធ្វើ​ឲ្យ​ប៉ះពាល់​ដល់​តម្លៃ​ម្ហូប​អាហារ​។ ប្រជា​ពលរដ្ឋ​ក្នុង​សាកលលោក​បាន​កើន​ឡើង​ ហើយ​អាកាសធាតុ​ក៏​មិន​អាច​ព្យាករណ៍​បាន។

«ដូច្នេះ​ ប្រសិនបើ​យើង​មាន​បញ្ហា​ ហើយ​ខ្ញុំ​បន់ស្រន់​កុំ​ឲ្យ​មាន​បញ្ហា​ដ៏ធ្ងន់ធ្ងរ ​គឺ​ទឹក​ជំនន់​និង​ការរាំង​ស្ងួតក្នុង​បណ្តា​ប្រទេស​នាំ​ចេញ​សំខាន់​ៗ​ យើង​ចង់​ឲ្យ​ត្រឡប់​ដូច​ដើម​វិញ​ហើយ​»។

បន្ទាប់​មក​ការ​រាំង​ស្ងួត​ក្នុង​តំបន់​សមុទ្រ​ខ្មៅ​ បាន​ធ្វើ​ឲ្យ​ធ្លាក់​ចុះ​ផល​ដំណាំ​ស្រូវ​សាលីចំនួន​ ១ភាគ៣​ក្នុង​ប្រទេស​រុស្ស៊ី​។

លោកហ្សិនហ្កិន ហ្វាន់​ (Shenggen Fan) នាយក​វិទ្យាស្ថាន​ស្រាវជ្រាវ​គោល​នយោបាយម្ហូបអាហារ​អន្តរជាតិនិយាយ​ថា​ កាល​ពីខែ​សីហា​ រុស្ស៊ី​ បាន​ហាមឃាត់​ការ​នាំ​ចេញ​ស្រូវ​សាឡី​ ហើយ​បាន​ធ្វើ​ឲ្យ​ស្ថានការណ៍​កាន់តែ​អាក្រក់ឡើង។

«ការរាំងស្ងួត​បាន​ធ្វើ​ឲ្យ​ប្រទេស​រុស្ស៊ី​ហាមឃាត់​ការនាំចេញ​។ ហើយ​ ការហាម​ឃាត់​របស់​ប្រទេស​រុស្ស៊ី​បាន​ធ្វើ​ឲ្យ​តម្លៃ​ម្ហូបអាហារ​ឡើង​ថ្លៃ​»។

តម្លៃ​ខុសគ្នា ​ទៅ​តាម​តំបន់​។ ក៏ប៉ុន្តែ​ អង្គការ​ FAO ​ប្រាប់​ឲ្យដឹង​ថា​ តម្លៃ​ស្រូវ​សាលី​ និង​គ្រាប់​ពោត​សាកល​លោក​បាន​កើនឡើង​ជិត ​៥០%​ កាល​ពី​ឆ្នាំទៅ ។

ពួក​អ្នក​ជំនាញ​ការ​ ព្យាករណ៍​ថា​ តម្លៃ​រឹត​តែ​ខ្ពស់ទៀតនៅ​ឆ្នាំ​ក្រោយ​ ។ តម្លៃនៅ​តែ​មិន​ទាន់​វិល​ត្រឡប់​ទៅ​កាន់​ទី​កន្លែង​កាល​ពី​២​ឆ្នាំ​មុន​ទេ​ មួយ​ផ្នែក​ធំ​ភាគហ៊ុន​គ្រាប់​ធញ្ញជាតិ​នៅ​ឆ្នាំ​នេះ​ថ្លៃ​ជាង​កាល​ពី​ឆ្នាំ​២០០៨​ ។

ក៏​ប៉ុន្តែ​ លោក​ហ្វាន់ ​និយាយ​ថា​ មិន​មាន​ការធានា​សម្រាប់​ឆ្នាំ​ខាងមុខទៀតទេ​។

«ខ្ញុំ​គិត​ថា​ យើង​ប្រាកដ​ជា​ចាំបាច់​ចាត់​វិធានការជា​បន្ទាន់​ខ្លះ។ ប្រសិន​បើ​យើង​ មិន​ចាត់​វិធានការ​ទេ​ ខ្ញុំ​ធានា​ជាមួយ​អស់​លោក​ថា​ យើង​ នឹង​មាន​វិបត្តិ​ម្ហូប​អាហារ​មួយ​ទៀត​»។

លោក​ ហ្វាន់​និយាយ​ថា​ ក្នុង​រយៈ​ពេល​យូរ​ ពិភព​លោក​ នឹង​ត្រូវ​ការ​ចិញ្ចឹមមនុស្ស​កាន់​តែ​ច្រើន​ឡើង​ដោយសារ​ដី​ ទឹក​ហើយ​នឹង​ធនធាន​មិន​គ្រប់គ្រាន់ដូច្នេះ​ ប្រទេស​នានា​ ចាំបាច់​ជួយ​កសិករ​របស់​ខ្លួន​ឲ្យ​ផលិត​ម្ហូប​អាហារ​ឲ្យ​បាន​កាន់​តែ​ច្រើន​ឡើង។

ក្នុង​រយៈ​ពេល​ខ្លី​ ទី​ផ្សា​រ​ កំពុង​មើល​អាកាសធាតុ​ក្នុង​តំបន់​អាមេរិក​ខាងត្បូង​ ។ការ​ប្រមូល​ផល​មិន​បាន​ល្អ​នៅ​ទីនោះ​ ក៏អាច​ជំរុញ​ឲ្យ​ម្ហូប​អាហា​រ​ឡើង​ថ្លៃ​ដែរ​។

ក៏ប៉ុន្តែ​ លោក​ហ្សន អិនដឺសុន (John Anderson) ជា​អ្នកសេដ្ឋវិទូនិយាយ​ថា​ ការ​វិល​ត្រឡប់ទៅកាន់តម្លៃ​ខ្ពស់​ក្នុង​ឆ្នាំ​២០០៨ ​ជា​ការ​ជៀស​មិនរួច​។

«ជា​ការ​ពិត​ យើង​ខិត​កាន់​តែ​ជិត​ទៅ​នឹង​ស្ថានភាព​ដែល​យើង​មិន​ចង់​បាន ​ក៏​ប៉ុន្តែ​ដោយ​ពេល​វេលា​ឆាប់​ពេក​ឲ្យ​យើង​និយាយ​ថា​ យើង​ពិតជា​មានការ​ឡើងថ្លៃ​ម្ហូប​អាហារ​ក្នុង​កម្រិត​ខ្ពស់​»។

លោក​ អិនដឺសុននិយាយ​ទៀត​ថា​ កសិករ​ បាន​ឆ្លើយ​តប​ទៅ​នឹង​ការ​ឡើង​ឡើង​ថ្លៃ​ខ្ពស់​នោះ​ដោយ​ការ​ដាំ​ដុះ​រឹតតែ​ច្រើន​ឡើង​។ ហើយ​ ការ​រារាំង​មហន្តរាយកាន់​តែ​ច្រើន​ឡើង​ដោយសារអាកាសធាតុ​ ដែល​ធ្វើ​ឲ្យ​តម្លៃ​ធ្លាក់​ចុះ​ជា​យថាហេតុ។លោក​និយាយ​ថា​ នេះ​មិនមែន​ជា​លើក​ទី​១​ទេ​ដែល​កសិករ​បាន​ប្រឈម​មុខ​នឹងបញ្ហា​ដ៏​លំបាក​នេះ​។

«យើង​កំពុង​មាន​ប្រជាពលរដ្ឋ​កើន​ឡើង​ហើយ​នឹង​ធនធាន​មានកម្រិត​ក្នុងរយៈ​ពេល​១​ម៉ឺន​ឆ្នាំ​ចុង​ក្រោយ​នេះ​។ ហើយ​ យើង​ បាន​រៀបចំ​ចាត់ចែង​ដើម្បី​ដោះ​ស្រាយ​តាមរយៈ​ការឆ្នៃ​ប្រឌិត​ ហើយ​និងធ្វើ​ឲ្យ​កាន់​តែ​ល្អ​ប្រសើរ​ឡើង​នូវ​បច្ចេកវិទ្យា​របស់​យើង​»​។

ក៏​ប៉ុន្តែ ​លោក ​និយាយ​ថា​ យើង​ត្រូវការ​ពេល​វេលា​ មុន​ពេល​ការធ្វើ​ឲ្យ​ល្អ​ប្រ​សើរ​ឡើង​ ដែល​អាច​ប៉ះ​ពាល់​ដល់​តម្លៃ​ទី​ផ្សារ​។ ក្នុង​ខណៈ​នោះ​ដែរ​ លោក​រំពឹង​ថាតម្លៃ​ម្ហូប​អាហារ​នឹង​ឡើង​ថ្លៃ​ យ៉ាង​ហោច​ណាស់​ក៏​បន្តិចបន្តួច​ដែរ​ក្នុង​រយៈ​ពេលប៉ុន្មានខែ​ខាង​មុខ​ទៀត​នេះ​។

ប្រែ​សម្រួលដោយ​លោក​ជឹង​ ប៉ូជីន

XS
SM
MD
LG