Hello VOA៖ យុទ្ធនាការដោះស្រាយសំណុំរឿងកកស្ទះនៅតុលាការជោគជ័យ ប៉ុន្តែមិនបានបន្ថយចំនួនអ្នកជាប់ឃុំ
បន្ទាប់ពីចូលកាន់តំណែងកាលពីខែឧសភាឆ្នាំ២០២០ រដ្ឋមន្ត្រីក្រសួងយុត្តិធម៌ថ្មី គឺលោក កើត រិទ្ធ បានដាក់ចេញយុទ្ធនាការដោះស្រាយសំណុំរឿងកកស្ទះជិត៤ម៉ឺននៅតាមតុលាការនានានៅទូទាំងប្រទេស។ យុទ្ធនាការនេះ បានបិទបញ្ចប់កាលពីចុងខែមិថុនា ឆ្នាំ២០២១នេះ។ ក្រសួងបានប្រកាសថា បានដោះស្រាយសំណុំរឿងព្រហ្មទណ្ឌកកស្ទះសរុបជាង ៣៧.៩០០ សំណុំរឿង និងសំណុំរឿងព្រហ្មទណ្ឌចូលថ្មីជាង ៦២.៨០០ សំណុំរឿងដែលត្រូវជា៧៨%នៃសំណុំរឿងចូលថ្មីជាង៨០.៤០០។ លោក ឱក សេរីសោភក្តិ៍ អ្នកឯកទេសផ្នែកអភិបាលកិច្ចល្អលើកឡើងនៅក្នុងកម្មវិធី Hello VOA នៅថ្ងៃចន្ទ ទី២៣ ខែសីហា ឆ្នាំ២០២១ ដែលមានលោក ម៉ែន គឹមសេង ជាអ្នកសម្របសម្រួលថា បើទោះបីជាមានកិច្ចខិតខំប្រឹងប្រែងនេះក៏ដោយ ក៏នៅក្នុងពន្ធនាគារនៃប្រទេសកម្ពុជា នៅតែមានអ្នកជាប់ឃុំរង់ចាំការកាត់ទោស និងសាលក្រមស្ថាពរមានរហូតដល់ទៅជាង៧០%នៃអ្នកជាប់ពន្ធនាគារទាំងអស់៕