ភ្នំពេញ៖ នៅថ្ងៃអង្គារនេះ សមាគមសិទ្ធិមនុស្សអាហុក (ADHOC) បានអំពាវនាវដល់រដ្ឋាភិបាលឱ្យបង្កើតយន្តការពិសេសមួយសម្រាប់គ្រប់គ្រងទីភ្នាក់ងារជ្រើសរើសពលករខ្មែរទៅធ្វើការនៅបរទេស ដើម្បីចៀសវាងការរំលោភសិទ្ធិ និងសេរីភាពផ្សេងៗរបស់ពួកគេ។
កម្ពុជាមានទីភ្នាក់ងារជ្រើសរើសពលករទៅធ្វើការនៅក្រៅប្រទេសជាង៣០ ដែលទទួលបាន អាជ្ញាប័ណ្ណត្រឹមត្រូវពីក្រសួងការងារ។ ប៉ុន្តែទីភ្នាក់ងារមួយចំនួនត្រូវបានទទួលរងនូវការចោទប្រកាន់អំពីការជួញដូរមនុស្សតាមរយៈការជ្រើសរើសពលករទៅធ្វើការនៅក្រៅប្រទេសនេះ។
លោកស្រី គា សុផល មេធាវីប្រចាំសមាគមសិទ្ធិមនុស្សអាហុក បានថ្លែងប្រាប់ក្រុមអ្នកយកព័ត៌មានថា អង្គការសង្គមស៊ីវិលចង់ឱ្យមានច្បាប់ពិសេសមួយសម្រាប់គ្រប់គ្រងពលករខ្មែរចំណាកស្រុក ខណៈដែលពលការនីខ្មែរបានទទួលរងការរំលោភផ្សេងៗពីទីភ្នាក់ងារជ្រើសរើសពលករនៅក្នុងស្រុក និងថៅកែនៅក្នុងប្រទេសម៉ាឡេស៊ី។
ក្នុងរយៈពេលប្រាំបីខែដើមឆ្នាំ២០១០នេះ សមាគមសិទ្ធិមនុស្សអាដហុកបានទទួលពាក្យបណ្តឹង២៨ករណី អំពីការរំលោភសិទ្ធិរបស់ពលករខ្មែរចំណាកស្រុកពីថៅកែរបស់ពួកគេនៅម៉ាឡេស៊ី ដូចជាការចាប់រំលោភសេពសន្ធវះ ការធ្វើទារុណកម្មលើផ្លូវកាយ និងផ្លូវចិត្ត ការបង្ខំឱ្យធ្វើការ២៤ម៉ោង ក្នុងមួយថ្ងៃ ការបង្អត់ចំណីអាហារ និងការរំលោភសិទ្ធិផ្សេងៗទៀត ហើយ២៣ករណី អំពីការរំលោភ សិទ្ធិពលករពីទីភ្នាក់ងារជ្រើសរើសពលករនៅក្នុងប្រទេសកម្ពុជា ដូចជាការបង្ខំឱ្យចុះកិច្ចសន្យាខ្ចីប្រាក់ របស់ទីភ្នាក់ងារកិច្ចសន្យាការងារ និងផ្តាច់ការទំនាក់ទំនងជាមួយសមាជិកគ្រួសារមុនពេលចេញទៅធ្វើការនៅក្រៅប្រទេស។
សមាគមសិទ្ធិមនុស្សអាដហុក បានថ្លែងបញ្ជាក់ថា កម្ពុជាត្រូវមានយន្តការត្រួតពិនិត្យលក្ខខ័ណ្ឌ លិខិតស្នាម និងកិច្ចសន្យា រវាងក្រុមហ៊ុន និងពលករ។ សមាគមសិទ្ធិមនុស្សអាដហុក បានបន្ថែមថា ក្រុមហ៊ុនជ្រើសរើសពលករទៅធ្វើការក្រៅប្រទេសទាំងអស់ត្រូវបើកឱកាសឱ្យស្ថាប័នពាក់ព័ន្ធ និងអង្គការសង្គមស៊ីវិលចូលពិនិត្យនៅក្នុងកន្លែង ដែលពលករស្នាក់នៅ មុនពេលពួកគេចេញទៅក្រៅប្រទេស។
លោកសុខ ច័ន្ទភក្តី អគ្គលេខាធិការនៃទីភ្នាក់ងារជ្រើសរើសពលករកម្ពុជា ដែលមានទីភ្នាក់ងារជាសមាជិកចំនួន១៦ បានចាត់ទុកការផ្តួចផ្តើមគំនិតបង្កើតយន្តការពិសេសសម្រាប់គ្រប់គ្រងទីភ្នាក់ងារជ្រើសរើសពលករទៅធ្វើការនៅក្រៅប្រទេសនេះថា ជាឧបករណ៍ច្បាប់ដ៏សំខាន់ ដើម្បីការពារកិត្តិយស និងសេចក្តីថ្លៃថ្នូររបស់ពលករ និងទីភ្នាក់ងារ។ លោកថ្លែងថា៖
«ចាប់ពីថ្ងៃទី១ ខែតុលា ពលករ ដែលមានបំណងមកដាក់ពាក្យទៅធ្វើការនៅក្រៅប្រទេស ត្រូវមានសោហ៊ុយសម្រាប់ការធ្វើដំណើរ ការពិនិត្យសុខភាព និងឯកសារច្បាប់នានា។ ទាល់តែមានលក្ខណៈ សម្បត្តិគ្រប់យ៉ាងទើបក្រុមហ៊ុនទទួលយកបាន»។
អនុក្រឹត្យលេខ៥៧ ស្តីពីការបញ្ចូនពលករខ្មែរទៅធ្វើការនៅក្រៅប្រទេស ដែលរដ្ឋាភិបាលកម្ពុជាជាអ្នកទទួលខុសត្រូវ ចំពោះការធានាដល់សិទ្ធិសេរីភាព និងសុវត្ថិភាពរបស់ពលករដែលទៅធ្វើការនៅក្រៅប្រទេស។
សារាចររបស់ក្រសួងការងារ បានចេញបម្រាមឲ្យទីភ្នាក់ងារជ្រើសរើសពលករទៅធ្វើការនៅក្រៅប្រទេសឈប់ផ្តល់ប្រាក់កម្ចីដល់ឪពុកម្តាយ និងគ្រួសាររបស់ពលករ និងបង្កើតការគ្រប់គ្រងបណ្តាញភ្នាក់ងារផ្សព្វផ្សាយដំណឹងជ្រើសរើសពលករ។
លោកសុខ ច័ន្ទភក្តី បានថ្លែងថា ទីភ្នាក់ងារជ្រើសរើសពលករនឹងគោរពតាមការណែនាំរបស់ក្រសួងការងារ។ លោកបន្តថា៖
«ភ្នាក់ងារជ្រើសរើសពលករមួយចំនួន បានផ្តល់ប្រាក់កម្ចីដល់ពលករ។ នៅពេលដែលពលករសុំឈប់ ភ្នាក់ងារគាបសង្កត់យកប្រាក់មកវិញ។ បើយើងផ្អែកទៅលើផ្លូវច្បាប់ ការផ្តល់ប្រាក់កម្ចីបែបនេះហាក់ដូចជា ចូលការជួញដូរមនុស្សមែន»។
លោកញ៉ែម គឹមហួយ ប្រធានការិយាល័យរកការងារនៃក្រសួងការងារបានថ្លែងថា ក្រសួងបានណែនាំទីភ្នាក់ងារជ្រើសរើសពលករទាំងអស់ឱ្យបង្កើតវិធានផ្ទៃក្នុង និងការផ្សព្វផ្សាយដំណឹងជ្រើសរើសពលកររួមមួយ ដើម្បីចៀសវាងការរំលោភសិទ្ធិរបស់ពលករ។