ភ្ជាប់​ទៅ​គេហទំព័រ​ទាក់ទង

បច្ចេកទេសបៃតងរបស់អាមេរិកចាប់ផ្តើមហុចផល


លោក​ប្រធានាធិបតី​បារ៉ាក់​ អូបាម៉ា​ ធ្វើ​សន្និសិទ​កាសែត​ ថ្ងៃ​ទី​១៥​ ខែ​កក្កដា ​​ឆ្នាំ​២០១១។

ការងារ​ភាគ​ច្រើន​ដែល​ពាក់​ព័ន្ធ​នឹង​បច្ចេក​ទេស​បៃតង​ត្រូវ​បាន​បង្កើត​នៅ​ក្នុង​ប្រទេស​ចិន​ឬ​ក៏​ទ្វីប​អាស៊ី

ការក្រឡេក​មើល​ថ្មី​មួយ​ទៅ​លើ​អ្វី​ដែល​គេ​ហៅ​ថា​ បច្ចេកវិទ្យា​បៃតង​ ឬ​ក៏​បច្ចេកវិទ្យា​ដែល​មិន​ប៉ះ​ពាល់​ដល់​បរិស្ថាន​ បង្ហាញ​ថា​ បច្ចេកវិទ្យា​នេះ​កំពុង​តែ​ផ្តល់​ប្រយោជន៍​ដល់​អ្នក​ធ្វើ​ការ​អាមេរិកាំង។នៅ​ទូទាំង​សហរដ្ឋ​អាមេរិក​ ក្រុមហ៊ុន​ពាណិជ្ជកម្ម​និង​អង្គការ​នានា​កំពុង​តែ​ចាប់​ផ្តើម​ធ្វើ​ការ​ផ្លាស់​ប្តូរ​ ដោយ​ឈាន​ទៅ​ចាប់​យក​ប្រភព​ថាមពល​ស្អាត។

កន្លែង​បែប​នោះ​មាន​ជា​ឧទាហរណ៍​ដូចជា​ គ្លីនិក​ម៉េយ៉ូ (Mayo)​ដែល​ល្បីល្បាញ​លើ​ពិភពលោក​នៅ​ភាគ​ខាង​ជើង​រដ្ឋ​មីនីសូតា (Minnesota)។

ឥឡូវ​នេះ​ សហជីព​ពាណិជ្ជកម្ម​និង​អង្គការ​នានា​មាន​លទ្ធភាព​ប្រើប្រាស់​បច្ចេកទេស​បៃតង​ហើយ។វេជ្ជ​បណ្ឌិត​ ចន ប្លែក(John Black)​ ស្ថិត​នៅ​ក្នុង​គណៈកម្មការ​បច្ចេកទេស​បៃតង​របស់​គ្លីនិក​ម៉េយ៉ូ​ និយាយថា​ចំណោទ​នេះ​គឺ​សាមញ្ញ។

«យើង​ត្រូវ​គិត​ពី​ភាព​លៃ​លក​អាច​ប្រើ​ប្រាស់​បាន​ ហើយ​យើង​គួរ​មាន​ឱកាស​សន្សំ​ថវិកា​បាន​តាម​រយៈ​ការ​ប្រើប្រាស់​បច្ចេកទេស​បៃតង​នេះ​នៅ​ក្នុង​គ្លីនិក​ម៉េយ៉ូ»។

របាយការណ៍​មួយ​ដែល​ចេញ​ផ្សាយ​កាល​ពី​ថ្ងៃ​ពុធ ដោយ​ស្ថាប័ន​Brookings​ ដែល​មាន​ទី​តាំង​នៅ​រដ្ឋ​ធានី​វ៉ាស៊ីនតោន​ និយាយថា​ តម្រូវការ​ប្រើប្រាស់​ថាមពល​បៃតង​គឺ​ជា​ជម្រើស​មួយ​ដែល​មាន​ប្រយោជន៍​ផង​ដែរ។ ​របាយការណ៍​នេះ​បន្ថែម​ថា​ សេដ្ឋកិច្ច​បៃតង​នេះ​កំពុង​តែ​ផ្តល់​ការងារ​ដល់​ពលរដ្ឋ​អាមេរិកាំង​ចំនួន​២,៧ លាន​នាក់​ ដោយពួក​គេ​អាច​ទទួល​បាន​ប្រាក់​កំរៃ​ខ្ពស់​ហើយ​ពុំ​ចាំបាច់​មាន​ការ​អប់រំ​ខ្ពស់។

ម៉ាក មូរ៉ូ (Mark Muro)​ គឺ​ជា​នាយក​កម្មវិធី​គោល​នយោបាយ​វិទ្យាស្ថាន​Brookings។ លោក​បាន​មាន​ប្រសាសន៍​ថា៖

«ជា​សរុប​បច្ចេកទេស​បៃតង​នេះ​កំពុង​តែ​រីក​លូតលាស់​លឿន​ជា​មធ្យម​ ប៉ុន្តែ​មួយ​ចំណែក​ខ្លះ​ទៀត​កំពុង​តែ​រីក​ដុះដាល​យ៉ាង​លឿន​គួរ​ឲ្យ​កត់​សម្គាល់»។

មូរ៉ូ ​បន្ថែម​ថា​សហរដ្ឋ​អាមេរិក​កំពុង​ស្ថិត​ក្នុង​ស្ថានភាព​មួយ​ដែល​អាច​ទទួល​យក​បាន​ផល​ប្រយោជន៍​ទាំង​ស្រុង​ពី​បច្ចេកទេស​នេះ។

«ការ​លូតលាស់​ដែល​យើង​បាន​ឃើញ​នៅ​ក្នុង​ផ្នែក​នៃ​បច្ចេកវិទ្យា​ស្អាត​និង​ដែល​អាច​កកើត​វិញ​បាន​នេះ​មាន​លក្ខណៈ​គួរ​ឲ្យ​ចាប់​អារម្មណ៍​ជា​ខ្លាំង​ និង​ត្រូវ​បាន​គេ​ឃើញ​ថា​នឹង​រីក​ធំធាត់​យ៉ាង​លឿន​ក្នុង​សាកលលោក​ ហើយ​ដែល​សហរដ្ឋ​អាមេរិក​ចាំបាច់​ចាប់​ផ្តើម​ពង្រឹង​ឧស្សាហ​កម្ម​នេះ»។

ប៉ុន្តែ​ លោក ខេន ហ្គ្រីន (Ken Green)​ អ្នក​វិទ្យាសាស្រ្ត​ផ្នែក​បរិស្ថាន​និង​ជា​អ្នក​សិក្សា​នៅ​វិទ្យាស្ថាន​សហគ្រាស​អាមេរិក​ និយាយ​ថា​ការ​រីក​លូតលាស់​នៃ​ការងារ​ទាក់ទង​នឹង​ថាមពល​ស្អាត​ អាច​នឹង​មិន​គ្រប់គ្រាន់​សម្រាប់​ធ្វើ​ឲ្យ​ប្រសើរ​ឡើង​នូវ​សេដ្ឋកិច្ច​ដែល​កំពុង​តែ​ពិបាក​នេះ​បាន​ទេ។

លោក ហ្គ្រីន ​ និយាយ​ថា​បើ​ទោះ​ជា​មាន​ការគាំ​ទ្រ​និង​មូលនិធិ​ច្រើន​ជាង​មុន​ពី​រដ្ឋាភិបាល​ក៏​ដោយ ​ការវិនិយោគ​លើ​ថាមពល​ស្អាតដូច​ជា​កសិដ្ឋាន​ដើរ​ដោយ​ខ្យល់​ នឹង​នៅ​តែ​ជួប​ឧបសគ្គ។

«ការងារ​ភាគ​ច្រើន​ដែល​ពាក់​ព័ន្ធ​នឹង​បច្ចេក​ទេស​បៃតង​ត្រូវ​បាន​បង្កើត​នៅ​ក្នុង​ប្រទេស​ចិន​ឬ​ក៏​ទ្វីប​អាស៊ី​ដោយសារ​តែ​នៅ​ទី​បំផុត​គឺ​តម្លៃ​ពលកម្ម​មាន​តម្លៃ​ថោក។ ​ហើយ​ពួក​គេ​ត្រូវ​ប្រឈម​មុខ​នឹង​ច្បាប់​បរិស្ថាន​ដែល​មិន​តឹង​រឹង»។

បើ​ទោះ​ជា​យ៉ាង​ណា​ លោក​ប្រធានា​ធិបតី​ បារ៉ាក់​ អូបាម៉ា​ បាន​សន្យា​ថា​នឹង​ជំរុញ​ឲ្យ​មាន​មូលនិធិ​សម្រាប់​បច្ចេក​វិទ្យា​បៃតង​កាន់​តែ​ច្រើន​ឡើង​ ហើយ​និយាយ​ថា​សហរដ្ឋ​អាមេរិក​ត្រូវ​នាំ​មុខ​គេ​ក្នុង​វិស័យ​បច្ចេកវិទ្យា​ថាមពល​ស្អាត​ ដើម្បី​បង្កើត​នូវ​អ្វី​ដែល​លោក​ហៅ​ថា​ «អាមេរិក​ក្នុង​សតវត្សរ៍​ថ្មី​មួយ​ទៀត»៕

ប្រែសម្រួល​ដោយលោក​ បូរី ស៊ីលីវណ្ណ

XS
SM
MD
LG