ខណៈដែលសហភាពអឺរ៉ុបកំពុងត្រៀមចេញសេចក្តីរាយការណ៍លើកទី២ វាយតម្លៃលើស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ក្រោមឋានៈអនុគ្រោះពន្ធ«អ្វីៗទាំងអស់លើកលែងតែអាវុធ» ឬហៅកាត់ថា (EBA) សមាគមកាត់ដេរបានព្រមានម្តងទៀតពីហានិភ័យនៃការបាត់បង់ឋានៈអនុគ្រោះពន្ធ EBA របស់កម្ពុជា។ នេះបើតាមសេចក្តីរាយការណ៍មួយរបស់ទីភ្នាក់ងារព័ត៌មាន Reuters។
សភាពាណិជ្ជកម្មអឺរ៉ុប បានសន្និដ្ឋានថា មនុស្សយ៉ាងហោចណាស់ ៩ម៉ឺននាក់ អាចនឹងបាត់បង់ការងារធ្វើ បើសិនជាសហភាពអឺរ៉ុបសម្រេចផ្អាក ឬដកឋានៈអនុគ្រោះពន្ធ ដែលអនុញ្ញាតឲ្យកម្ពុជានាំចូលភាគច្រើននៃផលិតផលក្នុងស្រុករបស់ខ្លួន ដោយមិនបាច់បង់ពន្ធ។ វិស័យកាត់ដេរបានផ្តល់ការងារយ៉ាងហោចណាស់ចំនួន៧សែនដល់ប្រជាពលរដ្ឋកម្ពុជា ជាពិសេសស្ត្រី។
លោក ខេន លូ អគ្គលេខាធិការនៃសមាគមរោងចក្រកាត់ដេរកម្ពុជា បានប្រាប់សារព័ត៌មាន Reuters ថា គិតត្រឹមពាក់កណ្តាលឆ្នាំ២០១៩ តម្លៃនៃការនាំចេញទៅកាន់អឺរ៉ុបបានធ្លាក់មកត្រឹមតែ ៦០០លានដុល្លារអាមេរិក បើធៀបនឹងពាក់កណ្តាលឆ្នាំមុន។ ការនាំចេញផលិតផលកម្ពុជាទៅសហភាពអឺរ៉ុបក្នុងមួយឆ្នាំៗ មានតម្លៃជាទឹកប្រាក់សរុបជាង៥ពាន់លានដុល្លារអាមេរិក។
លោក ខេន លូ បានលើកឡើងថា៖ «យើងបានឃើញផលប៉ះពាល់ដោយសារតែការគំរាមកំហែងនៃការដក [ឋានៈអនុគ្រោះពន្ធ] នេះរួចទៅហើយ»។ លោកក៏បានសន្និដ្ឋានថា កម្ពុជានឹងប្រឈមបញ្ហាខ្វះការងារធ្វើនៅឆ្នាំ២០២០ បើសិនជាសហភាពអឺរ៉ុបសម្រេចផ្អាក ឬដកឋានៈអនុគ្រោះពន្ធ EBA ចេញពីកម្ពុជាមែននោះ។
រីឯក្រុមហ៊ុនវិនិយោគទុន ដូចជា H&M ក៏បានឲ្យដឹងថា ពួកគេបានត្រៀមខ្លួនផ្លាស់ប្តូរទីតាំងផលិតកម្មរបស់ពួកគេទៅប្រទេសចិន ឬឥណ្ឌូនេស៊ី បើសិនជាកម្ពុជាបាត់បង់ឋានៈអនុគ្រោះពន្ធពីសហភាពអឺរ៉ុប៕
