អង្គការសិទ្ធិអ្នកកាសែតអន្តរជាតិមួយបានបង្ហាញរូបភាពខ្មៅងងឹតមួយនៃសេរីភាពព័ត៌មាននៅឆ្នាំនេះក្នុងប្រទេសចិន។ សហព័ន្ធអន្តរជាតិនៃក្រុមអ្នកកាសែតនិយាយថា កាលពីឆ្នាំ២០១០ រដ្ឋាភិបាលចិនបានបង្កើនកិច្ចខិតខំប្រឹងប្រែងរបស់ខ្លួនដើម្បីបំបែកក្រុមប្រឆាំងបណ្តាលមកពីបញ្ហាមួយចំនួនចាប់តាំងពីកំណើនអតិផរណារហូតដល់អំពើពុករលួយដែលកើនខ្លាំងទ្បើងៗ។
សហព័ន្ធអន្តរជាតិនៃក្រុមអ្នកកាសែតនិយាយថាឆ្នាំ២០១០ជាឆ្នាំអាក្រក់មួយសម្រាប់សេរីភាពបណ្តាញផ្សាយព័ត៌មានក្នុងប្រទេសចិន ហើយព្រមានថាឆ្នាំនេះនឹងមានភាពអាប់អួរដែរ។ របាយការណ៍ប្រចាំឆ្នាំរបស់សហព័ន្ធនេះឲ្យដឹងថាមន្ទីរឃោសនាមជ្ឈឹមរបស់គណបក្សកុម្មុយនិស្តបានចេញបទបញ្ជាជាច្រើនដើម្បីរឹតត្បឹតលើបណ្តាញផ្សាយព័ត៌មានកាលពីឆ្នាំទៅមិញ។
អ្នកស្រី សេរេណាដ វូ (Serenade Woo) អ្នកសម្របសម្រួលគម្រោងការរបស់សហព័ន្ធនេះសម្រាប់ក្រុងហុងកុង និងប្រទេសចិននិយាយថា បទបញ្ជាបានត្រូវបន្តឹងថែមទៀតនៅពេលលោក លីវ ស្សាវបូ (Liu Xiaobo) បានទទួលរង្វាន់ ណូបែលសន្តិភាពកាលពីឆ្នាំទៅមិញ។ អ្នកស្រីបន្តថា៖
«រដ្ឋាភិបាលកណ្តាលនៃប្រទេសចិននៅតែចេញបទបញ្ជាទាក់ទិននឹងបញ្ហាមួយចំនួន ហើយពួកគេនៅតែពង្រីកការត្រួតត្រារបស់ពួកគេលើបណ្តាញផ្សាយព័ត៌មានតទៅទៀត។ នៅពេលជាមួយគ្នានេះ គ្មានសេរីភាពកាសែតសោះទ្បើយទោះណាជាលោកនាយករដ្ឋមន្ត្រី វេន ជាបោ (Wen Jiabao) បានមានប្រសាសន៍ថាបណ្តាញផ្សាយព័ត៌មានមានមុខនាទីមួយជាអ្នកឃ្លាំមើលក្នុងសង្គមក៏ដោយ»។
កាលពីខែមុនកាសែត ស្ថានីយ៍វិទ្យុ ស្ថានីយ៍ទូរទស្សន៍ និងគេហទំព័រនៃបណ្តាញ អ៊ីនធឺណិត (Internet) បានត្រូវបញ្ជាមិនឱ្យនិយាយអំពីការលំបាកដែលកម្មករចំណាកស្រុករាប់លាននាក់បានជួបប្រទះក្នុងការទិញសំបុត្ររទេះភ្លើង និងទ្បាន ដឹកអ្នកដំណើរដើម្បីវិលត្រទ្បប់ទៅផ្ទះសម្បែងវិញមុនថ្ងៃចូលឆ្នាំតាមចន្ទគតិដែលចាប់ផ្តើមនៅថ្ងៃព្រហស្បតិ៍។ ហើយរបាយការណ៍អំពីការបះបោរដែលកំពុងកើតមានក្នុងប្រទេស អេហ្ស៊ីប បានត្រូវរឹតត្បឹតយ៉ាងខ្លាំង។
សហព័ន្ធនេះថ្លែងថា សេចក្តីបង្គាប់ទាំងនេះមានទាក់ទិននឹងបញ្ហាមួយចំនួនដែលអាចនាំឱ្យមានវិបត្តិ ដោយមានរួមបញ្ចូលអតិផរណាអំពើពុករលួយនិងការគ្មានសមត្ថភាពរបស់ពួកមន្ត្រី៕
ប្រែសម្រួលដោយ ឈឹម សុមេធ
