បុរសម្នាក់ដែលរងការចោទប្រកាន់ពីការសម្លាប់មនុស្ស ៨ នាក់ នៅក្នុងការបាញ់ប្រហារជាបន្តបន្ទាប់នៅឯហាងម៉ាស្សាកែសម្ផស្សក្នុងរដ្ឋ Georgia ភាគអាគ្នេយ៍សហរដ្ឋអាមេរិក ត្រូវគេរំពឹងថា នឹងឆ្លើយបំភ្លឺនៅតុលាការនៅថ្ងៃព្រហស្បតិ៍នេះ។
ក្រុមរដ្ឋអាជ្ញាកាលពីថ្ងៃពុធម្សិលមិញ បានចោទប្រកាន់ Robert Aaron Long បុរសអាយុ ២១ ឆ្នាំមកពីទីក្រុង Woodstock រដ្ឋ Georgia ពីបទឃាតកម្មចំនួន៨ ហើយនិងការចោទប្រកាន់អំពីការបៀតបៀនមានស្ថានទម្ងន់ទោស។ ជននោះត្រូវបានចាប់ខ្លួន បន្ទាប់ពីការបាញ់ប្រហារនៅតំបន់ក្រុង Atlanta កាលពីយប់ថ្ងៃអង្គារ ហើយកំពុងត្រូវបានឃុំខ្លួន។
ប៉ូលិសបាននិយាយកាលពីថ្ងៃពុធម្សិលមិញថា ពួកគេមិនទាន់កំណត់ចេតនានៃការបាញ់ប្រហារនេះនៅឡើយទេ។ ការបាញ់ប្រហារនេះបានសម្លាប់ស្ត្រីដើមកំណើតអាស៊ី ៦ នាក់។ បុរសស្បែកសម្នាក់និងស្ត្រីស្បែកសម្នាក់ទៀត ក៏ស្ថិតនៅក្នុងចំណោមជនរងគ្រោះផងដែរ។ ជនរងគ្រោះទី ៩ កំពុងស្ថិតនៅក្នុងមន្ទីរពេទ្យនៅឡើយ ដោយសាររងរបួស។ នេះបើតាមការបញ្ជាក់របស់ប៉ូលិស។
នៅពេលត្រូវចាប់ខ្លួន Long បានប្រាប់ប៉ូលិសថា ការវាយប្រហារនេះមិនមានហេតុផលខាងជាតិសាសន៍ទេ។ អាជ្ញាធរនិយាយថា ជនសង្ស័យនោះធ្លាប់មានបញ្ហា «ញៀនការរួមភេទ»។
ឧក្រិដ្ឋកម្មនេះបានធ្វើឲ្យមានការភ័យខ្លាចនៅក្នុងសហគមន៍អាស៊ីអាមេរិកាំង ដែលមានការរន្ធត់រួចទៅហើយអំពីការវាយប្រហារច្រើនទម្រង់ ដែលបានកើតមានឡើងចាប់តាំងពីការចាប់ផ្តើមនៃការរាតត្បាតជំងឺកូវីដ១៩ កាលពីមួយឆ្នាំមុនមក ដែលវីរុសនោះមានប្រភពពីប្រទេសចិន។
ប្រធានាធិបតីសហរដ្ឋអាមេរិកលោក Joe Biden បានមានប្រសាសន៍ថា លោកមិនធ្វើការវិនិច្ឆ័យអំពីចេតនានៃការបាញ់ប្រហារនេះទេ រហូតទាល់តែមានព័ត៌មានបន្ថែមទៀត៕
