លោក ឆាង យុ នាយកប្រតិបត្តិនៃមជ្ឈមណ្ឌលឯកសារកម្ពុជា បានទទួលរង្វាន់ Ramon Magsasay Award ប្រចាំឆ្នាំ២០១៨ កាលពីដើមខែកញ្ញានេះនៅក្នុងប្រទេស ហ្វីលីពីន។ រង្វាន់ដ៏ល្បីល្បាញនេះ ត្រូវបានប្រៀបធៀប ជារង្វាន់ណូបែលប្រចាំទ្វីបអាស៊ី។
ពានរង្វាន់ Magsasay នេះទទួលស្គាល់ការងាររបស់លោក ឆាង យុ ក្នុងការថែរក្សាការចងចាំនៃការសម្លាប់រង្គាលក្នុងរបបខ្មែរក្រហម និងបេសកកម្មស្ទើរពេញមួយជីវិតរបស់លោកក្នុងការស្តារឡើងវិញនូវយុត្តិធម៌សម្រាប់ប្រជាជនកម្ពុជា។
នៅក្នុងលិខិតទទួលរង្វាន់របស់លោក ឆាង យុ លោកបាននិយាយថា «វាមានសារៈសំខាន់ណាស់ក្នុងការចងចាំកំហុសដែលបានកើតឡើងពីអតីតកាល។ ដំណើរការយុត្តិធម៌ ចាប់ផ្តើមនិងបញ្ចប់ដោយភារកិច្ចនៃការចងចាំ»។
លោក ឆាង យុ បានបង្កើតមជ្ឈមណ្ឌលឯកសារកម្ពុជាក្នុងឆ្នាំ១៩៩៥ ដើម្បីលើកកម្ពស់ការចងចាំ និងយុត្តិធម៌សម្រាប់ការផ្សះផ្សាជាតិ។ លោកក៏បានផ្តួចផ្តើមបង្កើតវិទ្យាស្ថានស្លឹករឹត ដែលជាវិទ្យាស្ថានស្រាវជ្រាវអំពីអំពើឃោរឃៅក្នុងរបបខ្មែរក្រហម។
សេចក្តីថ្លែងការរបស់មូនិធិ Ramon Magsaysay Award Foundation បានសរសេរថា៖ «ក្រៅពីការបំផ្លាញ ការបាត់បង់ ឬក៏អវត្តមាននៃកំណត់ត្រាប្រវត្តិសាស្រ្ត មជ្ឈមណ្ឌលឯកសារកម្ពុជាមានលទ្ធិភាពក្នុងការប្រមូល និងរក្សាទុកឯកសារជាង១លានឯកសារ ដោយពាក់កណ្តាលនៃឯកសារទាំងនោះត្រូវបានប្រើប្រាស់នៅក្នុងសាលាក្តីខ្មែរក្រហម»។
ក្នុងនាមជាអ្នករស់រានមានជីវិតពីរបបខ្មែរក្រហម លោក ឆាង យុ ត្រូវបានធ្វើទារុណកម្ម និងឃុំខ្លួនកាលពីសម័យនោះ ហើយលោកបានបាត់បង់សាច់ញាតិជាច្រើននាក់រួមទាំងឪពុក និងបងប្អូនបង្កើតរបស់លោកចំនួន៥នាក់ផងដែរ។
លោកបានប្រាប់សារព័ត៌មាន Rappler ដែលជាប្រព័ន្ធព័ត៌មានសង្គមអនឡាញ នៅប្រទេសហ្វីលីពីនថា៖
«សម្រាប់ខ្ញុំ វាគឺជាការទទួលខុសត្រូវ។ នេះគឺជាការទទួលខុសត្រូវក្នុងនាមជាអ្នករស់រានមានជីវិត។ ខ្ញុំត្រូវតែធ្វើកិច្ចការនេះយ៉ាងល្អបំផុតតាមដែលអាចធ្វើបាន ហើយខ្ញុំត្រូវតែធ្វើវាដោយស្មោះត្រង់ពីព្រោះវាមិនត្រឹមតែសម្រាប់អ្នកដទៃប៉ុណ្ណោះទេ ប៉ុន្តែសម្រាប់គ្រួសាររបស់ខ្ញុំផងដែរ»។
លោកបានសរសេរនៅក្នុងលិខិតទទួលរង្វាន់ថា៖
«ពានរង្វាន់នេះគឺជាការដាស់តឿនមួយ តាងនាមឲ្យម្តាយរបស់ខ្ញុំ និងម្តាយជាច្រើនរូបទៀតនៅកម្ពុជា ដែលបានរស់រានពីរបបប្រល័យពូជសាសន៍ប៉ុល ពត»។
ម្ចាស់ពានរង្វាន់៥នាក់ផ្សេងទៀត មកពីប្រទេសផ្សេងៗក្នុងទ្វីបអាស៊ី រួមមានទាំង លោកស្រី Maria De Lourdes Martins Cruz មកពីប្រទេសទីម័រខាងកើត លោក Howard Dee មកពីប្រទេសហ្វីលីពីន លោកBharat Vatwani និងលោក Sonam Wangchuk មកពីប្រទេសឥណ្ឌា និង លោកស្រី Vo Thi Hoang Yen មកពីប្រទេសវៀតណាម។
លោកស្រី Carmencita Abella ប្រធានមូនិធិ Ramon Magsaysay Award Foundation បានថ្លែងនៅក្នុងសេចក្តីថ្លែងការណ៍ថា៖
«ម្ចាស់ពានរង្វាន់ Magsaysay ប្រចាំឆ្នាំ២០១៨ គឺជាវីរបុរស និងវីរនារីនៃក្តីសង្ឍឹម ដែលធ្វើឲ្យសង្គមរបស់ពួកគេមានដំណើរការទៅមុខ តាមរយៈកិច្ចខិតខំប្រឹងប្រែងដើម្បីធ្វើឲ្យប្រសើរឡើងសម្រាប់សហគមន៍។ វិធីសាស្រ្តរបស់ពួកគេ ផ្អែកលើការគោរពសេចក្តីថ្លៃថ្នូររបស់មនុស្ស និងជំនឿលើអំណាចនៃកិច្ចខិតខំប្រឹងប្រែងរួមគ្នា»៕
