លោករ៉ូប៊ឺត ហ្កេត (Robert Gates) រដ្ឋមន្ត្រីក្រសួងការពារជាតិ សហរដ្ឋអាមេរិក (សរអ) បានព្រមានកាលពីថ្ងៃសុក្រសប្តាហ៍មុនថា កងកម្លាំង ស.រ.អ. ត្រូវរៀបចំរចនាសម្ព័ន្ធជាថ្មីខ្លួនឯង បើមិនដូច្នេះទេនឹងបាត់បង់ក្រុមមេដឹកនាំថ្នាក់កណ្ដាល និងមិនអាចរៀបចំសម្រាប់ពេលមានជម្លោះនៅថ្ងៃមុខទេ។
លោករដ្ឋមន្ត្រី Gates បានអញ្ជើញទៅបណ្ឌិតសភាកងទ័ព សរអ នៅ West Point រដ្ឋ New York ដើម្បីនិយាយទៅកាន់ ក្រុមអនាគតនាយទាហាននៃកងទ័ពសរអ អំពីអាជីពរបស់ពួកគេ។ លោកបានប្រាប់ក្រុមអនាគតនាយទាហានទាំងនោះថា កងកម្លាំងសរអ តាមប្រពៃណីដែលមានអង្គភាពធំៗប្រើរថក្រោះនិងគ្រឿងសម្ភារៈធ្ងន់ៗដទៃទៀតនោះ គឺ រហ័សហួសសម័យណាស់។
«គោលការណ៍សំខាន់ដែលជាមូលដ្ឋាននៃយុទ្ធសាស្ត្រសម្រាប់កងកម្លាំងដែលបញ្ជូនទៅច្បាំងលឿនៗ ដូចជាកងទ័ពឬទាហានម៉ារីន ទាហានអាកាស ទ័ពថ្មើរជើង ឬកិច្ចប្រតិបត្តិការពិសេសនោះ គឺជាខ្លួនពួកគេជាក់ស្តែង បើពិនិត្យមើលលទ្ធភាពក្នុង ការប្រឆាំងនឹងភេរវកម្ម ប្រតិកម្មលឿន ឆ្លើយតបនឹងគ្រោះមហន្តរាយឬរក្សាស្ថេរភាព ឬបេសកកម្មជំនួយការកងកម្លាំងសន្តិសុខ។ ប៉ុន្តែតាមយោបល់របស់ខ្ញុំ រដ្ឋមន្ត្រីការពារប្រទេសណាមួយនាពេលអនាគតដែលផ្តល់ឱវាទដល់លោកប្រធានាធិបតី ឲ្យបញ្ជូនកងកម្លាំងជើងគោកអាមេរិកាំងដ៏ធំមួយម្តងទៀត ទៅកាន់តំបន់អាស៊ីឬទៅមជ្ឈិមបូព៌ាប្រទេស ឬទ្វីបអាហ្វ្រិកនោះ គួរតែត្រូវបានពិនិត្យខួរក្បាលរបស់មន្ត្រីនោះ»។
លោក Gates បានមានប្រសាសន៍ថា ការប៉ះទង្គិចខ្នាតធំជាមួយប្រទេសធំៗដទៃៗទៀត ទំនងដូចជាអាចប្រយុទ្ធភាគច្រើនដោយកងកម្លាំងអាកាសនិងកងនាវាចរណ៍។ លោកបានស្នើឲ្យនាយទាហានក្មេងៗដែលកំពុងហ្វឹកហ្វឺនឲ្យគិតអំពីសតវត្សរ៍ទី២១ថាមុខជាមានការប្រយុទ្ធគ្នាជើងគោកហើយឲ្យស្វែងរកការហ្វឹកហាត់និងការពិសោធដែលនឹងអាចជួយពួកគេដឹកនាំការប្រយុទ្ធបែបហ្នឹងប្រសិនបើចាំបាច់។ ហើយលោកបានជំរុញក្រុមមេទាហានសព្វថ្ងៃឲ្យចាប់ផ្តើមផ្លាស់កងកម្លាំងរបស់ពួកគេ ជាចំណែកដោយផ្តល់គំនិត ដល់នាយទាហានក្មេងៗនិងថ្នាក់កណ្តាលសិក្សាអំពីជំនាញធ្វើសង្គ្រាមទំនើបៗ រួមមានកិច្ចប្រតិបត្តិការប្រឆាំងភេរវកម្ម និងទប់ទល់នឹងការងើបបះបោរ។
លោក Gates ក៏បានមានប្រសាសន៍ដែរថាការព្រួយបារម្ភដ៏ធំបង្អស់មួយរបស់លោកគឺថា ក្រុមនាយទាហាននៅថ្នាក់កណ្តាលនៃជំនាន់ដែលមានការពិសោធខ្ពស់សព្វថ្ងៃនេះអាចចាកចេញពីការបម្រើកងទ័ពណាមួយដើម្បីជៀសវាងការបញ្ជូនទៅប្រយុទ្ធទៀត ឬគេចពីភាពធុញទ្រាន់នឹងបេសកកម្មនានានៃការិយាធិបតេយ្យនៅក្រោយពេលសង្គ្រាម។
«យុទ្ធជននិងយុទ្ធនារីនៅក្នុងវ័យនៃអាយុកាលដំណើរការខាងវិជ្ជាជីវៈរបស់ខ្លួនដែលប្រហែលជាត្រូវបានទទួលខុសត្រូវលើជីវិតកងទ័ពចំនួនច្រើន ឬលើកងកម្លាំងច្រើនរយនាក់ ឬលើប្រាក់ជំនួយច្រើនលានដុល្លារ ឬពាក់ព័ន្ធនឹងការផ្សះផ្សាពួកកុលសម្ព័ន្ធសង្គ្រាម អ្នកទាំងនោះប្រហែលជាត្រូវអង្គុយនៅក្នុងបន្ទប់បួនជ្រុងពេញមួយថ្ងៃ រៀបចំឡើងវិញ នូវផ្ទាំងបញ្ចាំងរូបភាពសម្រាប់ធ្វើបទបង្ហាញ រៀបចំរបាយការណ៍សង្ខេបស្តីពីការហ្វឹកហ្វឺនប្រចាំត្រីមាស ឬក៏ធ្វើការងារជាស្មៀនការិយាល័យដោយបំពេញការងារជាច្រើនជារៀងរាល់ថ្ងៃ»។
លោក Gates ក៏បានមានប្រសាសន៍ដែរថាលោកបានព្រួយបារម្ភថា ការកើនឡើងក្នុងការទទួលស្គាល់អំពីសារៈសំខាន់ នៃជំនាញកងទ័ពមិនតាមប្រពៃណីនោះ អាចរិចរិលពេលដែលកងកម្លាំង សរអ ចាកចេញពីប្រទេសអ៊ីរ៉ាក់និងប្រទេសអាហ្វហ្កានីស្ថាន នៅក្នុងបីបួនឆ្នាំខាងមុខ។ លោករដ្ឋមន្ត្រីក្រសួងការពារជាតិដែលថ្លែងថាលោកនឹងចូលនិវត្តន៍ឆ្នាំនេះនោះ បានអំពាវនាវដល់ក្រុមអនាគតមេដឹកនាំឲ្យធានាថាកងកម្លាំងមិនត្រឡប់ទៅរកមុខនាទីប្រពៃណីរបស់ខ្លួនវិញទេ ដែលជាកងកម្លាំងជើងគោកដ៏ធំមួយ ហើយបន្តរៀបចំការពារប្រទេសជាតិប្រឆាំងនឹងអ្វីដែលលោកឃើញថាអាចដូចជាឆាកផ្សេងៗ ដែលលោកបានលើកឡើងពីខាងដើម៕
ប្រែសម្រួលដោយ នុច សារីតា
