លោកអគ្គលេខាធិការអង្គការសហប្រជាជាតិ Ban Ki-moon បានអះអាងថា អង្គការសហប្រជាជាតិនឹងពិភាក្សាជាមួយសហគមន៍អន្ដរជាតិអំពីបញ្ហាសំណុំរឿងស៊ើបអង្កេត០០៣និង០០៤ដ៏ចម្រូងចម្រាស។ សេចក្ដីថ្លែងការណ៍នេះធ្វើឡើងបន្ទាប់ពីមានការព្រមានជាថ្មីម្ដងទៀតពីរដ្ឋាភិបាលខ្មែរមិនឲ្យមានការតាមស៊ើបអង្កេតទៅលើករណីទាំងពីរនេះ។
លោកអគ្គលេខាធិការអង្គការសហប្រជាជាតិ Ban Ki-moon បានបញ្ជាក់យ៉ាងច្បាស់នៅថ្ងៃព្រហស្បតិ៍នេះថា សាលាក្ដីខ្មែរក្រហមនឹងធ្វើការសម្រេចចិត្តថា តើត្រូវស៊ើបអង្កេត តាមចាប់ខ្លួនជនសង្ស័យក្នុងសំណុំរឿង០០៣ និងសំណុំរឿង០០៤ យកមកកាត់ទោស ឬយ៉ាងណា។ សេចក្ដីថ្លែងការណ៍នេះធ្វើឡើងមួយថ្ងៃប៉ុណ្ណោះ បន្ទាប់ពីលោកនាយករដ្ឋមន្ដ្រីខ្មែរហ៊ុន សែនបានព្រមានចំមុខ ក្នុងជំនួបជាមួយរូបលោក ដោយមិនចង់ឲ្យសាលាក្ដីខ្មែរក្រហមបន្ដធ្វើការស៊ើបអង្កេតសំណុំរឿងទាំងពីរនេះតទៅទៀត។ លោកហ៊ុន សែនព្រមានថា ការកាត់ទោសសំណុំរឿងថ្មីនេះនឹងនាំឲ្យសាលាក្ដីខ្មែរក្រហមជួបនូវបរាជ័យ។
ថ្លែងនៅក្នុងសន្និសីទសារព៌ត៌មានរយៈពេលខ្លី បន្ទាប់ពីលោកបានទស្សនាសារមន្ទីរជាតិទួលស្លែងក្នុងទីក្រុងភ្នំពេញ ដែលនៅទីនោះអ្នកទោសយ៉ាងតិចចំនួន១២៣៨០នាក់ត្រូវបានធ្វើទារុណកម្ម និងសម្លាប់ចោលនោះ លោក Ban Ki-moon មានប្រសាសន៍ថា មានតែតុលាការទេដែលមានសិទ្ធិសម្រេចលើសំណុំរឿង០០៣ និង០០៤នេះ។ ហើយអង្គការសហប្រជាជាតិ នឹងជជែកជាមួយសហគមន៍ន៍អន្ដរជាតិបន្ដទៀត។
“នេះគឺជាតុលាការអន្ដរជាតិ ដូច្នេះការសម្រេចចិត្តនេះត្រូវធ្វើឡើងដោយតុលាការ។ អង្គការសហប្រជាជាតិនឹងពិភាក្សាជាមួយសមាជិកសហគមន៍អន្ដរជាតិពីបញ្ហានេះ ជាពិសេសជជែកជាមួយប្រទេសផ្ដល់ជំនួយ"។
លោកអគ្គលេខាធិការអង្គការសហប្រជាជាតិបានបន្ថែមថា លោកបានពិភាក្សាជាមួយលោកនាយករដ្ឋមន្ដ្រីហ៊ុន សែន និងជជែកជាមួយលោកឧបនាយករដ្ឋមន្ដ្រី សុខ អានអំពីសំណុំរឿង០០៣ និងសំណុំរឿង០០៤នេះដែរ កាលពីថ្ងៃពុធ និងនៅព្រឹកថ្ងៃព្រហស្បតិ៍ ហើយលោកឃើញថារដ្ឋាភិបាលកម្ពុជាមានការប្ដេជ្ញាចិត្តក្នុងការធ្វើឲ្យដំណើរការសាលាក្ដីខ្មែរក្រហមប្រព្រឹត្តទៅរហូតដល់ទីបញ្ចប់។
ក្រុមមន្រ្ដីអង្គការសង្គមស៊ីវិល ដែលធ្វើការស្និទ្ធជាមួយសាលាក្ដីខ្មែរក្រហម ចាត់ទុកថាសំណុំរឿង០០៣ និងសំណុំរឿង០០៤មានសារៈសំខាន់យ៉ាងខ្លាំងសម្រាប់ការបំពេញបន្ថែមនូវការគាស់រំលើងអាថ៌កំបាំងនៃអតីតកាលនៃអំពើឃោរឃៅក្នុងសម័យខ្មែរក្រហម។
លោកម៉ាកសែល ឡឺម៉ុង សហចៅក្រមស៊ើបអង្កេត បានប្រាប់ VOA សំឡេងសហរដ្ឋអាមេរិកកាលពីខែកក្កដាថា ការស៊ើបអង្កេតលើសំណុំរឿង០០៣ និង០០៤នៅតែបន្ដ។
ទោះជាយ៉ាងណា ខាងភាគីកម្ពុជានៅក្នុងសាលាក្ដីនេះមិនគាំទ្រការស៊ើបអង្កេតនេះទេ។
លោក Ban Ki-moon បានមកដល់ប្រទេសកម្ពុជាកាលពីយប់ថ្ងៃអង្គារដើម្បីបំពេញទស្សនកិច្ចរយៈពេលពីរថ្ងៃ។ នេះគឺជាផ្នែកមួយនៃដំណើរទស្សនកិច្ចរបស់លោកនៅក្នុងប្រទេសចំនួនបួន ក្នុងតំបន់អាស៊ី គឺប្រទេសថៃ ប្រទេសកម្ពុជា វៀតណាម និងជាចុងក្រោយគឺប្រទេសចិន។
នៅក្នុងប្រទេសកម្ពុជា លោក Ban Ki-moon បានចូលគាល់ព្រះមហាក្សត្រ ជួបសន្ទនាជាមួយលោកនាយករដ្ឋមន្រ្ដីហ៊ុន សែន ទស្សនាសាលាក្ដីខ្មែរក្រហម និងទស្សនាសារមន្ទីរជាតិទួលស្លែងដែលជាអតីតគុកដ៏ទារុណកម្ម និងសម្លាប់រង្គាលរបស់ពួកខ្មែរក្រហម។
លោកអគ្គលេខាធិការបានមានប្រសាសន៍ថា ប្រជាពលរដ្ឋកម្ពុជាបានស្វែងរក ហើយសមនឹងទទួលបានយុត្តិធម៌។ សេចក្ដីក្លាហានរបស់ប្រជាពលរដ្ឋកម្ពុជាគឺជាសារដ៏ធំ និងមានឥទ្ធិពលប្រាប់ពិភពលោកថា មិនអាចមាននិទណ្ឌភាពបានទេ ហើយថាឧក្រិដ្ឋកម្មប្រឆាំងមនុស្សជាតិមិនត្រូវរួចពីការផ្ដន្ទាទោសទេ។
របបកម្ពុជាប្រជាធិបតេយ្យបានបង្កឲ្យប្រជាពលរដ្ឋកម្ពុជាស្លាប់បាត់បង់ជីវិតជិតពីរលាននាក់ ចន្លោះពីឆ្នាំ១៩៧៥ ដល់ឆ្នាំ ១៩៧៩។ រហូតមកទល់ពេលនេះ ជនសង្ស័យចំនួនប្រាំនាក់ត្រូវបានចាប់ខ្លួន ក្នុងនោះអតីតមេដឹកនាំកំពូលៗខ្មែរក្រហម មាននួន ជា អៀង សារី ខៀវ សំផន និងអៀង ធារិទ្ធ នឹងត្រូវកាត់ទោសនៅឆ្នាំ២០១១៕