ប្រទេសបារាំងមានប្រតិកម្មយ៉ាងខ្លាំងចំពោះការចោទប្រកាន់ពីបទរំលោភបំពានផ្លូវភេទប្រឆាំងលោក ដូមីនីក ស្ដ្រូសខាន់ (Dominique Strauss-Kahn) នាយកមូលនិធិរូបិយវត្ថុអន្ដរជាតិ។ លោក ស្ដ្រូសខាន់ ដែលគេចាត់ទុកលោកថា ជាបេក្ខជននាំមុខគេសម្រាប់តំណែងប្រធានាធិបតីបារាំង ត្រូវបាននគរបាលទីក្រុងញូវយ៉កចាប់នៅរសៀលថ្ងៃសៅរ៍កន្លងទៅនេះ។
ការចាប់លោកដូមីនីក ស្ដ្រូសខាន់ ត្រូវបានពិភាក្សាក្នុងកម្មវិធីសន្ទនាគ្នានៅថ្ងៃអាទិត្យនៅប្រទេសបារាំង។ នគរបាលទីក្រុងញូវយ៉កបានចាប់នាយកមូលនិធិរូបិយវត្ថុអន្ដរជាតិ អាយុ៦២ឆ្នាំរូបនេះនៅក្នុងយន្ដហោះរបស់ក្រុមហ៊ុនអាកាសចរណ៍ Air France នៅថ្ងៃសៅរ៍នៅទីក្រុងញូវយ៉កប៉ុន្មាននាទីប៉ុណ្ណោះមុនយន្ដហោះនោះចេញដំណើរទៅទីក្រុងប៉ារីស។
លោក ស្ដ្រូសខាន់ អ្នកនយោបាយសង្គមនិយម ហើយនឹងជាអតីតរដ្ឋមន្ដ្រីក្រសួងហិរញ្ញវត្ថុដ៏មានប្រជាប្រិយភាពម្នាក់ប្រឈមមុខនឹងការចោទប្រកាន់ពីបទឧក្រិដ្ឋកម្មក្នុងការបំពានផ្លូវភេទ ការប៉ុនប៉ងរំលោភផ្លូវភេទ ហើយនឹងការបង្ខាំង ខុសច្បាប់នៅសហរដ្ឋអាមេរិក។ ស្ដ្រីអ្នករៀបបន្ទប់នៅសណ្ឋាគារមួយនៅទីក្រុងញូវយ៉កអះអាងថា លោកបំពានផ្លូវភេទស្ដ្រីនោះនៅក្នុងបន្ទប់របស់លោក។
បើគេរកឃើញថា ការចោទប្រកាន់នេះជាការពិតមែននោះ វាទំនងអាចបញ្ចប់សេចក្ដីសង្ឃឹមដែលចង់ឈរឈ្មោះធ្វើជាបេក្ខជនប្រណាំងប្រជែងជាមួយលោក នីកូឡាស សារកូហ្ស៊ី (Nicolas Sarkozy) ប្រធានាធិបតីបារាំងឆ្នាំក្រោយ។ លោក ស្ដ្រូសខាន់ មិនទាន់ត្រូវបានប្រកាសថាតើលោកនឹងឈរឈ្មោះសម្រាប់ការបោះឆ្នោតឆ្នាំ២០១២ ឬយ៉ាងណាទេ ក៏ប៉ុន្ដែគេចាត់ទុកលោកថា ទំនងជាបេក្ខជនខ្លាំងម្នាក់។
លោក ដ្យឺរ៉ូម ហ្វ៊រកេត (Jerome Fourquet) នាយករងនៃស្ថាប័នរៀបចំការបោះឆ្នោត IFOP ប្រាប់វិទ្យុបារាំងថា បើគេរកឃើញថា ការចោទប្រកាន់នេះជាការពិតមែន នោះលោកស្រ្តូស ខាន ក្នុងនាមជាអ្នកនយោបាយនឹងពិតជាមានការលំបាកយ៉ាងខ្លាំងក្នុងការប្រមូលផ្ដុំការគាំទ្រលោកឡើងវិញ។
ក្រុមអ្នកនយោបាយថ្នាក់ខ្ពស់មកពីគណបក្សសង្គមនិយម បានធ្វើការឆ្លើយតបតិចតួចចំពោះការចោទប្រកាន់នោះ។ ពេលសម្ភាសន៍តាមវិទ្យុ Europe 1 លោកស្រី សេហ្កូលីន រ៉ូយ៉ាល (Segolene Royal) បេក្ខនារីមកពីគណបក្សសង្គមនិយមដែលឈរឈ្មោះប្រជែងជាមួយលោក សារកូហ្ស៊ី នៅក្នុងការប្រកួតប្រជែងឆ្នាំ២០០៧ និយាយថា ព័ត៌មាននេះធ្វើឲ្យស្លុតស្មារតី។
លោកស្រី រ៉ូយ៉ាលអានអត្ថាធិប្បាយដែលលោកស្រីបានសរសេររៀបចំធ្វើទុកជាមុនថា ការចោទប្រកាន់នោះធ្វើឲ្យយើងឈឺចាប់ ក៏ប៉ុន្ដែនៅតែចាំបាច់ត្រូវពិនិត្យមើលថាពិតឬមិនពិតសិន។ លោកស្រីនិយាយថា ដូចអ្នកដទៃដែរ លោក ស្ដ្រូសខាន់ សមនឹងត្រូវបានគេចាត់ទុកថា ជាបុរសគ្មានទោសពៃរ៍រហូតទៅដល់ពេលគេរកឃើញថាលោកមានទោស។
លោកស្ដ្រូសខាន់ ដែលមានភរិយាហើយនោះ កាលពីពេលមុន បានសារភាពថា មានរឿងស្នេហាជាមួយសេដ្ឋវិទូជាតិហុងហ្ការីម្នាក់នៅមូលនិធិរូបិយវត្ថុអន្ដរជាតិ។ ក៏ប៉ុន្ដែក្រុមអ្នកគាំទ្រលោកនិយាយថា លោកមិនមែនជាបុរសដែលរំលោភបំពានផ្លូវភេទទេ។
ក្រុមអ្នកនយោបាយជំទាស់ធ្វើប្រតិកម្មខ្លាំងជាងនេះទៅទៀត។
លោក ប៊ែរណាដ ដេប្រឺ (Bernard Debre) សមាជិកសភាបារាំងម្នាក់ ហើយនឹងជាសមាជិករបស់គណបក្ស UMP ដែលកាន់កាប់អំណាចរបស់លោក សារកូហ្ស៊ី បានប្រាប់វិទ្យុបារាំងថា ការចោទប្រកាន់ប្រឆាំងលោក ស្ដ្រូសខាន់ ធ្វើឲ្យប្រទេសបារាំងទាំងមូលអាម៉ាស៕
ប្រែសម្រួលដោយ កង ស៊ីវន
