មន្ត្រីគណបក្សភ្លើងទៀនបួននាក់ទៀតបានសម្រេចចិត្តសុំចូលរួមជីវភាពនយោបាយជាមួយគណបក្សប្រជាជនកម្ពុជា ដោយអះអាងថា ការដឹកនាំគណបក្សភ្លើងទៀនមានការប្រកាន់បក្ខពួក និងមានអំពើពុករលួយជាដើម។ ប៉ុន្តែមន្រ្តីជាន់ខ្ពស់គណបក្សភ្លើងទៀនអះអាងថា ការចុះចូលជាមួយគណបក្សកាន់អំណាចតែងតែកើតឡើង នៅមុនការបោះឆ្នោត។
មន្ត្រីគណបក្សភ្លើងទៀនបួនរូបនោះបានផ្ញើសារជាសំឡេងមួយ ដែលមានរយៈពេលប្រមាណជា ៨នាទី ទៅកាន់លោកនាយករដ្ឋមន្ត្រី ហ៊ុន សែន កាលពីថ្ងៃចន្ទ ដោយសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ពួកគេទាំងបួននាក់នោះ រួមមានលោក ម៉ៃ ហុងសៀង និងលោក អ៊ុំ សោភ័ណ ដែលទាំងពីរនាក់ជាមន្ត្រីគណបក្សភ្លើងទៀនប្រចាំខេត្តព្រះសីហនុ។ ចំណែកលោក ឌឹម សារឿន និងលោក ឡី សុខុន ជាមន្ត្រីគណបក្សភ្លើងទៀនខេត្តបាត់ដំបង។
តាមរយៈវីដេអូនោះ លោក អ៊ុំ សោភ័ណ លើកឡើងថា៖ «ពួកខ្ញុំចូលរួមបម្រើជីវភាពនយោបាយនៅក្នុងគណបក្សប្រឆាំងឃើញថា មានការចាញ់បោកនូវមនោគមវិជ្ជា ដែលតែងតែគិតថា ការដឹកនាំរបស់រាជរដ្ឋាភិបាលមិនត្រូវ តែពេលនេះខ្ញុំបាទយល់យ៉ាងច្បាស់អំពីគោលនយោបាយល្អ និងការដឹកនាំដ៏ត្រឹមត្រូវរបស់សម្តេច ដែលយើងខ្ញុំជាកូន ជាចៅសូមមករួបរួមជីវភាពនយោបាយជាមួយនិងគណបក្សប្រជាជនកម្ពុជាចាប់ពីពេលនេះតទៅ»។
ចំណែកលោក ម៉ៃ ហុងសៀង បានថ្លែងក្នុងវីដេអូនោះដែរថា៖ «ថ្ងៃនេះខ្ញុំបាទ ព្រមទាំងបងប្អូនទាំងបួននាក់ ដែលយើងស្ម័គ្រស្មោះជាមួយគ្នា តាំងពីរួមរស់នៅក្នុងគុក ទាំងរួមជីវភាពនយោបាយនៅក្នុងគណបក្សប្រឆាំងរាប់ឆ្នាំមកហើយ ហើយបានសម្រេចចិត្តជីវភាពនយោបាយជាមួយគណបក្សប្រជាជនកម្ពុជា ដែលដឹកនាំដោយសម្តេចតេជោ ដោយទទួលរងនូវភាពអយុត្តិធម៌ ពីសំណាក់ថ្នាក់ដឹកនាំគណបក្សប្រឆាំងដែលធ្វើឱ្យយើងគ្មានទំនុកចិត្តតទៅទៀតទេ»។
រីឯលោក ឌឹម សារឿន អតីតមន្ត្រីគណបក្សភ្លើងទៀនប្រចាំខេត្តបាត់ដំបង ប្រាប់វីអូអេនៅថ្ងៃអង្គារនេះថា ការសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា គឺមានហេតុផលច្រើន តែមិនមែនចង់បានអំណាច ឬតួនាទីអ្វីឡើយ។ លោកលើកឡើងថា គណបក្សភ្លើងទៀនបានប្រព្រឹត្តអំពើអយុត្តិធម៌ច្រើនក្នុងគណបក្ស ហើយលោកមិនពេញចិត្តនឹងអ្វីដែលកំពុងកើតឡើងក្នុងគណបក្ស។
លោកបញ្ជាក់ថា៖ «ខ្ញុំបាទ ជាថ្នាក់ដឹកនាំកំពូលរបស់គណបក្សភ្លើងទៀនដែរ អ៊ីចឹងអ្វីដែលមើលឃើញថាមានកំហុសឆ្គងច្រើននៅក្នុងផ្ទៃក្នុងគណបក្សភ្លើងទៀន បច្ចុប្បន្នអត់អព្យាក្រឹត អត់ត្រឹមត្រូវ ហេតុអីបានដោយសារអ៊ីចឹង ព្រោះពាក្យថាអចិន្ត្រៃយ៍ គឺមានន័យថាសមធម៌ យុត្តិធម៌ ប៉ុន្តែអចិន្ត្រៃយ៍នេះបែងចែកជាបក្ខពួក គឺវាអត់ល្អ ហើយអ្នកប្រឹងប្រែងតស៊ូ គឺបានតែការឈឺចាប់»។
លោកនាយករដ្ឋមន្ត្រី ហ៊ុន សែន បានបង្ហោះសារនៅក្នុងប្រព័ន្ធតេឡេក្រាមរបស់លោក ដោយបង្ហាញការស្វាគមន៍ចំពោះការចូលរួមរបស់ពួកគេជាមួយគណបក្សកាន់អំណាច។
លោក ហ៊ុន សែន សរសេរថា៖ «សូមអរគុណដែលអស់លោកបានផ្តល់យុត្តិធម៌ជូនគណបក្សប្រជាជននិងបានវាយតម្លៃ ភាពអយុត្តិធម៌ក្នុងបក្សប្រឆាំងដែលមានក្នុងវីដេអូនេះស្រាប់។ សូមគណៈកម្មាធិការបក្សខេត្តបាត់ដំបងនិងខេត្តព្រះសីហនុរៀបចំបែបបទបញ្ចូលអស់លោកទាំងបួននាក់ ស្របតាមនីតិវិធីរបស់គណបក្សប្រជាជនកម្ពុជា»។
អ្នកនាំពាក្យគណបក្សភ្លើងទៀន លោក គីមសួរ ភិរិទ្ធ ប្រាប់វីអូអេនៅថ្ងៃអង្គារនេះថាការចុះចូលជីវភាពនយោបាយរបស់មន្ត្រីគណបក្សភ្លើងទៀន គឺតែងតែកើតមានជារៀងរាល់លើក ឱ្យតែការបោះឆ្នោតខិតជិតមកដល់។
លោកថ្លែងថា៖ «ចរន្តអស់ហ្នឹងគឺ វាតែងតែអ៊ីចឹង ឱ្យតែជិតបោះឆ្នោត ខ្លាចតែជិតបោះឆ្នោតហើយទេ បោះឆ្នោតហើយចេញលទ្ធផលហើយ ស្រាប់តែមន្ត្រីបក្ស ឬក៏អ្នកគាំទ្របក្សប្រកាសចេញហូរហែជាបន្តបន្ទាប់រហូត អាហ្នឹងគួរឱ្យភ័យមែនទែន»។
លោកបន្តទៀតថា ដំណើរការបោះឆ្នោតអាណត្តិមុនៗ ក៏មានអ្នកចូលរួមជាមួយគណបក្សកាន់អំណាចយ៉ាងច្រើនជាហូរហែ ប៉ុន្តែពេលបោះឆ្នោតមកដល់ បែរជាសំឡេងគាំទ្រគណបក្សជំទាស់កាន់តែកើនឡើងច្រើនជាងមុនទៅវិញ៕
