ពលរដ្ឋកម្ពុជាចំនួនបួននាក់ ស្ថិតក្នុងចំណោមចំណាប់ខ្មាំងចម្រុះជាតិសាសន៍ចំនួន២៦នាក់ត្រូវបានជួយសង្រ្គោះឲ្យរួចផុតពីការឃុំឃាំងរបស់ក្រុមចោរសមុទ្រនៅប្រទេសសូម៉ាលីហើយកាលពីថ្ងៃទី២២ ខែតុលាសប្ដាហ៍មុន។ ហើយពួកគេនឹងត្រូវបញ្ចូនមកប្រទេសហ្វីលីពីននៅចុងសប្តាហ៍នេះ។
ក្រុម The Hostage Support Partners ប្រកាសថា ខ្លួនបានរំដោះចំណាប់ខ្មាំងចំនួន២៦ដែលនៅរស់រានមានជិវិតដែលមកពីប្រទេសវៀតណាម ឥណ្ឌូនេស៊ី ប្រទេសហ្វីលីពីន ប្រទេសចិន ដែនកោះតៃវ៉ាន់ ក្នុងនោះមានជនជាតិកម្ពុជាចំនួនបួនរូបផងដែរ ។
អ្នកស្រី អែម រ៉ាន់ ជាបងស្រីបង្កើតរបស់លោកអែម ភូមិមុន្នីមានស្រុកកំណើតមកពីខេត្តកំពង់ឆ្នាំងជាបុរសម្នាក់ក្នុងចំណោមពលរដ្ឋកម្ពុជាទាំងបួននាក់ដែលត្រូវគេចាប់ជំរិត ប្រាប់VOAថា អ្នកស្រីមិនដែលបានទទួលដំណឹងពីសុខទុក្ខប្អូនប្រុសរបស់អ្នកស្រីអស់ជាច្រើនឆ្នាំមកហើយ។តាំងពីលោកអែម ភូមិមុន្នីចាកចេញទៅធ្វើកម្មករនេសាទនៅប្រទេសជប៉ុនតាំងពីឆ្នាំ២០១០មក។ អ្នកស្រីបន្តថាធ្លាប់ទទួលទូរស័ព្ទចំនួនមួយដងគត់កាលពីឆ្នាំ២០១២ ពេលនោះប្អូនប្រុសអ្នកស្រីប្រាប់ថារូបគេត្រូវបានចាប់ជំរិត។
«ប្អូនខ្ញុំធ្លាប់ទូរស័ព្ទមកខ្ញុំយូរហើយ ថាគេចាប់ ហើយលឺសូរខ្យល់ផង ស្ដាប់មិនបានអី បាត់ដំណឹងសូន។ ដល់ពេលកាលពីថ្ងៃសៅមុន ប្អូនខ្ញុំទូរសព្ធមកខ្ញុំថាមកផ្ទះវិញឆាប់ៗ។ខ្ញុំអរណាស់ បានប្អូនមកវិញ»។
នាវានេសាទ FV Naham 3 ដែលមានទង់ជាតិនៃប្រទេសអូម៉ង់ (Oman)ផ្ទុកអ្នកនេសាទសមុទ្រចំនួន២៩នាក់។តែមានមនុស្សបីនាក់ក្នុងចំណោមទាំងអស់នេះឈឺស្លាប់ដោយសារជំងឺនិងថប់ដង្ហើមស្លាប់ជាបន្តបន្ទាប់។មនុស្សនៅរស់រានមានជិវិតចំនួន២៦នាក់ត្រូវបានក្រុមចោរសមុទ្រនៅសូម៉ាលីចាប់ជំរិតកាលពីថ្ងៃទី២៦ ខែមិនា ឆ្នាំ ២០១២ នៅភាគខាងត្បូងប្រទេសសីស្សែល (Seychelles)នៃទ្វីបអាហ្រិក។ លោក John Steed អតីតឧត្តមសេនីយ៍នៃទ័ពជើងទឹកចក្រភពអង់គ្លេស និងក្រុមរបស់លោកបានចំណាយពេលប្រមាណចំនួន១៨ខែ ដើម្បីចរចារជាមួយមេដឹកនាំសាសនា ក្រុមតំណាងសហគមន៍ និងពិសេសក្រុមចោរសមុទ្រសូម៉ាលី ក្នុងការរំដោះបុរសនេសាទជនជាតិអាស៊ីទាំង២៦នាក់នេះ។នេះបើតាមសេចក្ដីថ្លែងការណ៍នៅលើគេហទំព័រ Oceans Beyond Piracy (OBP)។
លោក John Steed អ្នកសម្របសម្រួលនៃក្រុមដៃគូរគាំទ្រក្រុមចំណាប់ខ្មាំង ឬ The Hostage Support Partners ប្រាប់VOA តាមទូរសព្ទពីប្រទេសកេនយ៉ាថាលោកបានប្រគល់បុរសចំណាប់ខ្មាំងទាំង២៦នាក់នេះទៅឲ្យស្ថានទូតហ្វីលីពីនប្រចាំប្រទេសកេនយ៉ារួចហើយ។ហើយបុរសចំណាប់ខ្មាំងទាំងអស់រួមមានពលរដ្ឋកម្ពុជាចំនួនបួនរូបផងដែរនឹងត្រូវបញ្ជួនទៅប្រទេសហ្វីលីពីននៅល្ងាចថ្ងៃសុក្រទី២៨នេះវេលាម៉ោង១៦:៣០នាទី តាមជើងយន្តហោះ EK332 របស់ក្រុមហ៊ុនអាកាសចរណ៍ Emirates។
ក្រសូងការបរទេសនិងសហប្រតិបត្តិការអន្តរជាតិបានចេញសេចក្ដីប្រកាសព័ត៌មាននៅថ្ងៃច័ន្ទ ទី២៤ម្សិលមិញថាក្រសួងនឹងជួយសម្រួលធ្វើមាតុភូមិនិវត្តន៍ពលរដ្ឋកម្ពុជាពីប្រទេសហ្វីលីពីនមកកម្ពុជាឲ្យបានឆាប់រហ័ស។
លោក Steed ប្រាប់ថាបុរសចំណាប់ខ្មាំងទាំង២៦នាក់ចំណាយពេលចំនួនបួនឆ្នាំកន្លះនៅលើទូកចំណាប់ខ្មាំងដោយឆ្ងាយពីគ្រួសារ និងបរិភោគអាហារមិនគ្រប់គ្រាន់។
បើតាមសេចក្ដីថ្លែងការណ៍នៅលើគេហទំព័រ Oceans Beyond Piracy (OBP) បានឲ្យដឹងថា ចំណាប់ខ្មាំងនៅប្រទេសសូម៉ាលីនៅឆ្នាំ២០១២ ចំណាយថវិកាសេដ្ឋកិច្ចអន្តរជាតិរវាង៥,៧ លានដុល្លារ និង ៦,១ លានដុល្លារសហរដ្ឋអាមេរិក ហើយមានការកើនឡើងខ្ពស់បំផុតនៅខែមករា ឆ្នាំ២០១១។ក្រុមចោរសមុទ្រសូម៉ាលីចាប់ខ្លួនមនុស្សចំនួន៧៣៦នាក់ និងចំនួន៣២ទូកនេសាទ៕
