ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​មន្ត្រី​សង្គ្រោះ​ជាតិ​ថា​សុំ​សិទ្ធិ​ដើម្បី​បញ្ចៀស​ទណ្ឌកម្ម​អន្តរជាតិ​និង​ពង្រឹង​បក្ស


រូបឯកសារ៖ មន្ត្រី​ជាន់​ខ្ពស់​នៃ​គណបក្ស​សង្គ្រោះជាតិ បានជួបជុំគ្នានៅ​សាលាឧទ្ធរណ៍ ទាមទារឲ្យមានការ​ដោះលែងលោក កឹម សុខា ឲ្យ​នៅ​ក្រៅឃុំ រាជធានីភ្នំពេញ ថ្ងៃទី២៦ ខែកញ្ញា ឆ្នាំ២០១៧។

រហូតមក​ដល់​ពេលនេះ​ មាន​មន្ត្រី​អតីត​គណបក្ស​ប្រឆាំង​ចំនួន​៩​នាក់​ហើយ​ដែល​បាន​ទទួល​សិទ្ធិ​ធ្វើ​នយោបាយ​វិញ​ក្នុងចំណោម​១១៨នាក់​ ដែល​តុលាការ​កំពូល​បាន​ហាមឃាត់​ក្រោយពី​រំលាយ​គណបក្ស​កាលពី​ឆ្នាំ​២០១៧ ​គឺ​តែ​រយៈពេល​ប៉ុន្មាន​ខែ​មុន​ការ​រៀបចំ​ការបោះឆ្នោត​ជាតិ​ប៉ុណ្ណោះ។

ក្រុម​អតីត​អ្នក​តំណាងរាស្រ្ត​នៃ​គណបក្ស​សង្គ្រោះ​ជាតិ​បាន​ការពារ​ការ​សម្រេច​ចិត្ត​សុំ​សិទ្ធិ​ធ្វើ​នយោបាយ​ឡើងវិញ​ថា​ ដើម្បី​ជួយ​បន្ធូរបន្ថយ​ការ​តានតឹងនយោបាយ​ក្នុង​ពេល​ដែល​សហគមន៍​អន្តរជាតិ​កំពុង​តែ​ដំណើរការ​ដាក់​ទណ្ឌកម្ម​សេដ្ឋកិច្ច​លើ​ប្រទេស​កម្ពុជា។

នៅក្នុង​សន្និសីទ​សារព័ត៌មាន​មួយ​ក្នុង​រាជធានី​ភ្នំពេញ​ ហើយ​បាន​ផ្សព្វ​ផ្សាយ​តាម​បណ្តាញ​សង្គម កាលពី​ថ្ងៃច័ន្ទ​ ក្រោយ​ពី​ទទួល​បាន​សិទ្ធិ​ធ្វើ​នយោបាយ​ឡើងវិញ​កាលពី​សប្តាហ៍​មុន ពួកគេ​ក៏​ច្រាន​ចោល​ពាក្យ​ចោទ​ប្រកាន់​នានា​ដែល​ថា​ត្រូវ​បាន​ទិញដូរ​ឆន្ទៈ​ដោយ​គណបក្ស​កាន់​អំណាច។

លោក​អ៊ូ ច័ន្ទរ័ត្ន​ អតីត​សមាជិក​គណៈកម្មាធិការ​កណ្តាល​គណបក្ស​សង្គ្រោះ​ជាតិ​និង​ជា​អតីត​អ្នក​តំណាងរាស្ត្រ​បាន​បញ្ជាក់​នៅក្នុង​សេចក្តី​ថ្លែងការណ៍ ​ដែល​បាន​ព្រាង​ទុក​ថា ការ​សុំ​សិទ្ធិ​ធ្វើ​នយោបាយ​ឡើងវិញនេះ​ក៏​ជា​ការ​កសាង​ទំនុក​ចិត្ត​ក្នុង​ចំណោម​អ្នក​នយោបាយ​ខ្មែរ​ ដើម្បី​ដោះស្រាយ​បញ្ហា​ប្រឈម​ទណ្ឌកម្ម​សេដ្ឋកិច្ច​របស់​សហភាព​អឺរ៉ុប​និង​សហរដ្ឋ​អាមេរិក​លើ​ប្រព័ន្ធអនុគ្រោះពន្ធ​ EBA ​និង​ GSP។

លោក​បាន​បន្ថែម​ថា៖

«នៅពេល​នេះ​យើងខ្ញុំ​យល់​ថា ការ​បញ្ចៀស​នូវ​ការ​ផ្តាច់​នូវ​ប្រព័ន្ធ​អនុគ្រោះ​ពន្ធ EBA និង​ GSP ជា​កិច្ចការ​សំខាន់​ដែល​ត្រូវ​ធ្វើ​ចាំបាច់​ដើម្បី​លើក​កម្ពស់​ជីវភាព​ប្រជាពលរដ្ឋ​ខ្មែរ​និង​ស្តារ​ឡើង​វិញនូវ​លទិ្ធ​ប្រជាធិបតេយ្យ​និង​ការ​គោរពសិទ្ធិ​មនុស្ស​នៅ​ប្រទេស​កម្ពុជា​ យើង​ខ្ញុំ​ចង់​ឱ្យ​មាន​ការ​ផ្សះផ្សា​ជាតិ និង​ឯកភាព​ជាតិ​តាម​រយៈ​វប្បធម៌​សន្ទនាដែល​យើង​ជឿ​ជាក់ថា​ជា​គំរូ​ដ៏ល្អ​សម្រាប់​អ្នក​ជំនាន់​ក្រោយ‍»។​

រហូតមក​ដល់​ពេលនេះ​ មាន​មន្ត្រី​អតីត​គណបក្ស​ប្រឆាំង​ចំនួន​ ៩​ នាក់​ហើយ​ដែល​បាន​ទទួល​សិទ្ធិ​ធ្វើ​នយោបាយ​វិញ​ក្នុងចំណោម ​១១៨ នាក់​ ដែល​តុលាការ​កំពូល​បាន​ហាមឃាត់​ក្រោយពី​រំលាយ​គណបក្ស​កាលពី​ឆ្នាំ​ ២០១៧ ​គឺ​តែ​រយៈពេល​ប៉ុន្មាន​ខែ​មុន​ការ​រៀបចំ​ការបោះឆ្នោត​ជាតិ​ប៉ុណ្ណោះ។

ក្នុង​ចំណោម​មន្ត្រី​ទាំង ​៩ នាក់ គឺ​មាន​លោកគង់ គាំ ​លោកគង់ បូរ៉ា​ លោកអ៊ូ ច័ន្ទរ័ត្ន ​លោកកង គឹមហាក់​ ​លោក​ស្រី​ ​ទេព សុទ្ធី​ លោក​រៀល ខេមរិន្ទ្រ លោកច័ន្ទ សីលា ​លោក​ ជីវ កត្តានិង​លោកស៊ឹម សុវណ្ណនី។

លោកស្រី ទេព សុទ្ធី ​អតីត​អ្នក​តំណាងរាស្រ្ត​មណ្ឌល​តាកែវ​ បាន​ថ្លែង​នៅក្នុង​សន្និសីទ​នោះ​ដែរ​ថា ​លោក​ស្រី​មិន​អាច​ឈរ​អោប​ដៃ​មើល​ទុក្ខ​លំបាក​របស់​ពលរដ្ឋ​បាន​ទេ នៅពេល​ណា​មាន​ទណ្ឌកម្ម​សេដ្ឋកិច្ច​ពី​សហភាព​អឺរ៉ុប​និង​សហរដ្ឋ​អាមេរិក។

លោកស្រី​បាន​លើក​ឡើង​ថា៖ «ប្រសិនបើ​ឋានៈ​ពាណិជ្ជកម្ម​ពិសេស​ត្រូវបាន​ដកហូត ឬ​ការ​ផ្អាក​ការ​បង្កើន​តម្លៃ​បន្ថែម​នៃ​ផលិតផល​កម្ពុជា​នឹង​ធ្វើ​ឱ្យ​ប៉ះពាល់​ដល់​ការ​ប្រកួតប្រជែង​តម្លៃ​ និង​ផលិតផល​នាំ​ចេញ​កម្ពុជា​ កម្មករ​រោងចក្រ ​និង​កសិករ​រាប់​លាន​នាក់​នឹង​ទទួល​ផល​ប៉ះពាល់​ខាង​ផ្នែក​សេដ្ឋកិច្ច‍»។​

កាលពី​ដើម​ខែ​កុម្ភៈ សហភាព​អឺរ៉ុប​បាន​ចាប់​ផ្តើម​នូវ​ដំណើរការ​ដកហូតឋានៈ​អនុគ្រោះ​ពន្ធ​«រាល់​មុខទំនិញលើកលែង​សព្វាវុធ‍» ​(​EBA) ពី​ប្រទេស​កម្ពុជា ហើយដែល​អាច​នឹង​ចូល​ជា​ធរមាន​នៅ​ខែ​សីហា ​ឆ្នាំ​ ២០២០។ សហភាព​អឺរ៉ុប​គឺជា​ទីផ្សា​រនាំ​ចេញ​ដ៏​ធំ​បំផុត​របស់​កម្ពុជា​ ដែល​មាន​ទំហំ​ទឹកប្រាក់ជាង ​៥,៦ពាន់លាន ​ដុល្លារ​ក្នុង​ឆ្នាំ​ ២០១៨។

រីឯ​អ្នក​តំណាងរាស្រ្តនិង​សមាជិកព្រឹទ្ធ​សភាសហរដ្ឋ​អាមេរិក​ក៏​បាន​ស្នើ​ច្បាប់​ពីរដើម្បី​សើរើ​ឋានៈ​អនុគ្រោះពន្ធ GSP ​ដែល​កម្ពុជា​ទទួល​បាន​ផង​ដែរ។ សហរដ្ឋ​អាមេរិក​ជា​ទីផ្សារ​នាំ​ចេញ​ដ៏ធំ​បំផុត​ទីពីរ​របស់​កម្ពុជា ដែល​មាន​ទំហំ​ទឹកប្រាក់​ចំនួន​ជាង​ ៣​ពាន់​លាន ​ដុល្លារ​កាលពី​ឆ្នាំមុន។

ក្រុមការងារ​សហភាព​អឺរ៉ុប​បាន​មក​បំពេញ​បេសកកម្ម​តាមដាន​ និង​វាយ​តម្លៃ​នៅ​កម្ពុជា​កាលពី​សប្តាហ៍​មុន ដោយ​បាន​ជួប​ពិភាក្សា​ជាមួយ​នឹង​មន្ត្រី​សំខាន់ៗ​របស់​កម្ពុជា​ ហើយ​បាន​សម្តែង​ក្តី​សង្ឃឹមថានឹង​មាន​ការ​វិវត្ត​ទៅមុខ​«ជាក់លាក់​និង​ប្រកប​ដោយ​ចីរភាព‍»​ ដោយ​រដ្ឋាភិបាល​កម្ពុជា​នឹង​ដោះស្រាយ​ជា​«បន្ទាន់‍»​រាល់​ក្តីកង្វល់​របស់​ខ្លួន​ពាក់ព័ន្ធ​នឹង​ការ​ដើរ​ថយ​ក្រោយ​នៃ​លទ្ធិ​ប្រជាធិបតេយ្យ ​និង​សិទ្ធិ​មនុស្ស​នៅប្រទេសកម្ពុជា។

ថ្នាក់​ដឹកនាំ​សំខាន់​របស់​គណបក្ស​សង្គ្រោះ​ជាតិ​ដែល​មាន​ដូច​ជា​លោក​សម រង្ស៊ី ប្រធាន​ស្តី​ទី លោកអេង ឆៃអ៊ាង ​និង​លោកស្រី​មូរ សុខហួរ អនុប្រធានបក្ស​ ​រក្សា​ជំហរ​មិន​សុំ​សិទ្ធិ​ធ្វើ​នយោបាយ និង​បាន​ហៅ​អ្នក​ទាំងនោះ​ថា​ចុះចូល​នឹង​គណបក្ស​កាន់​អំណាច ​ប៉ុន្តែ​អតីត​មន្ត្រី​ទាំងនេះ​អះអាង​ថា ​ពួកគេនៅ​តែរក្សា​ភក្តីភាព​ចំពោះ​គោល​នយោបាយ​បក្ស​ដដែល។

លោក​អ៊ូ ច័ន្ទរ័ត្ន​ បាន​បន្ថែម​ទៀតថា៖

«យើង​ខ្ញុំ​នៅតែ​បន្ត​ប្រកាន់​យក​គោលការណ៍​និង​ស្មារតី​របស់​សង្គ្រោះ​ជាតិ​ដដែល​គឺ​អហិង្សា ខ្មែរ​តែ​មួយ​ មិន​យក​ខ្មែរ​ណា​ជា​សត្រូវ​និង​បន្ត​ជំរុញ​ឱ្យ​មាន​ការ​ផ្លាស់​ប្តូរ​ជា​វិជ្ជមាន​នៅ​កម្ពុជា។ យើង​ខ្ញុំ​នឹង​ប្រឹងប្រែង​ឱ្យ​អស់​លទ្ធភាព​ដើម្បី​បង្រួបបង្រួម​និង​រក្សា​កម្លាំង​គាំទ្រ​សង្គ្រោះ​ជាតិ​ដើម្បី​បន្ត​ការ​ប្រកួត​ប្រជែង​នយោបាយ​ដោយ​យុត្តិធម៌​និង​តាម​គោលការណ៍​ប្រជាធិបតេយ្យ‍»។​

ពួកគេ​លើកឡើងថា​ ចាប់តាំងពី​ត្រូវបាន​ដក​ហូត​សិទ្ធិ​នយោបាយ​មក ​ពួកគេ​មិន​អាច​ធ្វើ​សកម្មភាព​អ្វី​បាន​ទាំង​អស់​ដោយ​ត្រូវ​រង​ការ​តាមដាន​ពី​កម្លាំង​របស់​រាជរដ្ឋាភិបាល ហើយ​ការ​ទទួល​បាន​សិទ្ធិ​នេះ​គឺជា​ការ​បង្ក​ការ​ងាយស្រួល​ក្នុង​ការ​ធ្វើ​សកម្មភាព​ពង្រឹង​មូលដ្ឋាន​និង​ការទូត​នៅ​ក្នុង​ប្រទេស ជាពិសេស​ការ​ទាមទារ​ឱ្យ​ដោះលែង​លោក​កឹម សុខា​ ប្រធាន​គណបក្ស ដែល​កំពុង​តែ​ជាប់​ឃុំឃាំង​នៅក្នុង​លំនៅដ្ឋាន​ និង​ការ​ពង្រឹង​បក្ស​មិន​ឱ្យ​បែក​បាក់​គ្នា​ទៀត។

នៅក្នុង​កម្មវិធី​ជួប​ជុំ​ជាមួយ​នឹង​អ្នកគាំទ្រនៅវត្ត​ត្រៃរតនារាម ​ទីក្រុង​ទូលូស្ស ប្រទេស​បារាំង​ កាលពី​ថ្ងៃច័ន្ទ​ លោក​សម រង្ស៊ី​ នៅតែ​អះអាង​ពី​គោលការណ៍​តស៊ូ​ដោយ​អហិង្សា​ និង​សារៈសំខាន់​នៃ​ការ​រួបរួម​គ្នា​ជាមួយ​នឹង​លោក​កឹម សុខា ដោយ​លោក​បាន​រំលឹក​ពី​លទ្ធផល​នៃការ​បោះឆ្នោត​ឆ្នាំ​ ២០១៣ ដែល​ធ្វើ​ឱ្យ​អតីត​គណបក្ស​ប្រឆាំង​នេះ​មាន​សំឡេង​គាំទ្រ​ជាច្រើន​ ហើយ​និង​ព្រឹត្តិការណ៍​នាពេល​ក្រោយ​ពី​នោះ​ នៅពេល​ដែល​ពលរដ្ឋ​ជាច្រើន​ម៉ឺននាក់​បាន​ចូល​មក​តវ៉ា​នៅ​រាជធានី​ភ្នំពេញ​ ដែល​លោក​អាច​នឹង​ប្រើ​ប្រាស់ដើម្បី​គ្រប់គ្រង​ស្ថាប័ន​រដ្ឋ​មួយ​ចំនួន​ដោយ​ហិង្សា​ ប៉ុន្តែ​ថ្នាក់​ដឹកនាំ​ទាំងពីរ​មិន​សម្រេច​ចិត្ត​ធ្វើដូច្នេះ​ទេ​ ដោយសារតែ​ចង់​ឱ្យ​មាន​ការ​ផ្លាស់ប្តូរ​ដោយ​សន្តិវិធី។

ប៉ុន្តែលោក​នាយក​រដ្ឋមន្រ្តី ​ហ៊ុន សែន​ បាន​ថ្លែង​កាលពី​ថ្ងៃច័ន្ទ​ដែរ​ថា ​នឹង​មិន​មាន​ការ​ដោះ​លែងលោក​ កឹម សុខា ទេដោយ​លោក​បាន​ចោទ​មេដឹកនាំ​បក្ស​ប្រឆាំង​រូប​នេះថា​បាន​ហាម​មន្រ្តី​បក្ស​ប្រឆាំង​ផ្សេង​ទៀត​មិន​ឲ្យ​ស្នើ​សិទ្ធិ​ធ្វើ​នយោបាយ៕

XS
SM
MD
LG