បុគ្គលិកធ្វើការនៅឯអាកាសយានដ្ឋាន Fort Lauderdale នៅក្នុងរដ្ឋ Florida ដែលស្ថិតនៅភាគអាគ្នេយ៍សហរដ្ឋអាមេរិក បានធ្វើការពេញមួយយប់ដើម្បីជួយឲ្យអាកាសយានដ្ឋាននេះអាចមានប្រតិបត្តិការឡើងវិញនៅថ្ងៃសៅរ៍នេះ ក្រោយពេលដែលខ្មាន់កាំភ្លើងមួយរូបបានធ្វើការបាញ់ប្រហារនៅឯកន្លែងយកវ៉ាលី ដោយបានសម្លាប់មនុស្សចំនួន៥នាក់ ហើយធ្វើឲ្យមនុស្ស៨នាក់ផ្សេងទៀតរងរបួសមុននឹងជននេះត្រូវបានចាប់ខ្លួន។
អាកាសយានដ្ឋានដែលមានភាពមមាញឹកជាធម្មតាមួយនេះត្រូវបានបិទទ្វារចាប់តាំងពីការវាយប្រហារដែលបង្កឲ្យមនុស្សស្លាប់នេះកាលពីរសៀលថ្ងៃសុក្រ។
លោក George Piro ភ្នាក់ងារពិសេសរបស់ការិយាល័យស៊ើបអង្កេតរបស់សហព័ន្ធទទួលបន្ទុកនៅតំបន់ទីក្រុង Miami បានថ្លែងថា ទីភ្នាក់ងាររបស់លោក កំពុងធ្វើការស៊ើបអង្កេតឲ្យបានគ្រប់ជ្រុងជ្រោយដើម្បីស្វែងរកមូលហេតុដែលនៅពីក្រោយការវាប្រហារនេះ រួមទាំងស៊ើបអង្កេតទៅលើសកម្មភាពភេរវកម្មផងដែរ។
មន្ត្រីប៉ូលិសដែលចាប់ខ្លួនជនសង្ស័យនោះបានថ្លែងថា ជននោះមានអាយុ ២៦ឆ្នាំ ឈ្មោះ Esteban Santiago មកពីរដ្ឋ Alaska ហើយបានធ្វើដំណើរមកដល់អាកាសយានដ្ឋាននៅរដ្ឋ Florida នេះ កាលពីថ្ងៃសុក្រ តាមជើងហោះហើរមួយពីទីក្រុង Anchorage រដ្ឋ Alaska។
Santiago ត្រូវបានគេរាយកាណ៍មកថាជា អតីតបុគ្គលិករបស់អង្គភាព National Guard ដែលបម្រើការនៅដែនដី Puerto Rico។ កាលពីឆ្នាំមុន ជននេះបានស្ម័គ្រចិត្តទៅមន្ទីរពេទ្យដើម្បីពិនិត្យសុខភាពផ្លូវចិត្ត។ ជននេះត្រូវបានរាយការណ៍មកថា បានឮសំឡេងរវើរវាយ ហើយអ្នកខ្លះបបួលខ្លួនឲ្យចូលរួមក្នុងក្រុមរដ្ឋឥស្លាម៕
