វិធានការសន្តិសុខត្រូវបានរឹតបន្តឹងសម្រាប់ការពារសុវត្ថិភាព និងសណ្តាប់ធ្នាប់សាធារណៈនៅក្នុង ការប្រារព្វពិធីបុណ្យអ៊ុំទូកតាមប្រពៃណីខ្មែរ ខណៈដែលប្រជាពលរដ្ឋខ្មែររហូតដល់៥លាននាក់ មកពីតំបន់នានាទូទាំងប្រទេស ហូរចូលទីក្រុងភ្នំពេញ ដើម្បីមើលពិធីប្រណាំងទូកដែលចាប់ផ្តើមពី ថ្ងៃទី២០ដល់ថ្ងៃទី២២ ខែវិច្ឆិកានៅចំពេលខែពេញបូណ៌មី។ ទូកចំនួន៤២០គ្រឿង និងអ្នកចែវទូកជាង ២៧.០០០បានចូលរួមប្រណាំងនៅក្នុងពិធីបុណ្យអ៊ុំទូកឆ្នាំ២០១០នេះ។
ពិធីបុណ្យអ៊ុំទូកតាមប្រពៃណីខ្មែរ ប្រារព្វធ្វើឡើងចាប់ពីថ្ងៃទី២០ដល់ថ្ងៃទី២២ ខែវិច្ឆិកានៅ ចំពេលខែពេញបូណ៌មី និង ជាពិធីបុណ្យដ៏ហ៊ឺហា និងសម្បូរបែបបំផុតនៅក្នុងប្រតិទិនខ្មែរដែលប្រារព្វ ឡើងប្រសើរជាងការប្រារព្វពិធីបុណ្យចូលឆ្នាំថ្មី។
ក្រុមមន្ត្រីអាជ្ញាធរក្រុងភ្នំពេញ បានប៉ាន់ប្រមាណថា ប្រជាពលរដ្ឋខ្មែររហូតដល់ប្រាំលាននាក់មកពី គ្រប់ស្រទាបវណ្ណៈ និងពីគ្រប់ច្រកល្ហកទូទាំងប្រទេសមកប្រមូលផ្តុំគ្នាជាក្រុមនៅមាត់ច្រាំងទន្លេសាប និងទន្លេមេគង្គនៅក្នុងទីក្រុងភ្នំពេញ ដើម្បីមើលការប្រណាំងទូកជាប្រពៃណី។ ការប្រណាំងទូកនេះ ធ្វើឡើងសម្រាប់រំឭកទៅដល់សម័យបុរាណ ដើម្បីកត់សម្គាល់ឥទ្ធិពលរបស់កងទ័ពជើងទឹកខ្មែរ ដ៏មានឫទ្ធី អំណាច នៅក្នុងសម័យចក្រភពខ្មែរ។
ទូកចំនួន៤២០គ្រឿង និងអ្នកចែវទូកជាង ២៧.៧៣០នាក់ សម្រាប់ការចូលរួមប្រណាំងនៅក្នុងពិធី បុណ្យអ៊ុំទូកឆ្នាំ២០១០ បានកើនឡើង២៩ទូក និងអ្នកចែវទូកជាង ២.៣៥០នាក់ បើប្រៀបធៀបនឹង ពិធីបុណ្យ អ៊ុំទូកឆ្នាំ២០០៩ មានទូក៣៩១គ្រឿង និងអ្នកចែវទូកជាង២៥.៣៨០នាក់, នេះបើយោង តាមតួលេខរបស់គណៈកម្មាធិការរៀបចំបុណ្យជាតិ។
លោកឧត្តមសេនីយ៍ទូច ណារ៉ុដ ស្នងការប៉ូលីសក្រុងភ្នំពេញ បានថ្លែងថាកងសន្តិសុខជាង១០.០០០ នាក់នេះ រួមមាន កងកម្លាំងរាជអាវុធហស្ថ កងកម្លាំងប៉ូលីស កងកម្លាំងចរាចរ កងកម្លាំងអន្តរាគមន៍ កងកម្លាំងល្បាត កងកម្លាំងសម្ងាត់ កងអង្គរក្ស និងកងរថយន្តសង្គ្រោះ។
លោកឧត្តមសេនីយ៍រូបនេះ បានបញ្ជាក់ថា កងកម្លាំងសម្ងាត់ក្នុងសម្លៀកបំពាក់ស៊ីវិលនេះមានភារកិច្ចឃ្លាំមើលរាល់សកម្មភាពខុសច្បាប់នានា ដូចជា ចោរឆក់ ចោរលូកហោប៉ាវ ចោរប្លន់ ចោរលួច និងសកម្មភាពក្មេងទំនើងជាដើម។
«កម្លាំងសន្តិសុខច្រើនណាស់ ប៉ុន្តែដោយឡែកកម្លាំងប៉ូលីសរបស់ខ្ញុំមាន៤.៦១៩នាក់ និងកងកម្លាំង រាជអាវុធហស្ថ និងកងកម្លាំងអង្គរក្សដែលមានកម្លាំងសន្តិសុខរហូតដល់ជាង១០.០០០នាក់។ នៅ ក្នុងពិធីបុណ្យនេះ យើងរឹតបន្តឹងវិធានការសន្តិសុខ ពីព្រោះយើងខ្លាចជនល្មើសឆ្លៀតធ្វើសកម្មភាព ដែលប្រជាពលរដ្ឋមកចូលរួមកម្សាន្តសប្បាយដោយចោលផ្ទះសម្បែង និងតាមដងផ្លូវ។ យើងប្រើ ប្រាស់កម្លាំងទាំងអស់។ យើងអត់មានបែងចែកវេនគ្នាទេ»។
លោកឧត្តមសេនីយ៍បានថ្លែងថា ក្រុមអាជ្ញាធរក្រុងភ្នំពេញបានបង្កើតទីបញ្ជាការសន្តិសុខសំខាន់ៗចំនួនប្រាំពីរកន្លែងដែលមានទីតាំងនៅកោះពេជ្រ ស្ពានជ្រោយចង្វា វត្តឧណ្ណាលោម វាលព្រះមេរុ មុខវត្តបទុមវតី ដីក្រហមផ្សារចាស់ និងវិមានឯករាជ្យ។
«ទីបញ្ជាការទាំងប្រាំពីរនេះ គឺរង់ចាំបម្រើសំណូមពរ និងសេចក្តីត្រូវការរបស់ប្រជាពលរដ្ឋដែលមក កម្សាន្តសប្បាយជួបប្រទះនឹងហេតុការណ៍អ្វីមួយកើតឡើងដោយចៃដន្យ និងយថាហេតុ អាចប្តឹងមកសមត្ថកិច្ចនៅទីនោះ ដើម្បីមានវិធានការឱ្យបានទាន់ពេល»។
លោកវរសេនីយ៍ទោហាស់ ភិរម្យ ប្រធានការិយាល័យសណ្តាប់ធ្នាប់ក្រុងភ្នំពេញ បានបញ្ជាក់ថា ប៉ូលីស និងកងរាជអាវុធហស្ថបានដាក់ពង្រាយនៅតាមច្រកផ្លូវចូលទីក្រុងភ្នំពេញទាំងអស់ ដើម្បី បិទច្រកមិនឱ្យរថយន្តធំៗ ចូលទីក្រុងភ្នំពេញដែលនាំឱ្យកកស្ទះចរាចរណ៍។
លោកបានបន្តថា ច្រកផ្លូវចូលទៅកាន់មាត់ទន្លេតាមបណ្តោយផ្លូវនរោត្តមត្រូវបានបិទការធ្វើចរាចរ ដោយកង់ ម៉ូតូ និងរថយន្ត ដើម្បីជៀសវាងការស្ទះចរាចរ លើកលែងតែអ្នកដើរ។
លោកឧត្តមសេនីយ៍ទូច ណារ៉ុដ ស្នងការប៉ូលីសក្រុងភ្នំពេញ បានបញ្ជាក់ថា ប៉ូលីស និងកងរាជ អាវុធហស្ថ សហការគ្នាល្បាតតាមដងផ្លូវសាធារណៈដើម្បីការពារ និងទប់ស្កាត់រាល់បទល្មើស ទាំងឡាយដែលអាចកើតមានឡើងជាយថាហេតុ។
លោកសំ សាមុត ប្រធានអង្គភាពសួនច្បារ បានថ្លែងថា កម្មករជាង៣០០នាក់បានត្រូវដាក់ពង្រាយនៅតាមសួនច្បារនានា ដើម្បីបោសសម្អាតចាប់ពីម៉ោង១២យប់ទៅ និងបង្គន់អនាម័យចល័ត២១៥ដែលរួមមាន បង្គន់១១៥សម្រាប់ត្រើយខាងលិចទន្លេ និង១០០បង្គន់ទៀតសម្រាប់ត្រើយខាងកើតទន្លេ៕