រថយន្ត SUV មួយគ្រឿងដែលបានបើកយ៉ាងលឿនទម្លុះចូលការដើរក្បួនបុណ្យ Christmas នៅក្នុងទីក្រុង Waukeshan រដ្ឋ Wisconsin កាលពីថ្ងៃអាទិត្យ ដោយបានសម្លាប់មនុស្ស៥នាក់ និងធ្វើឲ្យជាង៤០នាក់ទៀតរងរបួស រួមទាំងក្រុមអ្នករាំក្មេងៗដែលបានគ្រវីផ្កា ឬក្រណាត់ផងដែរ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ប្រធានប៉ូលិសក្រុង Waukesha លោក Dan Thompson បាននិយាយថា មនុស្សម្នាក់ត្រូវបានឃុំខ្លួន ហើយរថយន្តមួយគ្រឿង បានត្រូវគេរកឃើញបន្ទាប់ពីឧបទ្ទវហេតុនៅក្នុងទីក្រុងដែលស្ថិតនៅចម្ងាយប្រហែល៣២គីឡូម៉ែត្រភាគខាងលិចទីក្រុង Milwaukee រដ្ឋ Wisconsin។
ការិយាល័យប៉ូលិសក្រុង Waukesha បានបញ្ជាក់នៅលើគេហទំព័រ Facebook របស់ខ្លួនថា៖ «នៅពេលនេះ យើងអាចបញ្ជាក់ថា មនុស្ស៥នាក់បានស្លាប់ និងជាង៤០នាក់ទៀតបានរងរបួស។ ទោះជាយ៉ាងណាក៏ដោយ ចំនួននេះ អាចផ្លាស់ប្តូរនៅពេលដែលយើងប្រមូលព័ត៌មានបន្ថែមទៀត។ មនុស្សជាច្រើន បានត្រូវគេដឹកទៅកាន់មន្ទីរពេទ្យនៅក្បែរនោះ»។
លោក Thompson នៅមុននោះ បានប្រាប់ពួកអ្នកយកព័ត៌មានថា គេមិនទាន់ដឹងថា តើឧបទ្ទវហេតុនោះ មានទាក់ទិននឹងភេរវកម្មដែរឬទេ។
វីដេអូដែលត្រូវបង្ហោះតាមអនឡាញ បានបង្ហាញថា រថយន្តប្រភេទ SUV ពណ៌ក្រហម បានបើកក្នុងល្បឿនយ៉ាងលឿនបុកទម្លុះចូលការដើរក្បួន ដោយទំនងបានបើកកិនមនុស្សរាប់សិបនាក់មុនពេលហ្វូងមនុស្សនៅតាមចិញ្ចើមផ្លូវសម្រុកមកជួយ។
លោក Thompson បាននិយាយទៀតថា មន្ត្រីប៉ូលិសម្នាក់ បានបាញ់រថយន្តនោះហើយមិនមានមនុស្សដែលឈរនៅក្បែរនោះ បានរងរបួសទេ។ ប៉ូលិសមិនជឿថា មានការបាញ់ចេញមកពីរថយន្តនោះទេ។ លោកបាននិយាយនេះ ផ្ទុយពីសេចក្តីរាយការណ៍ពីដំបូងៗ។
វីដេអូនៅលើបណ្តាញព័ត៌មានសង្គមទំនងបានបង្ហាញថា ប៉ូលិសបានបាញ់ទៅលើរថយន្តនោះ នៅពេលដែលវាបានបុកទម្លុះរបាំងនៅតាមផ្លូវ៕
