ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ភ្លើងព្រៃ​បង្កើត​បញ្ហា​ដល់រដ្ឋ​តិចសាស​និងភូមិភាគ​នៃ​តំបន់​ដីរាបក្នុងស.រ.អ.


អ្នក​ពន្លត់​ភ្លើង​ស្ម័គ្រ​ចិត្ដ​ម្នាក់​​បាញ់​ទឹក​លើ​ភ្លើង​នៅជាយ​​ទី​ក្រុង​ Marfa​ រដ្ឋ​តិចសាស​ ហើយ​ខ្យល់​ផាត់​ភ្លើង​នោះ​ទៅ​ដល់​ Fort Davis នៅ​ថ្ងៃ​ទី​ ៩​ ខែ​មេសា​ ឆ្នាំ​២០១១។​
អ្នក​ពន្លត់​ភ្លើង​ស្ម័គ្រ​ចិត្ដ​ម្នាក់​​បាញ់​ទឹក​លើ​ភ្លើង​នៅជាយ​​ទី​ក្រុង​ Marfa​ រដ្ឋ​តិចសាស​ ហើយ​ខ្យល់​ផាត់​ភ្លើង​នោះ​ទៅ​ដល់​ Fort Davis នៅ​ថ្ងៃ​ទី​ ៩​ ខែ​មេសា​ ឆ្នាំ​២០១១។​

ស្ថានភាព​រីង​ស្ងួត ​និង​ ខ្យល់​បក់​ខ្លាំង ជំរុញ​ឲ្យ​មាន​ភ្លើង​ព្រៃ​បំផ្លិច​បំផ្លាញ​តំបន់​ភាគ​ខាង​ជើង​ប្រទេស​ ម៉ិច​ស៊ីកូ ​និង​រដ្ឋ​មួយ​ចំនួន​នៃ​ តំបន់​ផ្ទៃ​ដី​រាប​នៃ​ភាគ​ខាងត្បូង​ ស.រ.អ. ​ជា​ពិសេស​រដ្ឋ​តិចសាស ដែល​គេហដ្ឋាន​ជាង​ម្ភៃ​ខ្នង​ បាន​ត្រូវ​ឆេះ​ កាល​ពី​ពេល​ថ្មី​ៗ​នេះ។ អាកាសធាតុ​ស្ងួត​ បាន​ធ្វើ​ឲ្យ​ប៉ះ​ពាល់​ដល់​កសិកម្ម​ បណ្ដាល​ឲ្យ​ម្ហូប​អាហារ​ឡើងថ្លៃ​។

ភ្លើង​ព្រៃ​ឆេះ​លឿន​រហ័ស​បាន​បំផ្លាញ ​ដី​ទំហំ ​៣ម៉ីនពីរពាន់​ហិច​តារ​ នៅ​តំបន់​កសិដ្ឋាន​ ភាគខាង​លិច​រដ្ឋ​តិចសាស និង​ នៅ​ជុំវិញ​ Fort​ Davis​ កាល​ពី​ថ្ងៃ​សៅរ៍​និង​ថ្ងៃ​អាទិត្យ​ ដោយ​សម្លាប់​សត្វ​ គោ​ និង​សេះ ​ហើយ​ធ្វើ​ឲ្យ​វាល​ស្មៅ​សត្វស៊ី ​ឆេះ​ខ្លោច​ហុយ​ផ្សែង​ទ្រលោម។

ភ្លើង​ព្រៃ​នោះ​ រាល​ដាល​ដល់​តំបន់​មនុស្ស​រស់​នៅ​ នៅ​ជុំវិញ​ Fort​ Davis ហើយ​បាន​បំផ្លាញ​គេហដ្ឋាន​ ២៤ ​ខ្នង ។

អ្នក​នាំ​ពាក្យ​របស់ ​ក្រុម​ពន្លត់ភ្លើង​នៃ​ស្រុក​ Fort​ Davis ​ លោក ​Jim​ Fowler​ ថ្លែង​ថា ​ម្ចាស់​ផ្ទះ​ឆេះ ​បាន​គេច​ខ្លួន​ផុត​ពី​គ្រោះថ្នាក់​ដោយ​សុវត្ថិភាព ហើយ ​ឋិតនៅ​ក្នុង​ជំរំ​បណ្ដោះ​អាសន្ន ។

«បុគ្គលិក​សង្រ្គោះ ​របស់​កាកបាតក្រហម ចាត់​ចែង​ការណ៍​នេះ។ ​គេ​ចែក​ប័ណ្ណ​សំណាក់​នៅ​សណ្ឋាគារ និងប័ណ្ណ​អាហារ ហើយ ​សណ្ឋាគារ​មួយ​ចំនួន​នៅ​ទីនេះអនុញាត​បើក​បន្ទប់​មិន​គិតថ្លៃ​ដល់​ជន​រងគ្រោះទាំងនោះ»។

លោក​ Fowler​ និយាយ​ថា​ សត្វគោ​ នឹង​ សេះ​ខ្លះ​ចេញ​មិន​រួច​ពី​អគ្គីភ័យ។​ លោក​ និយាយ​ថា​ក្រុម​សង្គ្រោះ​ដើរ​ល្បាត​នៅ​តាម​តំបន់​ភ្លើងឆេះ​នៅ​ជនបទ​បាន​រកឃើញ​សត្វ​ស្លាប់​នៅ​ច្រើន​កន្លែង។

លោក ​ថ្លែង​ថា​ខ្យល់​បក់​ខ្លាំង​ ធ្វើ​ឲ្យ​មាន​ការ​លំបាក​ដល់​ក្រុម​អ្នក​ពន្លត់​ភ្លើង​ដែល​ខិតខំ​ទប់ទល់​មិន​ឲ្យ​ភ្លើង​រាល​ដាល​ដល់​ទីកន្លែង​ដទៃ ​រួច​សភាព​ស្ងួត​ និង​ខ្យល់​បក់​ខ្លំាង​ អាច​ មាន​នៅ​ជា​ច្រើន​សប្ដាហ៍​ត​ទៅ​ទៀត។

«នៅ​ពេល​នេះ ក្នុង​រដូវ​ផ្កា​រីក ​ជា​ធម្មតា ​នៅ​ពេល​ដែល​មាន​ខ្យល់​បក់​ខ្លាំង​ និង​ អាកាស​ធាតុ​ស្ងួត នេះ ​ជា​រដូវ​ភ្លើង​ព្រៃ។​ ការ​ព្យាករណ៍ ​រយៈ​ពេល​យូរ​ អំពី​ព័ត៌មាន​អាកាសធាតុ​ដែល​យើង​បាន​ស្រាវ​ជ្រាវ​ បង្ហាញ​ឲ្យ​ដឹង​ថា​យើង​មិន​មាន​ភ្លៀង​ធ្លាក់​ទេ ​រហូត​ដល់​រដូវ​ភ្លៀង​ធម្មតា​ដែល​នឹង​ចាប់​ផ្ដើម​នៅ​ខែ​កក្កដា​ និង​ ខែ​ សីហា»។

អាកាសធាតុវិទូ​ នៃ​ សកលវិទ្យាល័យ ​Texas​ A​ &​ M ​ផ្នែក​ខាង​ឧតុនិយម​ លោក​ John​ Nielson ​Gammon ​ថ្លែង​ថា​ ស្ថានការ​ដែល​បណ្ដាល​ឲ្យ​មាន​គ្រោះ​ថ្នាក់​ដល់​តំបន់​ភាគ​ខាង​លិច​រដ្ឋ​តិចសាស ​ជា​ធម្មតា ​កើត​មាន​ឡើង​នៅ​ពេល​នេះ​ នៅ​លើ​តំបន់​ជា​ច្រើន​ដទៃ​ នៃ​រដ្ឋ​តិចសាស។

«ខែ​មីនា​ ជា​ខែរំាង​ស្ងួត​បំផុត​នៅ​ក្នុង​ប្រវត្ដិ​ របស់​រដ្ឋ​ ហើយ​ រដូវ​ផ្ការីក​ ជា​ពេល​ដែល​ខ្យល់​បក់​ខ្លាំង។ ទាំង​អស់​បូក​ចូល​គ្នា​ធ្វើ​ឲ្យ​មាន​គ្រោះ​ថ្នាក់​នៃ​ការ​ឆេះ​ភ្លើង​ព្រៃ​នៅ​ក្នុង​រដ្ឋ​តិចសាស ​ក្នុង​ឆ្នាំ​នេះ»។

គេ​ឃើញ​មាន​ភ្លើង​ព្រៃ​ចំនួន​ ៦៥០​លើក ក្នុង​ឆ្នាំ​នេះ​ នៅ​តំបន់​ភាគ​ខាង​លិច​រដ្ឋ​តិចសាស​លើ​ដី​ ដែល​មាន​ទំហំ ​១ ​លាន​ គីឡូម៉ែត្រ​ក្រឡា។

ក្រុម​អ្នក​ពន្លត់​ភ្លើង​បាន​ជោគ​ជ័យ​ក្នុង​ការ​ទប់​ស្កាត់​ភ្លើង​ព្រៃ​ ដែល​បាន​ឆេះ​ នៅ​ចុង​សប្ដាហ៍​នេះ​ ជិត​ស្រុក​ Midland ​រដ្ឋ​តិចសាស ​ក្រោយ​ពី​ភ្លើង​ព្រៃ​ បាន​បំផ្លាញ​ផ្ទះ​៣០​ខ្នង​ ហើយ​ឆេះ​ នៅ​លើ​ដី​កសិដ្ឋាន ៦​ពាន់ហិចតារ ។ ​គុណភាព​ខ្យល់​ ដក​ដង្ហើម​ នៅ​តាម​បណ្ដោយ​ព្រំដែន​ ស.រ.អ​. ម៉ិចស៊ីកូ​ បាន​ត្រូវ​ប៉ះពាល់​ពី​ផ្សែង​ចេញ​ពី​ភ្លើង​ព្រៃ​ដ៏​ធំ​នៅ​តំបន់ខាង​ជើង​នៃ​ស្រុក​ កៅ វី លា​ ​នៃ​ប្រទេស​ម៉ិចស៊ីកូ ។ ពេល​ដែល​ខ្យល់​បក់​ខ្លាំង​មក​លើ​រដ្ឋ​តិចសាស​ ការិយាល័យ​ពន្លត់​ភ្លើង​តិចសាស ​និង​ ក្រុម​ចាត់ចែង ​តាម​ពិនិត្យ​មើល​ដឹតដល់​ តំបន់​ដែល​មានរុក្ខជាតិ​ស្ងួត​ ងាយ​ស្រួល​ឆេះ។

អាកាសធាតុ​វិទូ លោក ​Nielson​ Gammon​ និយាយ​ថា ​ភាព​រីង​ស្ងួត​ ក៏​ធ្វើ​ឲ្យ​ប៉ះពាល់​ដល់​តំបន់​កសិកម្ម​សំខាន់ៗ​របស់​រដ្ឋ​តិចសាស​ខ្លះ។

លោក​ Nielson ​Gammon ​ថ្លែង​ថា ​ដំណាំ​ស្រូវ​សាឡី​ នៅ​ក្នុង​រដ្ឋ​តិចសាស​ បាន​ត្រូវ​បំផ្លាញ​ដោយ​ការ​រីង​ស្ងួត​ បណ្ដាល​ឲ្យ​អាហារ​ឡើង​ថ្លៃ។​លោក​កត់​សំគាល់​ថា​ ភ្លៀង​ធ្លាក់​ជា​មធ្យម​ក្នុង​រយៈ​ពេល ​៥ ​ខែ ​កន្លង​ទៅ​នេះ​ នៅ​ក្នុង​រដ្ឋ​តិចសាស​មាន ​ប្រមាណ​ ១២ ​សង់ទីម៉ែត្រ​បុណ្ណោះ ​ជា​កម្រិត​ទាប​បំផុត​ ចាប់​តាំង​ពី​ឆ្នាំ​១៩៦៧ ​មក។ ​រដ្ឋ​តិចសាស​ជា​រដ្ឋ​ផលិត​សត្វ​គោ ​ដ៏ ​ធំ​ជាង​គេ​បង្អស់ ​នៅ​ក្នុង ​ស.រ.អ.​ ហើយ​ជាប់​លំដាប់​ថ្នាក់​ទី​ពីរ​ជា​រដ្ឋដាំ​ដើម​ស្រូវ​។

ស្ថានភាព​រីង​ស្ងួត​ ក៏​បាន​បណ្ដាល​ឲ្យ​មាន​បញ្ហា​ដល់​តំបន់​ដីរាប​ នៃ​ ភាគ​ ខាង​ត្បូង​ ស.រ.អ. រាប់​ទាំង​ រដ្ឋ New Mexico Colorado Okhlahoma ​និង​រដ្ឋ​នៃ​តំបន់​ពាក់​កណ្ដាល​ខាង​លិច Kansas ដែរ។

ប្រែ​សម្រួល​ដោយ ​អ៊ូ ​ធួក

XS
SM
MD
LG