ពលរដ្ឋខ្មែរចំនួន៥៥នាក់ ក្នុងនោះមានស្ត្រីខ្មែរពីរនាក់ដែលបានរៀបការដោយខុសច្បាប់ជាមួយបុរសជនជាតិចិន ត្រូវបានជួយសង្គ្រោះ កាលពីពេលថ្មីៗនេះ និងធ្វើមាតុភូមិនិវត្តន៍មកកម្ពុជាវិញ។ នេះបើយោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ និងអ្នកនាំពាក្យរបស់ក្រសួងនេះ។
សេចក្តីប្រកាសរបស់ក្រសួងចុះថ្ងៃទី១៧ ខែកញ្ញានេះ បានបញ្ជាក់ឲ្យដឹងថា ពលរដ្ឋទាំងនោះ ត្រូវបានជួយសង្គ្រោះដោយស្ថានតំណាងក្នុងប្រទេសបីផ្សេងគ្នា រួមមានប្រទេសម៉ាឡេស៊ី ដែលមានពលករ និងពលការិនីខ្មែរចំនួន២២នាក់ ប្រទេសវៀតណាមដែលមានពលរដ្ឋខ្មែរចំនួន៣១នាក់ ក្នុងនោះមានកុមារ២៣នាក់ និងប្រទេសចិនជាទីដែលស្ត្រីខ្មែរពីរនាក់មកពីខេត្តកំពង់ចាម និងត្បូងឃ្មុំ«ត្រូវបានមេខ្យល់បោកបញ្ឆោតនាំទៅរៀបការដោយខុសច្បាប់ជាមួយបុរសជនជាតិចិននៅក្នុងប្រទេសចិន។ ស្ត្រីទាំងពីរនាក់ បានត្រឡប់មកដល់កម្ពុជានៅរសៀលថ្ងៃទី១៦ ខែកញ្ញា ឆ្នាំ២០១៨»។
ពលករ និងពលការិនីខ្មែរចំនួន២២នាក់ ដែលបានធ្វើការដោយខុសច្បាប់នៅប្រទេសម៉ាឡេស៊ី បានមកដល់កម្ពុជា កាលពីថ្ងៃទី២ ខែកញ្ញា ឆ្នាំ២០១៨ និងពលរដ្ឋចំនួន៣១នាក់ ដែលបានចូលទៅស្នាក់នៅ និងប្រកបរបរលក់ឆ្នោតដោយខុសច្បាប់នៅក្នុងប្រទេសវៀតណាម បានមកដល់កម្ពុជាកាលពីថ្ងៃទី១៤ ខែកញ្ញា ឆ្នាំ២០១៨។
លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ប្រាប់ VOA នៅថ្ងៃច័ន្ទនេះថា ស្ថានតំណាងនៅក្រៅប្រទេស បានសហការជាមួយអាជ្ញាធររបស់ប្រទេសនីមួយៗ ក្នុងការជួយដល់ពលរដ្ឋទាំងនោះ។ លោកមានប្រសាសន៍ថា រដ្ឋាភិបាលកម្ពុជា បានខិតខំបញ្ជ្រាបការយល់ដឹងអំពីបញ្ហាប្រឈមនានា សម្រាប់ការចាកចេញពីប្រទេសដើម្បីរកការងារធ្វើដោយខុសច្បាប់ តាំងពីថ្នាក់ភូមិឃុំ តែពលរដ្ឋនៅតែបន្តចាកចេញដដែល។
«គ្រប់ស្ថាប័នពាក់ព័ន្ធទាំងអស់ហ្នឹងគឺ បង្កើនការយកចិត្តទុកដាក់ណាស់ផ្សព្វផ្សាយទាំងក្នុងផ្នែកតាមប្រព័ន្ធ តាមទូរទស្សន៍ក្តី មើលព័ត៌មានជាកាសែតរាល់ថ្ងៃក្តី តាមមូលដ្ឋានយើងនៅក្នុងថា្នក់ខេត្តស្រុកឃុំ ដល់ភូមិ គឺពួកគាត់បាទពន្យល់ មានកម្មវិធីជាមួយពលរដ្ឋហ្នឹង យើងញឹកញាប់ណាស់ ធ្វើម៉េច កុំឲ្យជឿតាមពាក្យអូសទាញរបស់គេ ប៉ុន្តែ ជាធម្មតា ពេលខ្លះ អ្នកខ្លះគាត់ចង់សាកល្បង»។
អ្នកនាំពាក្យរូបនេះ មិនមានព័ត៌មានលម្អិត ទាក់ទិនស្ថានភាពផ្លូវចិត្ត និងសង្គមរបស់ពលរដ្ឋដែលត្រូវបានជួយសង្គ្រោះទាំង៥៥នាក់នោះទេ។
លោក ឌី ថេហូយ៉ា មន្ត្រីកម្មវិធីនៃអង្គការការពារសិទ្ធិពលករសង់ត្រាល់ មានប្រសាសន៍ថា បញ្ហាខ្វះការងារធ្វើក្នុងស្រុក និងផលវិបាកខាងហិរញ្ញវត្ថុរបស់ពលរដ្ឋបានជំរុញឲ្យពួកធ្វើចំណាកស្រុកទាំងបង្ខំចិត្ត។
«កត្តាទីមួយ គាត់មិនមានឱកាសបានទទួលការងារធ្វើ នៅស្រុកខ្មែរ កត្តាទីពីរ គឺជាកត្តាមួយដែលគាត់ខ្វះខាតជីវភាព គាត់ត្រូវជំពាក់បំណុលទេ យើងឃើញគាត់ជំពាក់បំណុល money lender [អ្នកឲ្យប្រាក់គេខ្ចី] អ្នកឲ្យខ្ចីបុលតាមភូមិផង អ្នកខ្លះក៏ជំពាក់ Microfinance [មីក្រូហិរញ្ញវត្ថុ] bank ធនាគារអីជាដើម។ អ៊ីចឹងកត្តាទាំងអស់នេះដែលខ្ញុំបានជម្រាបជូនហ្នឹង គឺជាកត្តាមួយដែលជំរុញ ឲ្យគាត់ត្រូវតែចំណាកស្រុក ហើយការចំណាកស្រុកនេះ ហើយការចំណាកស្រុកនេះ យើងមើលឃើញថា មិនមែនចំណាកស្រុកដោយ ជាជម្រើសទេ។ ពាក្យថា ចំណាកស្រុក ដែលជាជម្រើសមានន័យថាម៉េច យើងមានជម្រើសនៅនេះហើយ ប៉ុន្តែជម្រើសវាល្អ យើងទៅរកហ្នុង ក៏ប៉ុន្តែនេះ គេហៅថា ចំណាកស្រុកគឺបង្ខំចិត្ត»។
អ្នកការពារសិទ្ធិពលកររូបនេះបន្ថែម ថា កម្ពុជាមានយន្តការនានាដើម្បីការពារសិទ្ធិពលករនៅក្រៅប្រទេស តែពលរដ្ឋនៅតែប្រឈមនឹងការជួញដូរ និងកេងប្រវ័ញ្ច ដោយសារការអនុវត្តយន្តការទាំងនោះ មិនមានប្រសិទ្ធភាពនៅឡើយ។ លោកបានបន្តថា ស្ថានតំណាងកម្ពុជានៅប្រទេសនានា ក៏ប្រឈមនឹងកង្វះលទ្ធភាពក្នុងការឆ្លើយតបទៅនឹងការកេងប្រវ័ញ្ច និងការបោកបញ្ឆោតទាំងនោះ។
«សមត្ថភាព លទ្ធភាពរបស់អង្គទូតរបស់យើងហ្នឹង គឺលោកមានដែនកំណត់ មានន័យថាម៉េច ដូចជានៅស្រុកថៃ យើងមានទូតនៅបាងកកអ៊ីចឹង វាអាចមានស្ថានកុងស៊ុល មួយ ពីរ អីចឹង។ ក៏ប៉ុន្តែវាអត់អាចឆ្លើយតបនឹងចំនួន និងបញ្ហាហ្នឹងបានទេ នៅម៉ាឡេក្តី ចំនួននៃពលរដ្ឋរបស់យើង ទាំងគាត់ទៅ កាលមិនទាន់មានឯកសារ ទាំងអ្នកមានឯកសារអីហ្នឹងវាចូលបួនដប់ម៉ឺននាក់ជាង ហើយចឹងបុគ្គលិកទូតត្រឹមតែប៉ុន្មាននាក់ អ៊ីចឹងវាអត់អាចឆ្លើយតបនូវតម្រូវការនូវបញ្ហាដែលកើតឡើងបានទេ»។
ទាក់ទិនបញ្ហារបស់ពលរដ្ឋខ្មែរដែលជាស្ត្រីចេញទៅធ្វើការនៅប្រទេសម៉ាឡេស៊ី បច្ចុប្បន្ននេះមានស្ត្រីកម្ពុជាចំនួនប្រមាណ៨.០០០នាក់ កំពុងធ្វើការនៅប្រទេសម៉ាឡេស៊ី ដោយស្របច្បាប់។ ហើយកាលពីខែមិថុនា ឆ្នាំ ២០១៨ ប្រទេសកម្ពុជាបានបញ្ជូនពលការិនីទៅធ្វើការជាស្ត្រីបម្រើតាមផ្ទះនៅប្រទេសម៉ាឡេស៊ីឡើងវិញ បន្ទាប់ពីបានបិទអស់រយៈពេល៦ឆ្នាំ ប៉ុន្តែអ្នកជំនាញខាងសិទ្ធិពលករសម្តែងការព្រួយបារម្ភដោយសារតែរដ្ឋាភិបាលកម្ពុជានៅមិនទាន់ដាក់យន្តការត្រឹមត្រូវដើម្បីការពារពលការិនីទាំងនោះនៅឡើយទេ។
ក្រៅពីការងារបម្រើតាមផ្ទះនេះ ការងារដែលពលករខ្មែរទៅធ្វើនៅប្រទេសម៉ាឡេស៊ី គឺជាប្រភេទការងារដែលគ្មានជំនាញ ដូច្នេះពួកគេទទួលបានប្រាក់ខែតិចតួចបើប្រៀបធៀបនឹងពលករដែលមកពីប្រទេសដទៃ។ នេះបើតាមការបញ្ជាក់របស់អ្នកដែលឃ្លាំមើលបញ្ហាចំណាកស្រុកទៅធ្វើការនៅក្រៅប្រទេសកាលពីពេលកន្លងមក៕
