ជនជាតិអាមេរិកាំងចំនួន៥៩នាក់នៃភ្នាក់ងារអ្នកស្ម័គ្រចិត្តភីសខរស៍ (Peace Corps) បានស្បថចូលកាន់ការងារជាអ្នកស្ម័គ្រចិត្តកាលពីថ្ងៃច័ន្ទ ដែលធ្វើឲ្យចំនួនអ្នកស្ម័គ្រចិត្តរបស់ភ្នាក់ងារនេះកើនដល់១០៦នាក់ នៅកម្ពុជា។ អ្នកស្ម័គ្រចិត្តកំពុងរស់នៅជាមួយប្រជាពលរដ្ឋកម្ពុជាដោយផ្ទាល់ក្នុងខេត្តចំនួន១៥។
លោក ចេហ្វ ដេហ្គល (Jeff Daigle) ភារៈធារីអមស្ថានទូតអាមេរិកប្រចាំកម្ពុជា មានប្រសាសន៍ក្នុងពិធីស្បថក្នុងទីក្រុងភ្នំពេញថា បេសកកម្មរបស់អ្នកស្ម័គ្រចិត្តទាំងនេះ បាននាំឲ្យមានការផ្លាស់ប្ដូរវប្បធម៌យ៉ាងសំខាន់សម្រាប់ប្រទេសទាំងពីរ កម្ពុជា សហរដ្ឋអាមេរិក។
«អ្នកស្ម័គ្រចិត្តភីសខរស៍រស់នៅជាមួយគ្រួសារខ្មែរ ទទួលបាននូវការយល់ដឹងយ៉ាងជ្រាលជ្រៅអំពីវប្បធម៌របស់កម្ពុជា យល់ដឹងពីភាសារបស់ប្រទេសនេះ និងយល់ដឹងពីប្រជាពលរដ្ឋនៃប្រទេសនេះ។ នៅពេលដែលអ្នកស្ម័គ្រចិត្តត្រឡប់ទៅសហរដ្ឋអាមេរិកវិញ ពួកគេនឹងមានអ្វីៗជាច្រើនសម្រាប់ចែករំលែកដល់ជនជាតិអាមេរិកអំពីប្រទេសកម្ពុជា។ តាមរយៈនេះប្រទេសយើងទាំងពីរទទួលបានផលប្រយោជន៍អំពីកម្មវិធីរបស់ ភីសខរស៍។
ទីភ្នាក់ងារភីសខរស៍ត្រូវបង្កើតឡើងដោយអតីតប្រធានាធិបតីសហរដ្ឋអាមេរិក លោក ចន ខេណិឌី (John F. Kennedy)។ នៅឆ្នាំ១៩៦១ ដើម្បីលើកកម្ពស់មិត្តភាព និងសន្ដិភាពជាមួយបណ្ដាប្រទេសនានាក្នុងពិភពលោក គោលបំណងនៃទីភ្នាក់ងារនេះ គឺបណ្ដុះបណ្ដាល និងអប់រំបុរស និងស្ដ្រីនៅតាមបណ្ដាប្រទេសដែលចាប់អារម្មណ៍ និងដើម្បីលើកកម្ពស់ការយោគយល់គ្នា ជាពិសេសក្នុងប្រទេសកំពុងអភិវឌ្ឍន៍។ ចាប់តាំងពីពេលនោះមកមានជនជាតិអាមេរិកាំងនៃក្រុមភីសខរស៍ប្រហែលចំនួន ២សែននាក់បានចូលបម្រើជាអ្នកស្ម័គ្រចិត្តក្នុងប្រទេសចំនួន១៣៩ ដែលក្នុងនោះអ្នកស្ម័គ្រចិត្តចំនួន២២៧នាក់បានមកបំពេញការងារនៅកម្ពុជា ចាប់តាំងពីឆ្នាំ ២០០៧ មក។ នេះបើយោងតាមតួលេខរបស់ភ្នាក់ងារភីសខរស៍នៅកម្ពុជា។
អ្នកស្ម័គ្រចិត្តក្រុមទី៥ មានចំនួន៥៩នាក់ ដែលបានទទួលការបណ្ដុះបណ្ដាលរយៈពេលប្រាំបួនសប្ដាហ៍ក្នុងខេត្តតាកែវ ដោយចាប់ផ្ដើមរស់នៅជាមួយគ្រួសារនៃពលរដ្ឋកម្ពុជានៅទីនោះ។ ក្នុងពិធីស្បថចូលកាន់ការងារជាផ្លូវការ ពួកគេបានស្លៀកពាក់ជារបៀបខ្មែរ មានអាវប៉ាក់ និងសំពត់ហូល។ ក្រុមទី៥នេះនឹងមានបេសកម្មជួយបង្រៀនភាសាអង់គ្លេសដល់យុវជនកម្ពុជា និងចូលរួមសកម្មភាពអប់រំសុខភាព និងអនាម័យដល់សហគមខ្មែរនៅតាមទីជនបទសម្រាប់រយៈពេលពីរឆ្នាំ ក្នុងខេត្តចំនួន១៤ ក្នុងចំណោមខេត្ត១៥ ដែលកំពុងមានវត្តមានអ្នកស្ម័គ្រចិត្ត ក្នុងនោះមាន ខេត្តស្វាយរៀង ព្រៃវែង កំពង់ចាម កណ្ដាល តាកែវ កំពត ព្រះសីហនុ កោះកុង កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។ លើសពីនេះ អ្នកស្ម័គ្រចិត្តក្នុងក្រុមទី៥ នេះនឹងចូលរួមចំណែកក្នុងគម្រោងអប់រំផ្នែកបរិដ្ឋាន ការការពារអំពើហិង្សាក្នុងគ្រួសារ និងការអភិវឌ្ឍជំនួញខ្នាតតូចផងដែរ។
លោកស្រី ផេនី ហ្វៀលស៍ (Penny Fields) នាយិកាភ្នាក់ងារភីសខរស៍នៅកម្ពុជាមានប្រសាសន៍ថា ក្រុមអ្នកស្ម័គ្រចិត្តនឹងពាំនាំយកជាមួយពួកគេនូវអ្វីដែលគេបានរៀនសូត្រពីកម្ពុជា ហើយពួកគេនឹងយកកម្ពុជាជាប់នឹងខ្លួនគេជានិច្ច។
លោក សន ក្រុតធី (Sean Crotty) អ្នកស្ម័គ្រចិត្តម្នាក់ក្នុងក្រុមទី៥នេះ ទើបតែចេះភាសាខ្មែរបានខ្លះបន្ទាប់ពីទទួលវគ្គបណ្ដុះបណ្ដាលរយៈពេលជាងពីរខែកន្លងមក។ លោកនិយាយភាសាខ្មែរតាមសំនៀងអង់គ្លេសថា៖
«ខ្ញុំញ៉ាំបាយប្រាំបួនចានក្នុងមួយថ្ងៃ។ ខ្ញុំជាអ្នកចូលចិត្តម្ហូបខ្មែរជាងគេ។ ខ្ញុំពិតជាមានអារម្មណ៍សប្បាយរីករាយដែលខ្ញុំមានឱកាសមកធ្វើការនៅក្នុងប្រទេសមួយ ដែលជាប្រទេសមួយដ៏ល្អដូចជាប្រទេសកម្ពុជា»។
លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល ដែលធ្វើជាធិបតីក្នុងពិធីស្បថរបស់ក្រុមភីសខរស៍មានប្រសាសន៍ថា ក្រុមអ្នកស្ម័គ្រចិត្តអាមេរិកបាន និងកំពុងរួមចំណែកក្នុងការអភិវឌ្ឍកម្ពុជា។
«កម្មវិធីរបស់ភ្នាក់ងារភីសខរស៍ កំពុងរួមចំណែកយ៉ាងសំខាន់ក្នុងការអនុវត្តន៍ផែនការយុទ្ធសាស្ដ្រជាតិរបស់រាជរដ្ឋាភិបាលកម្ពុជា។ ការរស់នៅនិងការធ្វើការងារជាមួយពលរដ្ឋកម្ពុជាក្នុងសហគមធ្វើឲ្យពួកគេបង្កើនការយល់ដឹងផ្នែកវប្បធម៌ និងជំនាញនិយាយភាសាខ្មែរបានច្រើន»។
ជាមួយគ្នានេះលោក ម៉ម ប៊ុនហេង ក៏បានរំលឹកដល់ក្រុមអ្នកស្ម័គ្រចិត្តអាមេរិកឲ្យប្រុងប្រយ័ត្នចំពោះជំងឺរាករូស និងជំងឺគ្រុនចាញ់នៅកម្ពុជា៕
