នាយកទីភ្នាក់ងារស៊ើបការណ៍សហព័ន្ធ FBIអាមេរិក លោក Christopher Wrayបានការពារទីភ្នាក់ងាររបស់លោក ប្រឆាំងនឹងការចោទប្រកាន់របស់ពួកគណបក្សសាធារណរដ្ឋ ពីការលម្អៀងខាងនយោបាយនៅសប្តាហ៍នេះ ដោយបានច្រានចោលនូវការអះអាងនៅឯសវនាការសាធារណៈមួយថា លោកបានការពារក្រុមគ្រួសាររបស់លោកប្រធានាធិបតីអាមេរិក Joe Biden ខាងគណបក្សប្រជាធិបតេយ្យ ក្នុងការស៊ើបអង្កេតអតីតប្រធានាធិបតីអាមេរិក លោក Donald Trumpខាងគណបក្សសាធារណរដ្ឋ និងពួកអភិរក្សនិយមផ្សេងៗទៀត។
«វាគ្មានទាល់តែសោះឡើយ»។ លោក Wray បានស៊កសំដីក្នុងអំឡុងពេលនៃការជជែកដេញដោលសវនាការមួយ របស់គណៈកម្មាធិការតុលាការនៃរដ្ឋសភាអាមេរិកកាលពីថ្ងៃពុធ នៅពេលដែលត្រូវបានសួរនាំដោយលោក Matt Gaetz ជាសមាជិកម្នាក់របស់គណបក្សសាធារណរដ្ឋ និងជាអ្នកគាំទ្រលោក Trump ផ្កាប់មុខថាតើលោកបាន«ការពារ»លោក Biden ដែរឬទេនោះ។
លោក Wray បាននិយាយថា«FBI មិនបានការពារ មិនមានផលប្រយោជន៍ក្នុងការការ ពារជនណាម្នាក់ខាងផ្នែកនយោបាយទេ»។ សវនាការនេះបានកត់សម្គាល់នូវការ បង្ហាញខ្លួនលើកទី១របស់លោក Wray នៅចំពោះមុខគណៈកម្មការមើលការខុសត្រូវចាប់តាំងពីពួកគណបក្សសាធារណរដ្ឋ បានកាន់កាប់ឡើងវិញនូវរដ្ឋសភា បន្ទាប់ពីការបោះឆ្នោតពាក់កណ្តាលអាណត្តិកាលឆ្នាំ២០២២មក។
លោក Wray ដែលត្រូវបានតែងតាំងឱ្យធ្វើជានាយកទីភ្នាក់ងារ FBI ដោយលោក Trumpហើយត្រូវបានលោក Biden រក្សាទុកឱ្យកាន់តំណែងនេះដដែល បានក្លាយជាការរិះគន់របស់ពួកគណបក្សសាធារណរដ្ឋគ្រប់ទិសទីថា រដ្ឋបាលរបស់លោក Bidenបានប្រើប្រាស់ទីភ្នាក់ងារ FBI និងក្រសួងយុត្តិធម៌អាមេរិក ប្រឆាំងនឹងគូសត្រូវនយោបាយរបស់ខ្លួន។
ការរិះគន់បានរីកកាន់តែធំឡើងៗក្នុងរយៈពេល១ឆ្នាំកន្លងមកនេះ ជាពិសេសបន្ទាប់ពី FBI បានធ្វើការឆែកឆេរគេហដ្ឋានរបស់លោក Trump នៅក្នុងរដ្ឋ Florida កាលពីចុងខែសីហាឆ្នាំទៅ ដែលជាផ្នែកមួយនៃការស៊ើបអង្កេត ក្នុងការរក្សាទុកឯកសារសម្ងាត់មិនបានត្រឹមត្រូវ របស់អតីតប្រធានាធិបតីអាមេរិកលោក Donald Trump បន្ទាប់ពីលោកបានចាកចេញពីសេតវិមានកាលពីឆ្នាំ២០២១។
លោក Wray ដែលជាអ្នកសាធារណរដ្ឋដ៏យូរអង្វែង ត្រូវបានគេសើចចំអកថាលោកបានបង្កភាពប្រទូសប្ររ៉ាយជាមួយពួកអភិរក្សនិយម។
លោក Wrayបាននិយាយថា«គំនិតដែលថា ខ្ញុំមានការលម្អៀងប្រឆាំងនឹងពួកអភិរក្សនិយមនោះ ហាក់ដូចជាការឆ្កួតលីលារចំពោះខ្ញុំ ហើយសូមពិនិត្យមើលប្រវត្តិរបស់ខ្ញុំផង»៕
