មេធាវីការពារក្តីឱ្យលោក ម៉ិច ដារ៉ា ដែលជាអ្នកសារព័ត៌មានកំពុងជាប់ឃុំពីបទញុះញង់ នឹងដាក់លិខិតទៅតុលាការស្នើឱ្យអ្នកសារព័ត៌មានរូបនេះស្ថិតនៅក្រៅឃុំ ដោយសារបារម្ភពីបញ្ហាសុខភាព និងត្រូវមើលថែម្តាយចាស់ជរា។
លោក ម៉ិច ដារ៉ា ជាអ្នកសារព័ត៌មានស៊ើបអង្កេតដែលតែងរាយការណ៍ពាក់ព័ន្ធនឹងការឆបោកតាមប្រព័ន្ធអនឡាញ និងការជួញដូរមនុស្សនៅកម្ពុជា។ លោកត្រូវបានចាប់ខ្លួន និងចោទប្រកាន់កាលពីថ្ងៃទី៣០ ខែកញ្ញា ឆ្នាំ២០២៤ពីបទញុះញង់ ជុំវិញការបង្ហោះព័ត៌មាន និងសារលើបណ្តាញសង្គម ដែលអាចប្រឈមនឹងការជាប់ពន្ធនាគាររយៈពេល២ឆ្នាំ។
លោក ឌុច ពិសិដ្ឋ មេធាវីដែលការពារក្តីឱ្យលោក ម៉ិច ដារ៉ា ប្រាប់វីអូអេនៅថ្ងៃចន្ទថា ក្រុមមេធាវីបារម្ភពីសុខភាពរបស់លោក ដារ៉ា ដោយសារលោកមានជំងឺហឺត និងជំងឺតានតឹងផ្លូវចិត្តខ្លាំង។ លោកថា មេធាវីនឹងដាក់សំណើទៅតុលាការ ស្នើឱ្យលោក ម៉ិច ដារ៉ា ស្ថិតនៅក្រៅឃុំ ដើម្បីថែរក្សាសុខភាព និងដើម្បីអាចមើលថែម្តាយចាស់ជរានៅផ្ទះ។
លោកនិយាយថា៖ «យើងនឹងបំពេញតួនាទីតាមផ្លូវច្បាប់ ដើម្បីការពារសិទ្ធិ និងផលប្រយោជន៍ឱ្យកូនក្តីរបស់យើងខ្ញុំ គឺលោកដារ៉ា។ អ៊ីចឹងយើងនឹងដាក់ពាក្យដើម្បីសុំនៅក្រៅឃុំ ដើម្បីបញ្ជាក់ថា គាត់នឹងនៅតែបន្តសហការក្នុងការស៊ើបអង្កេតរឿងហ្នឹង ហើយគាត់មិនរត់ទៅណាទេ ហើយគាត់នឹងព្យាយាមធ្វើតាមអ្វីដែលតុលាការប្រាប់ បើសិនគាត់អាចនៅក្រៅឃុំបាន។ តែពាក់ព័ន្ធនឹងលទ្ធភាពថា អាចបានកម្រិតណា គឺខ្ញុំមិនអាចសន្និដ្ឋានបានទេ គឺទុកឱ្យចៅក្រមស៊ើបសម្រេចផ្អែកទៅលើមូលហេតុ និងអង្គច្បាប់ដែលយើងនឹងដាក់ជូនគាត់ពិចារណា»។
បើតាមលោក ឌុច ពិសិដ្ឋ យោងតាមផ្លូវច្បាប់ ក្រោយការដាក់ពាក្យស្នើសុំនៅក្រៅឃុំ តុលាការនឹងឆ្លើយតបក្នុងរយៈពេល៥ថ្ងៃ។
លោក ម៉ិច ដារ៉ា កំពុងជាប់ឃុំក្នុងពន្ធនាគារខេត្តកណ្តាល ដែលរហូតមកដល់ថ្ងៃចន្ទ ទី១៤ខែតុលានេះមានរយៈពេល១៥ថ្ងៃមកហើយ។
កញ្ញា ម៉ិច សេរីរ័ត្ន ប្អូនស្រីរបស់លោក ម៉ិច ដារ៉ា ដែលតែងសួរសុខទុក្ខលោកក្នុងពន្ធនាគារជាប្រចាំ ប្រាប់វីអូអេដែរថា សុខភាពរបស់លោក ម៉ិច ដារ៉ា មិនល្អពីមួយថ្ងៃទៅមួយថ្ងៃ ដោយសារលោកសម្រាន្តមិនលក់ ក្អក ឈឺក និងហៀរសំបោរ ហើយអ្នកជាប់ឃុំក្នុងបន្ទប់ជាមួយលោក ម៉ិច ដារ៉ា តែងជក់បារី។ កញ្ញាថា ក្រុមគ្រួសារដែលមានម្តាយចាស់ជរា ក៏ត្រូវប្រឈមនឹងបញ្ហាជីវភាពដោយសារបាត់បង់សមាជិកជាបង្គោលគ្រួសារម្នាក់។
កញ្ញានិយាយថា៖ «គាត់ប្រាប់ថា គាត់ស្រកគីឡូ៦-៧គីឡូ តែរយៈពេល១១-១២ថ្ងៃ ហើយគាត់ហូបអត់សូវបានទេ។ នៅហ្នឹងគឺមានរបបអាហារតែថ្ងៃ និងល្ងាច។ ហើយទឹកនៅហ្នឹង [ពន្ធនាគារ] គឺអត់ល្អទៀត ហូបទឹក គឺទឹកពីក្បាលរ៉ូប៊ីណេ។ អ៊ីចឹងទៅទាំងការហូប ទាំងការអនាម័យ ក៏ដូចជាការរស់នៅហ្នឹង គេជក់បារី វាធុំក្លិនបារីខ្លាំង»។
កញ្ញាអំពាវនាវឱ្យតុលាការអនុញ្ញាតឱ្យបងប្រុសរបស់កញ្ញាបានស្ថិតនៅក្រៅឃុំ ដើម្បីការពារសុខភាពដែលអាចនឹងកាន់តែធ្ងន់ធ្ងរ។
ពាក់ព័ន្ធនឹងគម្រោងនៃការស្នើឱ្យលោក ម៉ិច ដារ៉ា ស្ថិតនៅក្រៅឃុំ លោក ជិន ម៉ាលីន អ្នកនាំពាក្យក្រសួងយុត្តិធម៌លើកឡើងថា ជនជាប់ចោទមានសិទ្ធិស្នើសុំនៅក្រៅឃុំគ្រប់ដំណាក់កាលទាំងអស់ ប៉ុន្តែលោកថា ការសម្រេចបែបណាគឺស្ថិតលើឆន្ទានុសិទ្ធិរបស់តុលាការ។
លោក អំ សំអាត នាយកទទួលបន្ទុកផ្នែកចាត់ការទូទៅនៃអង្គការការពារសិទ្ធិមនុស្សលីកាដូ លើកឡើងថា លោក ម៉ិច ដារ៉ា គួរតែត្រូវបានអនុញ្ញាតឱ្យស្ថិតនៅក្រៅឃុំដោយសារលោកមានបញ្ហាសុខភាពតាំងពីមុនពេលត្រូវបានចាប់ខ្លួន។ លោកបន្ថែមថា ការឃុំខ្លួនលោក ម៉ិច ដារ៉ា ក៏កំពុងធ្វើឱ្យរដ្ឋាភិបាលកម្ពុជារងការរិះគន់យ៉ាងខ្លាំងពីមជ្ឈដ្ឋានអន្តរជាតិថា កំពុងធ្វើឱ្យប៉ះពាល់ដល់សេរីភាពសារព័ត៌មាន និងគំរាមកំហែងដល់អ្នកសារព័ត៌មានឯករាជ្យ និងវិជ្ជាជីវៈផ្សេងទៀត។
លោកបញ្ជាក់ថា៖ «ការចាប់ឃុំខ្លួននេះ គេមើលទៅ គេអាចលើកឡើងថា វាជាការសងសឹកចំពោះលោក ម៉ិច ដារ៉ា ដែលលោកបានធ្វើព័ត៌មានក្នុងសង្គមហើយជាព័ត៌មានរសើបៗកន្លងមកនោះ។ អ៊ីចឹងការអនុញ្ញាតឱ្យលោក ម៉ិច ដារ៉ា នៅក្រៅឃុំបណ្តោះអាសន្ន វាជារឿងមួយជម្រើសល្អដែរ សម្រាប់ការគេចផុតពីការរិះគន់ផ្សេងៗពីសហគមន៍អន្តរជាតិ។ ណាមួយការបន្តឃុំខ្លួនលោក ម៉ិច ដារ៉ា ហាក់ដូចជាមិនមានផលចំណេញអីសម្រាប់កម្ពុជាយើងផងដែរ»។
ក្រោយការចាប់ខ្លួនលោក ម៉ិច ដារ៉ា គេឃើញបណ្តាស្ថានទូតប្រទេសប្រជាធិបតេយ្យធំៗនៅកម្ពុជាដូចជាសហរដ្ឋអាមេរិក អង់គ្លេស អូស្រ្តាលី និងសហភាពអឺរ៉ុបជាដើម បង្ហាញការបារម្ភលើការចាប់ខ្លួនលោក ម៉ិច ដារ៉ា និងអំពាវនាវឱ្យមានការដោះលែងលោក។
ចំណែកអង្គការ និងអ្នកសារព័ត៌មានជាតិ-អន្តរជាតិជាច្រើនបានលើកឡើងថា ការបង្ហោះសាររបស់លោក ម៉ិច ដារ៉ា បង្ហាញអំពីបញ្ហាដែលកំពុងកើតមាននៅកម្ពុជា មិនមែនជាសកម្មភាពដែលបង្កើតជាបទល្មើសឡើយ។ ពួកគេក៏បានអំពាវនាវជាបន្តបន្ទាប់ឱ្យមានការទម្លាក់ចោលបទចោទ និងដោះលែងលោក ម៉ិច ដារ៉ា ដោយឥតលក្ខខណ្ឌ៕
វេទិកាបញ្ចេញមតិ