សមាគមរោងចក្រកាត់ដេរនៅកម្ពុជា ដែលតំណាងឲ្យរោងចក្រនាំចេញសម្លៀកបំពាក់ទាំងអស់ក្នុងប្រទេសកម្ពុជា បានទាមទារឱ្យមានការសងសំណងសម្រាប់ការខាតបង់ទឹកប្រាក់ជាង១៥លានដុល្លារអាមេរិកដោយសារការធ្វើកូដកម្មនិងបាតុកម្មរបស់កម្មករកាលពីសប្តាហ៍មុន។ ប៉ុន្តែសហជីពបានបដិសេធការសងសំណងនេះ ដោយបញ្ជាក់ថា ការខាតបង់គឺជារឿងរបស់ក្រុមហ៊ុន។ កម្មករធ្វើកូដកម្មត្រឹមត្រូវតាមច្បាប់។
មន្ត្រីសមាគមកាត់ដេរនៅកម្ពុជាបាននិយាយនៅថ្ងៃពុធនេះថា ឧស្សាហកម្មសម្លៀកបំពាក់និងស្បែកជើងយ៉ាងតិច៣០រោងចក្របានខាតបង់ទឹកប្រាក់ជាង១៥លានដុល្លារអាមេរិក ដោយសារការធ្វើកូដកម្មរបស់កម្មករទាមទារដំឡើងប្រាក់ឈ្នូលកាលពីសប្តាហ៍មុន។
កម្មករច្រើនរាប់ម៉ឺននាក់ ដែលបានដឹកនាំដោយសហភាពការងារកម្ពុជានិងសម្ព័ន្ធសហព័ន្ធសហជីពការងារកម្ពុជា បានធ្វើកូដកម្ម និងបាតុកម្មកាលពីថ្ងៃទី១៣ដល់ថ្ងៃទី១៦ខែសីហា។
សមាគមរោងចក្រកាត់ដេរនៅកម្ពុជាបានបញ្ជាក់នៅក្នុងសេចក្តីថ្លែងការណ៍ថា រោងចក្រចំនួន៣០នៅក្នុងឧស្សាហកម្មសម្លៀកបំពាក់និងស្បែកជើងបានទទួលរងការខាតបង់ទឹកប្រាក់ជាង១៥លានដុល្លារអាមេរិកនៅក្នុងអំឡុងពេលកម្មករធ្វើកូដកម្ម និងបាតុកម្មរយៈពេលបួនថ្ងៃនោះ។
លោកខេន លូ អគ្គលេខាធិការសមាគមរោងចក្រកាត់ដេរនៅកម្ពុជា GMAC បានថ្លែងប្រាប់ VOA ថា រហូតមកដល់ពេលនេះ ការខាតបង់ទាំងនេះត្រូវបានប៉ាន់ស្មាន់ដោយផ្អែកទៅលើការខាតបង់ផ្នែកផលិតកម្ម ការខូចខាតទ្រព្យសម្បត្តិរបស់រោងចក្រ និងតម្លៃដោយសារធ្វើការចាត់ចែងទំនិញដាក់ផ្សេងៗគ្នាសម្រាប់ការផ្ញើគំរូទំនិញ ការដឹកទំនិញតាមយន្តហោះ ព្រមទាំងការចុះតម្លៃលក់ ដោយអ្នកទិញដោយសារការផ្ញើចេញទៅយឺត។
«យើងខាតបង់យ៉ាងតិច១៥លានដុល្លារអាមេរិក ហើយនេះគឺជាការខាតបង់ផ្នែកផលិតកម្ម តម្លៃដឹកជញ្ជូន ការខាតបង់ផ្នែកជំនឿទុកចិត្ត និងអ្នកទិញលុបចោលការបញ្ជាទិញ»។
សេចក្តីថ្លែងការណ៍នេះ បានបន្ថែមថា សមាគមរោងចក្រកាត់ដេរនៅកម្ពុជាដែលតំណាងរោងចក្រ នាំចេញសម្លៀកបំពាក់ទាំងអស់ក្នុងប្រទេសកម្ពុជា គាំទ្រសមាជិករបស់ខ្លួនក្នុងកិច្ចខិតខំប្រឹងប្រែង ស្វែងរកយុត្តិធម៌ និងសំណងសម្រាប់ការខូចខាត ហើយយើងនឹងបន្តការពារអត្ថប្រយោជន៍ និង អនាគតនៃឧស្សាហកម្មកាត់ដេរនៅក្នុងប្រទេសកម្ពុជា។
លោកអាត់ ធន់ ប្រធានសហភាពការងារកម្ពុជា បានថ្លែងថា ការខាតបង់១៥លានដុល្លារអាមេរិក គឺជារឿងរបស់ក្រុមហ៊ុន តែកម្មករធ្វើកូដកម្មត្រឹមត្រូវតាមច្បាប់។ កម្មករខាតបង់ការមិនបានប្រាក់ឈ្នួល ការខាតកម្លាំង និងការចំណាយផ្សេងៗ។
សមាជិកនៃសមាគមរោងចក្រកាត់ដេរនៅកម្ពុជា តំណាងសហជីព និងតំណាងរដ្ឋាភិបាលគ្រោងនឹងជួបពិភាក្សាគ្នាអំពីការទាមទារសុំដំឡើងប្រាក់ឈ្នួលរបស់កម្មករនៅសប្តាហ៍ក្រោយ។
លោកខេន លូ អគ្គលេខាធិការ GMAC បានបញ្ជាក់ថា ខ្លួននឹងមិនរៀបចំប្រធានបទសម្រាប់ការចរចាជាមួយតំណាងកម្មករនៅសប្តាហ៍ក្រោយនោះទេ។
«យើងនឹងទៅចូលរួមប្រជុំនៅសប្តាហ៍ក្រោយ និងស្តាប់ការទាមទារ និងសំណើរបស់សម្ព័ន្ធសហព័ន្ធសហជីពការងារជាតិកម្ពុជា។ យើងត្រូវការដឹងអំពីអ្វីដែលសហជីពចង់លើកឡើងសម្រាប់សមាជិក របស់ពួកគេ។ យើងនឹងចាត់វិធានការជំហានបន្ទាប់»។
កាលពីខែមិថុនា ក្រុមប្រឹក្សាការងារបានសម្រេចបង្កើនប្រាក់ឈ្នួលកម្មករពី៥០ដុល្លារអាមេរិកដល់ ៦១ដុល្លារអាមេរិកក្នុងមួយខែ រួមទាំងប្រាក់ទ្រទ្រង់សុខភាពប្រាំមួយដុល្លារអាមេរិកផង។
លោកអាត់ ធន ប្រធានសហភាពការងារកម្ពុជា បានបញ្ជាក់ថា សហជីពនឹងស្នើសុំឱ្យក្រុមហ៊ុនផ្តល់ប្រាក់២.៥០០រៀលសម្រាប់អាហារថ្ងៃត្រង់ក្នុងមួយថ្ងៃ ប្រាក់បន្ថែម១.៥០០រៀលលើប្រាក់បច្ចុប្បន្ន ១.០០០រៀលសម្រាប់ការថែមម៉ោង ប្រាក់អតីតភាពការងារ៣ដុល្លារអាមេរិកក្នុងមួយឆ្នាំ ប្រាក់រង្វាន់ ១០ដុល្លារអាមេរិកសម្រាប់កម្មករធ្វើការទៀងទាត់ក្នុងមួយខែ ប្រាក់១០ដុល្លារអាមេរិកសម្រាប់ថ្លៃធ្វើ ដំណើរ និងជួលផ្ទះប្រចាំខែ និងប្រាក់១០ដុល្លារអាមេរិកសម្រាប់ទ្រទ្រង់សុខភាពប្រចាំខែ៕