ភ្ជាប់​ទៅ​គេហទំព័រ​ទាក់ទង

អ្នក​ជំនាញថា​ចលាចល​នៅ​មជ្ឈឹម​បូព៌ា​បញ្ជាក់​ពី​ភាព​ចាំបាច់​នៃ​កំណែ​ទម្រង់​ខាង​នយោបាយ​នៅ​អាហ្វហ្កានីស្ថាន


កុមារអាហ្វហ្កានីស្ថាន​មក​ពី​ភូមិ​ក្រីក្រ​មួយ​កាន់​នំ​ប៉័ង​ទៅ​ផ្ទះ​ពេល​មាន​ភ្លៀង​នៅ​ទីក្រុង​កាប៊ុល​ប្រទេស​អាហ្វហ្កានីស្ថាន​​​នៅ​ថ្ងៃ​ទី​​២៣​ខែកុម្ភ:ឆ្នាំ​២០១១។​

ពួក​អ្នក​ជំនាញ​និយាយ​ថា ​ចលាចល​ដែល​បន្ត​មាន​ឡើង​ក្នុង​តំបន់​អាហ្វ្រិក​ខាង​ជើង​និង​ភូមិភាគ​មជ្ឈឹម​បូព៌ា​គូស​បញ្ជាក់​ពី​ភាព​ចាំបាច់​ក្នុង​ការ​ធ្វើ​កំណែ​ទម្រង់​ខាង​នយោបាយ​នៅ​ក្នុង​ប្រទេស​នានា​ដូចជា​ប្រទេស​អាហ្វហ្កានីស្ថាន​ដែល​ជា​ទី​កន្លែង​កងទ័ព​បរទេស​មាន​កំណត់​ពេល​ដកចេញ​នៅ​ឆ្នាំ​២០១៤។ ពួកគេ​និយាយ​ថា​ ព្រម​ពេល​ជាមួយ​នឹង​ការ​ផ្ទេរ​កិច្ចការ​សន្តិសុខ​ទៅ​ឲ្យ​កងទ័ព​អាហ្វហ្កានីស្ថាន​ហើយ​និង​ធ្វើ​ឲ្យ​ប្រសើរ​ដល់​ការ​អភិវឌ្ឍ​សេដ្ឋកិច្ច​សហគមន៍​អន្តរជាតិ​ក៏​គួរ​តែ​ជួយ​ប្រទេស​អាហ្វហ្កានីស្ថាន​ក្នុង​ការ​ស្ថាបនា​គណបក្ស​នយោបាយ​ដែល​មិន​ពុក​រលួយ​និង​មាន​ប្រសិទ្ធិភាព ​នៅ​មុន​ពេល​ការ​បោះឆ្នោត​លើក​ក្រោយ។

លោក​ Alvaro De ​Vasconcelos​ នៃ​វិទ្យាស្ថាន​សម្រាប់​ការ​សិក្សា​សន្តិសុខ​របស់​សហភាព​អឺរ៉ុប​ (European Union Institute for Security Studies) និយាយ​ថា​ បដិវត្តន៍​នា​ពេល​ថ្មីៗ​នេះ​ក្នុង​ប្រទេស​ទុយនីស៊ី​បាន​បង្ហាញ​ដល់​ពិភពលោក​ថា​ការ​អភិវឌ្ឍ​សេដ្ឋកិច្ច​តែមួយ​មុខ​ មិន​អាច​ធ្វើ​ឲ្យ​មាន​ស្ថិរភាព​នៅ​ក្នុង​ប្រទេស​នានា​ដូច​ជា​ប្រទេស​អាហ្វហ្កានីស្ថាន។ តែ​ការ​ធ្វើ​កំណែ​ទម្រង់​នយោបាយ​ជា​ការ​ចាំបាច់។

«ការ​អភិវឌ្ឍ​សេដ្ឋកិច្ច​ដោយ​មិនមាន​ប្រជាធិបតេយ្យូបនីយកម្ម​នយោបាយ​ដោយ​មិន​មាន​ការ​ផ្លាស់​ប្តូរ​នយោបាយ​នឹង​មិន​បាន​ធ្វើ​ឲ្យ​មាន​ផ្លាស់​ប្តូរ​អ្វីៗ​ទេ»។

លោក​មាន​ប្រសាសន៍​បន្ត​ទៀត​ថា ​សន្តិភាព​ប្រកប​ដោយ​ចីរភាព​មួយ ​នឹង​តម្រូវ​ឲ្យ​មាន​ដំណោះស្រាយខាង​នយោបាយ​ ជា​ជាង​រចនា​សម្ព័ន្ធ​នយោបាយ​ដែល​មាន​នា​ពេល​បច្ចុប្បន្ន​ក្នុង​ទីក្រុង​កាប៊ុល។

លោកស្រី​ Zahra Bahman​ ជា​ទីប្រឹក្សា​ទីក្រុង​កាប៊ុល​និយាយ​ថា​ ការ​ជំរុញ​ឲ្យ​ពួក​អ្នក​ប្រយុទ្ធ​តាលីបាន់​បាន​ទម្លាក់​អាវុធ​និង​ចូលរួម​ជាមួយ​រដ្ឋាភិបាល​ នឹង​មិន​អាច​សន្និដ្ឋាន​ថា​ជា​ប្រជាធិបតេយ្យូបនីយកម្ម​អាហ្វហ្កានីស្ថាន​បាន​ទេ។

លោកស្រី​មាន​ប្រសាសន៍​បន្ត​ទៀត​ថា​ ប្រជាធិបតេយ្យ​អាច​នាំ​ឲ្យ​មាន​ការ​ផ្សះផ្សា​ជាមួយ​ក្រុម​និយម​ផ្លូវ​កណ្តាល​របស់​ពួក​តាលីបាន់​បាន​ ក៏ប៉ុន្តែ​ការ​ផ្សះផ្សា​មិន​អាច​ធ្វើ​ឲ្យ​មាន​លទ្ធិ​ប្រជាធិបតេយ្យ​បាន​ទេ។ លោក​ស្រី​ និយាយ​ថា​ សេចក្តី​ត្រូវការ​សព្វថ្ងៃ​នេះ​ គឺ​បង្កើត​សេចក្តី​ក្លាហាន​និង​មនសិការ​ខាង​នយោ​បាយ​ក្នុង​ចំណោម​ប្រជា​ពលរដ្ឋ​អាហ្វហ្កានីស្ថាន។

«ក្នុង​រយៈពេល​បី​បួន​ឆ្នាំ​បន្ទាប់​ទៀត​នេះ​ យើង​ត្រូវការ​ឲ្យ​មាន​គណបក្ស​នយោបាយ​ដឹកនាំ​ដោយ​ប្រជាពលរដ្ឋ​ដែល​មាន​ប្រវត្តិ​មិន​ពុករលួយ​និង​ស្អាតស្អំ​ដែល​មាន​សមត្ថភាព​ទាក់ទាញ​ការ​ទុកចិត្ត​ពី​យុវជន​ក្មេងៗ​ មនុស្ស​ដែល​អាច​ឈ្នះ​ការ​បោះឆ្នោត​ដោយ​មិនមាន​ការ​សូកប៉ាន់​ ដោយ​មិន​មាន​ការ​គាំទ្រ​ពី​កាំភ្លើង។ នេះ​ជា​ការ​ទទួល​ខុសត្រូវ​ដ៏​ធំ​មួយ»។

ហើយ​លោកស្រី​មាន​ប្រសាសន៍​បន្ត​ទៀត​ថា​ ការ​ទទួល​ខុសត្រូវ​នេះ​ ជា​ចម្បង​ត្រូវ​ធ្លាក់​ទៅ​លើ​ប្រជាពល​រដ្ឋ​អាហ្វហ្កានីស្ថាន។

ក៏ប៉ុន្តែ​ លោក​ Alvaro de Vasconcelos ​និយាយ​ថា​ ទោះបី​នេះ​ជា​ការ​ទទួល​ខុសត្រូវ​ដ៏​សំខាន់​របស់​ប្រជាពលរដ្ឋ​អាហ្វហ្កានីស្ថាន​ក៏ដោយ​ សហគមន៍​អន្តរជាតិ​ក៏​អាច​ជួយ​ជ្រោម​ជ្រែង​ដំណើរការ​នយោបាយ​ក្នុង​ប្រទេស​អាហ្វហ្កានីស្ថាន​ដែរ។​លោក​បាន​រ៉ាយរ៉ាប់​ដោយ​យោង​ទៅ​តាម​ឧទាហរណ៍​នៃ​ប្រទេស​ព័រទុយ​ហ្គាល់​ជា​មាតុភូមិ​របស់​លោក​ ដែល​លោក​និយាយ​ថា ​ពលរដ្ឋ​អាល្លឺម៉ង់​បាន​ជួយ​ក្នុង​ការ​បង្កើត​គណបក្ស​នយោបាយ​ថ្មី​៣​ដើម្បី​ប្រកួត​ប្រជែង​ជាមួយ​គណបក្ស​កុម្មុយនិស្ត​ក្រោយ​ពី​បដិវត្តន៍​ឆ្នាំ​១៩៧៤។

«ហើយ​ឥឡូវនេះ ​មិត្តភក្តិ​របស់​យើង​នៅ​ក្នុង​ប្រទេស​អេហ្ស៊ីប​កំពុង​សុំ​យើង​ឲ្យ​ធ្វើ​ដូចគ្នា​នៅ​ក្នុង​ប្រទេស​អេហ្ស៊ីប។ ក្នុង​ប្រទេស​ទុយនីស៊ី វា​ជា​ករណី​ដូច​គ្នា។ ​ក្នុង​ប្រទេស​អេហ្ស៊ីប​ ពួកគេ​និយាយ​ថា​ យើង​មាន​គណបក្ស ​Muslim Brotherhood​ តែមួយ​ ដូច្នេះ​យើង​ត្រូវការ​គណបក្ស​នយោបាយ​ យើង​ត្រូវការ​គណបក្ស​នយោបាយ​ច្រើន។ តើ​អ្នក​អាច​ជួយ​យើង​បាន​ទេ?»

អ្នក​វិភាគ​និយាយ​ថា​ ដើម្បី​ធ្វើ​ឲ្យ​សម្រេច​គោលដៅ​ដែល​ប្រទេស​អាហ្វហ្កានីស្ថាន​មាន​ស្ថិរភាពមួយ​នៅ​ឆ្នាំ​២០១៤​ អង្គការ​អូតង់​និង​សម្ព័ន្ធមិត្ត​របស់​ខ្លួន​មិន​អាច​ព្រងើយ​កន្តើយ​ពី​សារៈសំខាន់​នៃ​អន្តរកាល​នយោបាយ​មួយ​ក្នុង​ប្រទេស​អាហ្វហ្កានីស្ថាន​បាន​ទេ​ ដោយ​អម​ទៅ​ជាមួយ​សំណើ​សន្តិសុខ​និង​ការ​ផ្លាស់ប្តូរ​ខាង​សេដ្ឋកិច្ច។

ប្រែ​សម្រួល​ដោយ ​ជឹង​ ប៉ូជីន

XS
SM
MD
LG