ការដួលរលំនៃរដ្ឋាភិបាលរបស់លោកសេនាប្រមុខលន់ នល់ ដែលគាំទ្រដោយសហរដ្ឋអាមេរិកកាលពីថ្ងៃទី១៧ ខែមេសា ឆ្នាំ១៩៧៥ គឺជា ការបញ្ចប់នូវអាជីពការទូតមួយរបស់លោកគង់ ចាប។ លោកត្រូវនាំក្រុមគ្រួសារចាកចេញពីប្រទេសកម្ពុជាមករស់នៅសហរដ្ឋអាមេរិកក្នុងនាមជាជនភៀសខ្លួន ដោយត្រូវចាប់ផ្តើមសាងជីវិតពីចំណុចសូន្យមកវិញ។
ប៉ុន្តែ៤២ឆ្នាំក្រោយមក លោកអាចប្រកាសដោយមោទនភាពពីជោគជ័យថ្មីមួយ ដែលក្រុមគ្រួសារសម្រេចបាននោះគឺ លោកចាប សុគន្ធា ជាកូនប្រុសច្បងរបស់លោកត្រូវបានដំឡើងឋានៈជាមេបញ្ជាការនៃកងទ័ពជើងទឹកសហរដ្ឋអាមេរិក បន្ទាប់ពីបានតស៊ូស្វិតស្វាញក្នុងអាជីពនេះចំនួនជាង២០ឆ្នាំ។
លោកគង់ ចាប ដែលពេលនេះបានចូលនិវត្តន៍ពីការងារជាអ្នកប្រឹក្សានៅមណ្ឌលចាស់ជរា ក្នុងរដ្ឋកាលីហ្វញ៉ាបានបញ្ជាក់ថា៖
«គ្រួសារទាំងអស់មានចិត្តរំភើបមែនទែនមិននឹកស្មានថា កូនបានឡើងដល់ឋានៈខ្ពង់ខ្ពស់អីចឹង»។
លោក គង់ ចាបគឺជាភារៈធារីនៃស្ថានទូតខ្មែរប្រចាំប្រទេសឥណ្ឌាទទួលបន្ទុកវប្បធម៌តាំងពីឆ្នាំ១៩៧៣ រហូតដល់ក្រុមខ្មែរក្រហមវាយចូលយកទីក្រុងភ្នំពេញបាន។ លោកមានស្រុកកំណើតនៅ ស្រុកតាខ្មៅ ខេត្តកណ្តាល។
នៅពេលដែលលោកនាំកូនៗមកនៅសហរដ្ឋអាមេរិកគឺ កូនប្រុសច្បងចាប សុគន្ធា ទើបតែមានអាយុ១២ឆ្នាំប៉ុណ្ណោះ។ លោកបានចូលបម្រើក្នុងទាហានសហរដ្ឋអាមេរិកនៅឆ្នាំ១៩៨៤ ហើយបន្ទាប់ពីធ្វើការបាន៨ឆ្នាំ លោកបានសម្រាកទៅសិក្សាបន្ថែមយកអនុបណ្ឌិតខាងវិស្វកម្មផ្នែកសប់វែរ (Software) នៅឆ្នាំ២០០០។ លោកបានឡើងឋានៈជាបន្តបន្ទាប់រហូតបានឡើងជាមេបញ្ជាការទាហានជើងទឹកក្នុងអង្គភាពបម្រុងនៅដើមឆ្នាំ២០១៧នេះ។
លោកចាប សុគន្ធាបានបញ្ជាក់ថា៖
«ខ្ញុំមកនៅស្រុកនេះតូចដែរ ប៉ុន្តែខ្ញុំកូនខ្មែរត្រូវតែខំធ្វើយ៉ាងម៉េចឱ្យមានមុខមាត់ដល់ខ្មែរយើង។ នេះគឺមានចិត្តសប្បាយជាងគេហើយបានជាយើងខំ។ អ្នកនៅស្រុកនេះមានយួនច្រើនជាងខ្មែរ។ ខ្ញុំបានឃើញយួនគេក៏ធ្វើធំៗដែរ។ យើងត្រូវប្រកួតជាមួយគេធ្វើយ៉ាងម៉េចឱ្យខ្មែរបានគ្រាន់បើជាងគេដែរ»។
ក្នុងចំណោមបងប្អូនទាំង៥នាក់ពួកគេភាគច្រើនមានជំនាញខាងហិរញ្ញវត្ថុ។ ដោយសារក្រុមគ្រួសាររបស់លោកមិនបានឆ្លងកាត់របបខ្មែរក្រហម វាអាចជួយដល់ការសិក្សារបស់កូនៗផងដែរ។ ក្នុងខណៈពេលដែលពលរដ្ឋខ្មែរអាមេរិកាំងជាច្រើនមានអាការៈជំងឺបាក់ស្បាតដែលបន្សល់ពីរបបខ្មែរក្រហម ហើយអ្នកខ្លះទៀតបានចម្លងជំងឺនេះទៅដល់កូនចៅជំនាន់ក្រោយ។
លោកគង់ ចាបបានបន្ថែមថា៖
«រឿងខ្មែរក្រហមហ្នឹង ទោះបីយើងមិនបានឆ្លងកាត់តែបើយើងនៅមានចិត្តចុកចាប់នឹងរបបវាលពិឃាត។ នេះសម្រាប់យើងចាស់ដល់ក្មេងវាអត់បានឆ្លងកាត់ហ្នឹងវាអត់ថា មានអារម្មណ៍ខ្លាំងដូចយើងទេគ្រាន់តែថា ដឹងរឿងខ្លះធម្មតាទេ។ ម្ល៉ោះហើយវាអត់ប៉ះពាល់អារម្មណ៍វាក្នុងការរៀនសូត្រអីទាំងអស់វានៅតូចៗ»។
សម្រាប់លោកចាប សុគន្ធាគន្លឹះដ៏សំខាន់ដែលជោគជ័យក្នុងអាជីពនោះគឺ៖
«នៅស្រុកនេះទីមួយគឺ ត្រូវខិតខំ។ ទីពីរនៅស្រុកនេះ ឬនៅស្រុកណាក៏ដោយ យើងត្រូវមានអ្នកណាមួយ ដែលយើងអាចពឹងបានជួយយើងបាន។ ទីមួយការខំគឺ ត្រូវតែខំហើយ ប៉ុន្តែបើមានគេជួយគឺមានផ្លូវច្រើនជាង»។
លោកថា ក្នុងការសិក្សារៀនសូត្រមានការជួយឧបត្ថម្ភពីក្រុមគ្រួសារ ហើយនៅកន្លែងធ្វើការលោកត្រូវបានថ្នាក់លើយកចិត្តទុកដាក់ ដោយសារតែលោកខិតខំប្រឹងប្រែងធ្វើការ។
លោកមេបញ្ជាការចាប សុគន្ធា រស់នៅទីក្រុងសាន់ឌីយ៉េហ្គោ រដ្ឋកាលីហ្វញ៉ា ហើយមានកូនស្រីម្នាក់និងកូនប្រុសម្នាក់។ លោកទទួលបានមេដាយទាហានជើងទឹក និងម៉ារីនជាច្រើន៕
