ភ្ជាប់​ទៅ​គេហទំព័រ​ទាក់ទង

មេ​ដឹកនាំ​អឺ​រ៉ុប​សុំ​លោក​​មូបារ៉ាក់​​ចុះ​ចេញ​ពី​តំណែង


អ្នក​ស្រី Catherine Ashton ប្រធាន​គោល​នយោបាយ​ការ​បរទេស​នៃ​សហភាព​អឺរ៉ុប​អញ្ជើញ​​ចូល​រួម​នៅ​ក្នុង​កិច្ច​ប្រជុំ​កំពូល​សហភាព​អឺរ៉ុប​មួយ​នៅ​ទី​ក្រុង​ប្រ៊ុស្ស៊ែល​កាល​ពី​ថ្ងៃ​ទី​០៤​ខែ​កុម្ភៈ​ឆ្នាំ​២០១១។

ខណៈ​ដែល​ក្រុម​បាតុករ​ប្រឆាំង​រដ្ឋា​ភិបាល​ធ្វើ​ការ​ប្រជុំ​មហាជន​នៅ​អេហ្ស៊ីប ​មេ​ដឹក​នាំ​សហ​ភាព​អឺរ៉ុប​អំពាវនាវ​នៅ​ក្នុង​សន្និសីទ​កំ​ពូល​មួយ​ នៅ​ក្នុង​ទី​ក្រុង​ ប្រ៊ុស្ស៊ែលស៍ (Brussels)​ ឲ្យ​លោក​ប្រធានាធិបតី​ ហូស្នី មូបារ៉ាក់ (Hosni ​Mubarak) នៃ​ប្រទេស​អេហ្ស៊ីប​ចុះ​ចេញ​ពី​តំណែង​និង​ឲ្យ​ក្រុម​បាតុករ​គាំទ្រ​និង​ប្រឆាំង​រដ្ឋាភិបាល​បញ្ចប់​ការ​ប៉ៈ​ទង្គិច​គ្នា​ដោយ​ប្រើ​អំពើ​ហិង្សា​របស់​ពួក​គេ។

ថាមពល​និង​តំបន់​ប្រើ​ប្រាក់​យូរ៉ូ គឺ​ជា​ប្រធានបទ​នៅ​ក្នុង​ការ​ពិ​ភា​ក្សា​សម្រាប់​មេ​ដឹកនាំ​អឺរ៉ុប​ ដែល​ចូល​រួម​នៅ​ក្នុង​សន្និសីទ​កំពូល​មួយ​ថ្ងៃ ​នៅ​ថ្ងៃ​សុក្រ​នេះ។​ ប៉ុន្តែ​កិច្ចពិភាក្សា​នៅ​ទី​ក្រុង​ប៊្រូស្ស៊ែលស៍ (Brussels)​ ប្រែ​ក្លាយ​ទៅ​ជា​រឿង​មិន​សូវ​សំខាន់​ទៅ​វិញ​ ដោយសារ​ព្រឹត្តការណ៍​នៅ​ក្នុង​ប្រទេស​អេហ្ស៊ីប ដែល​នៅ​ទី​នោះ​ មាន​ការ​ទាម​ទារ​កាន់​តែ​ច្រើន​ឡើង​ឲ្យ​លោក​ប្រធានាធិបតី​មូបារ៉ាក់​ចុះ​ចេញ​ពី​តំណែង​នៅ​ពេល​ឆាប់ៗ។

មេ​ដឹកនាំ​សហ​ភាព​អឺរ៉ុប​៥​រូប​ បាន​ធ្វើ​ការ​អំពាវនាវ​កាល​ពី​ថ្ងៃ​ព្រហស្បតិ៍​ ឲ្យ​លោក មូបារ៉ាក់ ចាប់​ផ្តើម​ធ្វើ​ការ​ផ្លាស់​ប្តូរ​ទៅ​រក​លទ្ធិ​ប្រជាធិប​តេយ្យ​ជា​បន្ទាន់។​ ហើយ​នៅ​ថ្ងៃ​សុក្រ​នេះ​ ក្រុម​មេ​ដឹកនាំ​អឺរ៉ុបបាន​អំពាវនាវ​ឲ្យ​រដ្ឋា​ភិបាល​លោក​ មូបារ៉ាក់ ធ្វើ​ការ​ពិភាក្សា​ជា​មួយ​គណ​បក្ស​ប្រឆាំង​នៅ​ក្នុង​ប្រទេស​អេហ្ស៊ីប។​ នាយក​រដ្ឋមន្ត្រី​អង់គ្លេស ​ដេវិដ ខាមេរ៉ុន (David​ Cameron) បាន​ថ្លែង​ថា វិធាន​ការណ៍​ទាំង​ឡាយ​ ដែល​អាជ្ញាធរ​អេហ្ស៊ីប បាន​ធ្វើ​មក​ទល់​នឹង​ពេល​នេះ​មិន​ទាន់​ល្មម​គ្រប់​គ្រាន់​ទេ​។

លោក​ខាមេរ៉ុន ថ្លែង​ថា៖​ «ខ្ញុំ​គិត​ថា សារៈសំខាន់​នោះ​គឺ​ថា​ បើ​សិន​ជា​អំពើ​ហិង្សា​ដែល​យើង​ឃើញ​នៅ​តាម​ផ្លូវ​ក្នុង​ទី​ក្រុង​ឡឺគែរ ឬ​ការ​ជួល​មនុស្ស​ឲ្យ​វាយដំ​ក្រុម​បាតុករ​ សព្វ​ថ្ងៃ​នេះ ​មាន​ការ​គាំ​ទ្រ​ពី​សំណាក់​រដ្ឋា​ភិបាល​នោះ​ អេហ្ស៊ីប​និង​របប​គ្រប់​គ្រង​របស់​ខ្លួន​ អាច​បាត់​បង់​ជំនឿ​ទុក​ចិត្ត​ និង​ការ​គាំ​ទ្រ​ដែល​នៅ​សេសសល់​ទាំង​ប៉ុន្មាន​នៅ​ក្នុង​ចក្ខុ​របស់​ពិភព​លោក​ដែល​កំពុង​សម្លឹង​មើល ​រួម​ទាំង​ប្រទេស​អង់គ្លេស​ផង»។

ទោះ​ជា​មាន​ពាក្យ​សម្តី​ខ្លាំងៗ​បែប​នេះ​ក៏​ដោយ ​ក៏​អ្នក​វិភាគ​ខ្លះ​ដូច​ជា​លោក អូលីវិអ៊ើរ ដ្យេហាន (Olivier​ Jehan)​ ប្រធាន​ការិយាល័យ​វិទ្យាស្ថាន​ទំនាក់​ទំនង​អន្តរជាតិ​បារាំង​ នៅ​ទី​ក្រុង ប្រ៊ុស្ស៊ែលស៍ ថ្លែង​ថា​ អឺរ៉ុប​មាន​ការ​យ៉ឺត​យ៉ាវ​ក្នុង​ការ​ឆ្លើយ​តប​ទៅ​នឹង​បាតុ​កម្ម​ ដែល​មាន​នៅ​ពាសពេញ​ពិភព​អារ៉ាប់​ ដែល​ចាប់​ផ្តើម​នៅ​ក្នុង​ប្រទេស​ទុយនីស៊ី៕

ប្រែ​សម្រួល​ដោយ​ ប៉ូច​ រាសី

XS
SM
MD
LG