រដ្ឋាភិបាលនៃបណ្តាប្រទេសក្នុងទ្វីបអឺរ៉ុបបានបញ្ចេញប្រតិកម្មដែលលាយឡំដោយការបារម្ភនិងការអស់សេចក្តីអំណត់ទៅនឹងការបដិសេធរបស់ប្រធានាធិបតីអេហ្ស៊ីប លោកហូស្ន៊ី មូបារ៉ាក់ មិនចាកចេញពីតំណែងភ្លាមៗ។
មេដឹកនាំអឺរ៉ុបបានបង្កើនការអំពាវនាវនៅក្នុងប៉ុន្មានថ្ងៃថ្មីៗនេះ សុំឲ្យមានការផ្លាស់ប្តូរអំណាចនៅក្នុងប្រទេសអេហ្ស៊ីប ដោយការតវ៉ាដ៏ខ្លាំងក្លាបន្តធ្វើនៅទីនោះ ទាមទារឲ្យលោកហូស្ន៊ី មូបារ៉ាក់ ចុះចេញពីតំណែង។ ការទាមទារនោះបានធ្វើម្តងទៀតបន្ទាប់ពីសេចក្តីថ្លែងការណ៍តាមទូរទស្សន៍នៃក្រុមមេដឹកនាំអេហ្ស៊ីបកាលពីថ្ងៃព្រហស្បតិ៍ដែលនិយាយថាលោកអាចមិនលាលែងពីតំណែងភ្លាមៗទេ។
នៅក្នុងសេចក្តីកត់សម្គាល់ផ្ទាល់ខ្លួនរបស់លោកប្រធានាធិបតីបារាំង នីកូឡាស សាកូហ្ស៊ី (Nicolas Sarkozy) ដែលផ្សាយតាមទូរទស្សន៍ក្រោយពីសុន្ទរកថារបស់លោកមូបារ៉ាក់មក លោកសាកូហ្ស៊ីបានមានប្រសាសន៍ថា រឿងប្រធានាធិបតីអេហ្ស៊ីប ត្រូវចេញពីតំណែងនោះ ជារឿងចៀសមិនរួច។
លោកសាកូហ្ស៊ីបានមានប្រសាសន៍ថា លោកសង្ឃឹមថា លទ្ធិប្រជាធិបតេយ្យដែលទើបមានមិនទាន់រឹងប៉ឹងរបស់ប្រទេសអេហ្ស៊ីប យកឱកាសនេះដើម្បីរៀនសូត្រនិងពង្រឹងបន្ថែមនូវនយោបាយ រចនាសម្ព័ន្ធនិងគោលការណ៍ប្រជាធិបតេយ្យ និងចៀសផុតពីការក្លាយជារបបសាសនាផ្តាច់ការ។
លោក William Hague រដ្ឋមន្ត្រីក្រសួងការបរទេសប្រទេសអង់គ្លេសបានអំពាវនាវឲ្យមានការផ្លាស់ប្តូរអំណាចជាបន្ទាន់ប៉ុន្តែមានសណ្តាប់ធ្នាប់ ចំណែករដ្ឋមន្ត្រីក្រសួងការបរទេសប្រទេសអាល្លឺម៉ង់វិញ បាននិយាយថាសុន្ទរកថារបស់លោកមូបារ៉ាក់បានបណ្តោយឲ្យសហគមន៍អន្តរជាតិខ្វល់ខ្វាយច្រើនជាងពេលមុនៗ៕
ប្រែសម្រួលដោយ នុច សារីតា
