ភ្ជាប់​ទៅ​គេហទំព័រ​ទាក់ទង

សហគមន៍​អឺរ៉ុបចាត់​ទុក​ការ​ប្រឆាំង​តវ៉ា​នៅ​អារ៉ាប់​ជា​មេរៀន


ក្រុមបាតុករ​ប្រឆាំ​ង​នឹងរដ្ឋាបាលលោក ហូស្នី មូបារ៉ាក់​ នៅ​ទីលាន​តាហ៍រៀរ​។

ប៉ារីស ប្រទេស​បារាំង៖ ប្រជា​ពលរដ្ឋ​ក្នុង​ទ្វីប​អឺរ៉ុប​បាន​តាម​ដាន​យ៉ាង​យក​ចិត្ត​ទុក​ដាក់ ​ចំពោះ​ការ​តវ៉ា​ប្រឆាំង​រដ្ឋាភិបាល​នៅ​ក្នុង​ពិភព​អារ៉ាប់​ ដោយ​មាន​ទស្សនៈ​ចម្រុះ​អំពី​ផល​ប៉ះពាល់​នៃ​ការ​ប្រឆាំង​តវ៉ា​នេះ។

ក្នុង​រយៈពេល​តែ​ពីរ​បី​ខែ​កន្លង​ទៅប៉ុណ្ណោះ​ ទ្វីប​អឺរ៉ុប​ត្រូវ​បាន​ធ្វើ​ឲ្យ​រញ្ជួយ​ដោយ​ការ​តវ៉ា​របស់​ប្រជា​ពលរដ្ឋ ប្រឆាំង​នឹងការ​ឡើង​ថ្លៃ​នៃ​ទំនិញ​ ភាព​គ្មាន​ការងារ​ធ្វើ​ និង​វិធានការ​ដ៏​តឹងរ៉ឹង​ទាំង​ឡាយ។ ក្រុម​បាតុករ​បាន​ដើរ​នៅ​តាម​ដងផ្លូវ​ទាំង​ឡាយ​នៅ​ក្នុង​ប្រទេស​ក្រិក​ អៀកឡង់ដ៍​ ព័រទុយហ្កាល់​ អេស្ប៉ាញ​ អង់គ្លេស​ និង​បារាំង។ ឥឡូវ​នេះ​ ទ្វីប​អឺរ៉ុប​កំពុង​សម្លឹង​មើល​ការបះបោរ​របស់​ប្រជា​ពលរដ្ឋ​មួយ​ឈុត​ទៀត​ នៅ​ក្នុង​ប្រទេស​មួយ​ចំនួន​ក្នុង​ពិភព​អារ៉ាប់​ ដូច​ជា​ប្រទេស​ទុយនីស៊ី​ អាល់ហ្សេរី និង​អេហ្ស៊ីប​ ដែល​គ្រាន់​តែ​ស្ថិត​នៅ​ផ្នែក​ម្ខាង​ទៀត​នៃ​សមុទ្រ​មេឌីទែរ៉ាណេ​តែ​ប៉ុណ្ណោះ។

ប្រធាន​វិទ្យាស្ថាន​ស្រាវជ្រាវ​ការ​ព្យាករណ៍​អំពី​និន្នាការ​ (Trends Research Institute) លោក​ ជឺរ័លដ៍​ ស៊ីលែនត៍​ (Gerald Celente) មាន​ប្រសាសន៍​ថា អ្វី​ដែល​កំពុង​កើតឡើង​នៅ​ក្នុង​ពិភព​អារ៉ាប់​ មាន​ផល​ប៉ះពាល់​ដោយ​ផ្ទាល់​នៅ​ក្នុង​ទ្វីប​អឺរ៉ុប។ លោក​ជឿ​ជាក់​ថា ​បញ្ហា​សេដ្ឋកិច្ច​គឺ​ជាបញ្ហា​ទុក្ខ​ព្រួយ​ដែល​ប្រជា​ពលរដ្ឋ​ក្នុង​ពិភព​អារ៉ាប់ និង​ទ្វីប​អឺរ៉ុប​ ជួប​ប្រទះ​ដូច​គ្នា។ លោក​មាន​ប្រសាសន៍​ថា៖

«តើ​ពួក​គេមិន​សូវ​ខ្វល់​ទេឬ ​ប្រសិន​បើ​គេ​មាន​រដ្ឋាភិបាល​ផ្តាច់ការ​មែន តែ​ប្រជា​ពលរដ្ឋ​អាច​រក​លុយ​បាន​នោះ? របប​ផ្តាច់ការ​ក្តី​ របប​ប្រជាធិបតេយ្យ​ក្តី​ ប្រជាពលរដ្ឋ​ប្រហែល​ជា​មិន​សូវ​ខ្វល់​ ប្រសិន​បើ​គេ​មាន​សុខភាព​ល្អ»។

លោក​ ស៊ីលែនត៍​ ជឿ​ជាក់​ថា​ ការ​ប្រឆាំង​តវ៉ា​ក្នុង​ឆ្នាំ​២០១០ នៅ​ក្នុង​ទ្វីប​អឺរ៉ុប​គឺ​គ្រាន់​តែ​ជា​ការ​ចាប់​ផ្តើម​មួយ​តែ​ប៉ុណ្ណោះ។ លោក​បាន​ព្រមាន​ថា បាតុកម្ម​ទាំង​ឡាយ​ដែល​រាលដាល​នៅ​ជុំវិញ​ទ្វីប​អាហ្រ្វិក​ខាង​ជើង និង​មជ្ឈឹម​បូព៌ា​ប្រទេស​នឹង​ធ្វើ​ដំណើរ​មក​កាន់​ទ្វីប​អឺរ៉ុប។

ពិត​ណាស់​ អ្វី​ដែល​កើត​មាន​នៅ​ពិភព​អារ៉ាប់​ វា​អាច​ត្រូវ​បាន​ឃើញ​មាន​ក្នុង​ទ្វីប​អឺរ៉ុប។ ជនជាតិ​ស៊ែប​រាប់​ម៉ឺន​នាក់​បាន​ធ្វើ​ការ​ប្រមូល​ផ្តុំ​នៅ​ក្នុង​ទី​ក្រុង​បែលក្រាដ​ ដោយ​ធ្វើ​ការ​ប្រឆាំងតវ៉ា​នឹង​តម្លៃទំនិញ​ខ្ពស់​ និង​ភាពគ្មាន​ការងារ​ធ្វើ​ និង​បាន​អំពាវនាវ​ឲ្យ​មាន​ការ​បោះឆ្នោត​មុន​ពេល​កំណត់។ សមាជិក​គណ​បក្ស​ប្រឆាំង​ ស៊ែបប៊ី​ មួយ​រូប​បាន​និយាយ​ថា​ ការ​ប្រឆាំង​តវ៉ា​នៅ​ក្នុង​ប្រទេស​ទុយនីស៊ី​ និង​អេហ្ស៊ីប​ បាន​ផ្ញើ​សារ​មួយ​ទៅ​រដ្ឋាភិបាល​ទាំងអស់​ឲ្យស្តាប់​ប្រជា​ពលរដ្ឋ​របស់​ខ្លួន។

នៅ​ក្នុង​ប្រទេស​អ៊ីតាលី​ ក្រុម​ដែល​លួច​ចូល​ទៅ​បំផ្លាញ​កម្មវិធី​កុំព្យូទ័រ​មួយ​ ដែល​គេ​ហៅ​ថា​ «ក្រុម​អនាមិក»​ បាន​ធ្វើ​ការ​វាយ​ប្រហារ​ទៅ​លើ​គេហទំព័រ​អ៊ីនធឺណិត​របស់​រដ្ឋាភិបាល​អ៊ីតាលី​ កាល​ពី​ថ្ងៃ​អាទិត្យ​ ដើម្បី​ប្រឆាំង​តវ៉ា​ទៅ​នឹង​គោល​នយោបាយ​របស់​រដ្ឋាភិបាល​នេះ។ ការ​វាយ​ប្រហារ​តាម​ប្រព័ន្ធ​អ៊ីនធឺណិត​ គឺ​ប្រហាក់​ប្រហែល​ទៅ​នឹង​ការ​វាយ​ប្រហារ​ដែល​ត្រូវ​បាន​ចាប់​ផ្តើម​ធ្វើ​ឡើង​នៅ​អេហ្ស៊ីប​ និង​ទុយនីស៊ី។

ប៉ុន្តែ នាយក​វិទ្យាស្ថាន​បារាំង​សម្រាប់​ទំនាក់ទំនង​អន្តរជាតិ​ ប្រចាំ​នៅ​ក្នុង​ទី​ក្រុង​ ប្រ៊ុសែ្សល​ (Brussels) លោក​ អូលីវីយ៉េ​ ដ្យេហិន​ (Olivier Jehin) មាន​មន្ទិល​សង្ស័យ ​ដែល​ថា​ទ្វីប​អឺរ៉ុប​នឹង​ជួប​ប្រទះ​ការ​ប្រឆាំង​តវ៉ា​ ដែល​រីករាល​ដាល​ជាង​នេះ​បន្ថែម​ទៀត។ លោក​ដ្យេហ៊ិន មាន​ប្រសាសន៍​ថា៖

«ខ្ញុំ​គិត​ថា​ វិធាន​ការ​តឹង​រ៉ឹង​ចម្បងៗ​ទាំង​ឡាយ​ត្រូវ​បាន​ធ្វើ​ឡើង​កាល​ពី​ឆ្នាំ​ទៅ។ ប្រហែល​ជា​អាច​មាន​បាតុកម្ម​ថ្មីៗ​មួយ​ចំនួន​ទៀត នៅ​ក្នុង​ប្រទេស​មួយ​ចំនួន ប៉ុន្តែបាតុកម្ម​ទាំង​នេះនឹង​មិន​ប្រកាន់​យក​សារៈសំខាន់​ដូច​គ្នា​ ដូច​ដែល​កើត​មាន​ឡើង​នៅ​ក្នុង​ទ្វីប​អាហ្រ្វិក​ខាង​ជើងនោះ​ទេ ដែល​ប្រហែល​ជា​មាន​ការ​លើក​លែង​សម្រាប់​ប្រទេស​ជាក់​លាក់​មួយ​ចំនួន នៅ​ក្នុង​តំបន់​បាល់​កង់»។

អ្នក​សិក្សា​ស្រាវ​ជ្រាវ​ រីម៉ី អាល់​ឡាហ្វ (Rime Allaf) នៃ​វិទ្យាស្ថាន​គោលនយោបាយ​ ឆាតថាម ហោស​ (Chatham House) ដែល​មាន​មូលដ្ឋាន​នៅ​ក្នុង​ទីក្រុង ឡុងដ៍ ក៏បាន​ព្រមាន​ប្រឆាំង​ទៅ​នឹង​ការ​ប្រៀប​ធៀប​ចលនា​ប្រឆាំងតវ៉ានៅ​ក្នុង​ទ្វីប​អឺរ៉ុប​ និង​អារ៉ាប់ដែរ។ «ចា មាន​មូល​ហេតុ​ធំ​ៗទាំង​ឡាយ នៃ​ការ​មិន​ពេញ​ចិត្តនៅ​ក្នុង​ទ្វីប​អឺរ៉ុប។ ទោះ​ជា​យ៉ាង​នេះ​ក្តី ប្រការ​នេះ​បាន​ភ្លេចថា ​សមាស​ភាព​ចម្បង​មួយ​នៃ​ការ​បះ​បោរ​នៅ​ពិភព​អារ៉ាប់ មិន​មែន​ដោយសារតែ​បញ្ហា​សេដ្ឋ​កិច្ច​តែ​មួយប៉ុណ្ណោះ​ទេ ប៉ុន្តែ​ជា​សំខាន់​ វា​គឺ​ជា​បញ្ហា​នយោ​បាយ»។

ទោះ​ជា​យ៉ាង​នេះ​ក្តី អាល់​ឡាហ្វ​ និយាយ​ថា ប្រជាធិបតេយ្យ​ដែល​មិន​ល្អ​ឥត​ខ្ចោះ​នៅ​ក្នុង​ទ្វីប​អឺរ៉ុប​នោះមិន​បដិសេធ​សេរីភាព​ក្នុង​ការ​បញ្ចេញ​មតិ​ ដូច​ដែល​រដ្ឋាភិបាល​ផ្តាច់​ការ​អារ៉ាប់​មួយ​ចំនួន​បាន​ធ្វើ​នោះ​ទេ។ អ្នក​ស្រី​ក៏​មិន​ជឿ​ផងដែរ​ថា ​អារ៉ាប់​កំពុង​តែ​ធ្វើ​ដំណើរ​តាម​គន្លង​នៃ​ទម្រង់មួយ​នៃ​ការ​ដួល​រលំ​នៃ​លទ្ធិ​កុម្មុយ​នីស្ត​និយមនៅ​ក្នុង​ទ្វីប​អឺរ៉ុប​ខាង​កើត ដូច​ដែល​អ្នក​វិភាគ​មួយ​ចំនួន​បាន​ផ្តល់​យោបល់​នោះ​ទេ។

«ការ​ដួល​រលំ​នៃ​ជញ្ជាំង​ប៊ែកឡាំង គឺ​ជា​ការ​ដួល​រលំ​នៃ​មនោ​គមន៍​វិជ្ជា​មួយ​ទាំង​មូល ដែល​បាន​គ្រប់​គ្រង​របប​ទាំង​នោះ ដែលប្រកាន់​យក​លទ្ធិ​កុម្មុយនីស្ត​និយម។ នៅ​ក្នុង​ពិភព​អារ៉ាប់ វា​មិន​មែន​មាន​តែ​មនោគម​ន៍​វិជ្ជាតែ​មួយ​ទេ​ដែល​បាន​គ្រប់​គ្រង​ប្រទេស​អារ៉ាប់​ទាំង​២២​នេះនោះ»។

ក្រុម​អ្នក​រិះ​គន់​ដូច​ជា​អ្នក​ស្រី អាល់​លាហ្វ និយាយ​ថា ការ​ផ្ទុះ​ឡើង​នៃ​ការ​ប្រឆាំង​តវ៉ា​របស់​ជន​ជាតិ​អារ៉ាប់​នៅ​ក្នុង​ទ្វីប​អឺរ៉ុប គឺ​ជា​បរាជ័យ​នៃ​គោល​នយោ​បាយ​ការ​បរទេស​របស់​ខ្លួន។

«ដោយ​ធ្វើ​ការ​អះ​អាង​ថា ពួក​គេ​កំពុង​ជំរុញ​ឲ្យ​មាន​លទ្ធិ​ប្រជា​ធិបតេយ្យ ប៉ុន្តែ​នៅ​ពេល​ដែល​ការ​ជំរុញ​នេះ​មិន​ទាន់​មាន​លក្ខណៈ​រួច​រាល់​នៅ​ឡើយ ក្នុង​ការ​អនុញ្ញាត​ឲ្យប្រជា​ពល​រដ្ឋ​នៅ​ក្នុង​ទ្វីប​អារ៉ាប់​ មាន​សិទ្ធិ​ដូច​គ្នា​ទៅ​នឹង​ប្រជា​ពលរដ្ឋ​របស់​ពួក​គេ​នៅ​ក្នុង​បស្ចឹម​ប្រទេស»។

ដូច្នេះ ពេល​នេះ អ្នក​វិភាគ​មួយ​ចំនួន​និយាយ​ថា មេ​រៀន​សំខាន់​មួយ​ដែល​ទ្វីប​អឺរ៉ុប​អាច​រៀន​ពី​ស្ថានភាព​នៅ​ពិភពអារ៉ាប់​ គឺ​ស្តាប់​ការ​ប្រឆាំង​តវ៉ានេះ៕

ប្រែសម្រួល​ដោយ ឌី​ ខាំបូលី

XS
SM
MD
LG