ប្រទេសឆែកដែលជាប្រធានសហភាពអឺរ៉ុបបានបញ្ជាក់នៅថ្ងៃពុធនេះថា សហភាពអឺរ៉ុបបានយល់ស្របគ្នាអំពីការដាក់ទណ្ឌកម្មជុំថ្មីប្រឆាំងនឹងប្រទេសរុស្ស៊ី នៅក្រោយពេលដែលរដ្ឋាភិបាលរុស្ស៊ីបានដាក់បញ្ចូលជាផ្លូវការនូវតំបន់ ៤ របស់ប្រទេសអ៊ុយក្រែនជាផ្នែកមួយរបស់ប្រទេសរុស្ស៊ី។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ឯកអគ្គរដ្ឋទូតប្រទេសឆែកប្រចាំសហភាពអឺរ៉ុបអ្នកស្រី Edita Hrda បានសរសេរនៅលើ Twitter ថា កញ្ចប់ទណ្ឌកម្មថ្មីបំផុតនេះ ដែលជាការដាក់ទណ្ឌកម្មលើកទី ៨ តាំងពីពេលដែលប្រទេសរុស្ស៊ីបានឈ្លានពានប្រទេសអ៊ុយក្រែនកាលពីខែកុម្ភៈមក នៅពេលនេះកំពុងឆ្លងកាត់នីតិវិធីអនុម័តចុងក្រោយ ដោយប្រសិនបើគ្មានការជំទាស់ណាមួយទេ វានឹងត្រូវបានផ្សព្វផ្សាយហើយនឹងចូលជាធរមាននៅថ្ងៃព្រហស្បតិ៍ស្អែក។
អ្នកស្រី Hrda បានថ្លែងថា៖ «យើងបានសម្រេចការព្រមព្រៀងគ្នាខាងនយោបាយលើការដាក់ទណ្ឌកម្មថ្មីមួយប្រឆាំងនឹងប្រទេសរុស្ស៊ី ដែលនេះគឺជាការឆ្លើយតបខ្លាំងក្លាមួយរបស់សហភាពអឺរ៉ុបចំពោះការភ្ជាប់យកដោយខុសច្បាប់របស់ [ប្រធានាធិបតីរុស្ស៊ីលោក Vladimir] Putin នូវដែនដី [របស់ប្រទេសអ៊ុយក្រែន]។
គេនៅមិនទាន់ដឹងនៅឡើយទេអំពីសេចក្តីលម្អិតនៃកញ្ចប់ទណ្ឌកម្មថ្មីនេះ ប៉ុន្តែឯកអគ្គរដ្ឋទូតនានារបស់សហភាពអឺរ៉ុបដែលបានពិភាក្សាគ្នាអំពីវិធានការដាក់ទណ្ឌកម្មនេះកាលពីប៉ុន្មានថ្ងៃមុន បានផ្តោតការយកចិត្តទុកដាក់លើការរិះរកវិធីដាក់កំហិតតម្លៃអតិបរមាលើប្រេងឥន្ធនៈរបស់ប្រទេសរុស្ស៊ីដែលត្រូវបានដឹកជញ្ជូនចេញទៅលក់នៅទូទាំងពិភពលោក។
ពួកគេក៏កំពុងពិនិត្យមើលផងដែរលើការដាក់ចូលបន្ថែមនៅក្នុងបញ្ជីខ្មៅនូវបុគ្គលណាដែលត្រូវបានសហភាពអឺរ៉ុបដាក់បម្រាមលើការធ្វើដំណើរនិងបង្កកទ្រព្យសម្បត្តិ សម្រាប់តួនាទីរបស់បុគ្គលទាំងនោះនៅក្នុងការគាំទ្រចំពោះការភ្ជាប់យករបស់រុស្ស៊ីនូវដែនដីរបស់អ៊ុយក្រែននេះ៕
